ភ្នំពេញ៖ ថ្មីៗនេះ ក្រុមការងារបច្ចេកទេសនៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានសង្កេតឃើញថា មានជនខិលខូចបានប្រើប្រាស់បណ្តាញសង្គម ដើម្បីផ្សព្វផ្សាយលក់ទំនិញក្នុង “តម្លៃថោកខុសពីធម្មតា” ក្នុងគោលបំណងបោកបញ្ឆោតយកប្រាក់ពីបងប្អូនប្រជាពលរដ្ឋ។ ករណីនេះ ក្រុមការងារសូមក្រើនរំលឹកដល់បងប្អូនឱ្យប្រុងប្រយ័ត្នចំពោះល្បិចកលដូចជា៖
– ការប្រើប្រាស់រូបភាព ឬវីដេអូក្លែងក្លាយ៖ យករូបភាព ឬវីដេអូអ្នកដទៃមកបញ្ចូលសំឡេង (Voiceover) ជាភាសាខ្មែរ។
– ការផ្តល់តម្លៃទាបគួរឱ្យសង្ស័យ៖ ដាក់តម្លៃទាបជាងទីផ្សារ ដើម្បីអូសទាញឱ្យអតិថិជនសម្រេចចិត្តទិញភ្លាមៗ។
– ការបង្ខំឱ្យបង់ប្រាក់មុន៖ តម្រូវឱ្យអតិថិជនកក់ប្រាក់ ឬវេរលុយទូទាត់មុនពេលដឹកជញ្ជូន រួចក៏បិទគណនី ឬ Block ជនរងគ្រោះ។
សូមអនុវត្តតាមវិធានការខាងក្រោមដើម្បីការពារខ្លួន៖
– ពិនិត្យប្រភពឱ្យបានច្បាស់លាស់៖ ត្រូវពិនិត្យមើលមតិយោបល់ (Comments) ការវាយតម្លៃ (Reviews) ពីអតិថិជនមុនៗ និងសកម្មភាពចាស់ៗរបស់អ្នកលក់។
– ជ្រើសរើសការបង់ប្រាក់ពេលទំនិញដល់ដៃ (Cash on Delivery)។
-ស្រាវជ្រាវតម្លៃទីផ្សារ៖ ប្រសិនបើតម្លៃខុសគ្នាឆ្ងាយពីទីផ្សារច្រេីន នោះអាចជាទំនិញក្លែងក្លាយ ឬជាការបោកប្រាស់។
ប្រសិនបើបងប្អូនប្រជាពលរដ្ឋសង្ស័យថាជាការឆបោក សូមធ្វើការ Screenshot នូវរាល់ភស្តុតាង និងព័ត៌មានគណនីរបស់អ្នកលក់ រួចធ្វើការ Report និងរាយការណ៍មកកាន់អាជ្ញាធរមានសមត្ថកិច្ច ដើម្បីចាត់វិធានការ៕
