ឯកឧត្តម វ៉ី សំណាង អញ្ជើញសំណេះសំណាល និងនាំយកគ្រឿងឧបភោគបរិភោគ ប្រគល់ជូនជនភៀសសឹកចំនួន ២១៤គ្រួសារ នៅស្រុកអង្គរបូរី

តាកែវ ៖ ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ រួមជាមួយសហការី បានអញ្ជើញជួប សំណេះសំណាល សាកសួរសុខទុក្ខ នាំយកគ្រឿងឧបភោគបរិភោគ និងថវិកាមួយចំនួន ជូនដល់ក្រុមគ្រួសារវីរៈកងទ័ព ភៀសសឹក និងគ្រួសារស៊ីវិលភៀសសឹក មកពីតាមបណ្តាលខេត្តនានា ជាប់ព្រំដែនកម្ពុជា-ថៃ មកស្នាក់នៅ ជាបណ្តោះអាសន្ន ក្នុងមូលដ្ឋានស្រុកអង្គរបូរី ចំនួន ២១៤គ្រួសារ នាព្រឹកថ្ងៃអង្គារ ទី០៦ ខែមករា ឆ្នាំ២០២៦។

មានមតិសំណេះសំណាលនាឱកាសនោះដែរ ឯកឧត្តម វ៉ី សំណាង អភិបាលខេត្ត បានសម្តែងនូវការដឹងគុណដល់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលខិតខំប្រឹងប្រែងរិះរកមធ្យោបាយគ្រប់បែបយ៉ាង ទាំងការងារនយោបាយ និងការទូត ដើម្បីជំរុញឱ្យមានបទឈប់បាញ់កម្ពុជា-ថៃ និងបញ្ចប់នូវសោកនាដកម្មពីការឈ្លានពានរបស់ថៃមកលើកម្ពុជា។

ឯកឧត្ដម បញ្ជាក់ទៀតថា គោលដៅរបស់ សម្តេចធិបតី គឺមិនចង់ឱ្យមានសង្រ្គាម និងមិនចង់ឱ្យប្រជាជនកម្ពុជាស្លាប់ និងរបួសទេ ពោលគឺចង់ដោះស្រាយជម្លោះដោយសន្តិវិធី និងចង់ឱ្យប្រជាជនកម្ពុជារស់នៅក្រោមសន្តិភាព និងទទួលបានការអភិវឌ្ឍគ្រប់គ្នាៗ។

បន្ថែមពីនេះទៀត ឯកឧត្តម អភិបាលខេត្ត ក៏បានអំពាវនាវដល់បងប្អូនទាំងអស់ត្រូវសាមគ្គីរួមគ្នា វិញជាធ្លុងមួយ និងបន្ដជឿជាក់លើ សម្តេចតេជោ ហ៊ុន សែន ប្រធានព្រឹទ្ធសភា, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងថ្នាក់ដឹកនាំជាច្រើនរូបទៀត ជឿជាក់លើវីរកងទ័ព វីរនគរបាលជាតិជួរមុខដ៏អង់អាចក្លាហាន ក្នុងការការពារបូរណភាព ទឹកដី និងដែនអធិបតេយ្យភាពកម្ពុជា៕