ថ្នាក់ដឹកនាំ និងមន្ត្រី-បុគ្គលិក អាជ្ញាធរមីនកម្ពុជា ចូលរួមរំលែកទុក្ខដ៏ក្រៀមក្រំបំផុត ចំពោះមរណភាពរបស់លោក ស៊ីនហ្សូ អាបេ
ភ្នំពេញ៖ ថ្នាក់ដឹកនាំ និងមន្ត្រី-បុគ្គលិក អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីនមានភាពរន្ធត់ចិត្ត សោកសៅ និងសោកស្តាយជាពន់ពេក ដែលទទួលបានព័ត៌មានអំពីមរណភាពរបស់ ឯកឧត្តម ស៊ីនហ្សូ អាបេ អតីតនាយករដ្ឋមន្ត្រីជប៉ុន ដោយសារការបាញ់ប្រហារដ៏ឃោរឃៅ នៅក្នុងទីក្រុងណារ៉ា ប្រទេសជប៉ុន។
ឯកឧត្តម ស៊ីនហ្សូ អាបេ ជាមិត្តដ៏ល្អរបស់កម្ពុជា។ នៅក្នុងអាណត្តិជានាយករដ្ឋមន្ត្រីរបស់ឯកឧត្តម ទំនាក់ទំនងទ្វេភាគីរវាងកម្ពុជា និងជប៉ុន បានអភិវឌ្ឍទៅជាដៃគូយុទ្ធសាស្ត្រ កាលពីឆ្នាំ២០១៣។
ជាមួយគ្នានោះផងដែរ ប្រទេសជប៉ុនបានផ្ដល់ជំនួយជាថវិកា និង សម្ភារ:យ៉ាងច្រើនដល់កម្ពុជា ដើម្បីធ្វើការបោសសម្អាតមីន និងគ្រាប់យុទ្ធភណ្ឌមិនទាន់ផ្ទុះ ជួយសង្គ្រោះដល់អាយុជីវិតប្រជាពលរដ្ឋខ្មែរ និងជួយគាំទ្រដល់ការអភិវឌ្ឍន៍ជីវភាពរស់នៅ ព្រមទាំងហេដ្ឋារចនាសម្ព័ន្ធនានាផងដែរ។
យើងខ្ញុំសូមសម្ដែងនូវការចូលរួមរំលែកទុក្ខដ៏ក្រៀមក្រំបំផុត ជូនចំពោះក្រុមគ្រួសារសព ក៏ដូចជាប្រជាជនជប៉ុន ចំពោះការបាត់បង់ដ៏ធំធេងនេះ៕
