រដ្ឋមន្ត្រីក្រសួងអប់រំ អញ្ជើញសម្ពោធដាក់ឱ្យប្រើប្រាស់ជាផ្លូវការអគារសិក្សាថ្មី និងប្រគល់សញ្ញាបត្រជូនដល់និស្សិតជ័យលាភីនៃសាកលវិទ្យាល័យស្វាយរៀង

ស្វាយរៀង៖ នៅព្រឹកថ្ងៃទី៥ ខែមករា ឆ្នាំ២០២៦ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការអគារសិក្សាថ្មី និងពិធីប្រគល់សញ្ញាបត្រជូនដល់និស្សិតជ័យលាភីនៃសាកលវិទ្យាល័យស្វាយរៀង ដោយមានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា ឯកឧត្តម លោកជំទាវ សមាជិក សមាជិកា រដ្ឋសភា ព្រឹទ្ធសភា ឯកឧត្តម ប្រធានក្រុមប្រឹក្សាខេត្ត ឯកឧត្តម អភិបាលនៃគណៈអភិបាលខេត្តស្វាយរៀង សាកលវិទ្យាធិការ គណៈគ្រប់គ្រង សាស្ត្រាចារ្យ មន្ត្រីរាជការ និងក្មួយៗនិសិ្សតជ័យលាភីទាំងអស់នៃសាកលវិទ្យាល័យស្វាយរៀង។

ក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានចូលរួមអបអរសាទរជាមួយសមិទ្ធផលអគារសិក្សាថ្មី នៃសាកលវិទ្យាល័យស្វាយរៀង និងការប្រគល់សញ្ញាបត្រជូនដល់និស្សិតជ័យលាភីចំនួន ២ ៦១៩នាក់ នៃសាកលវិទ្យាល័យស្វាយរៀងនាពេលនេះ ដែលបានខិតខំប្រឹងប្រែងរៀនសូត្រ និងជម្នះបាននូវរាល់ឧបសគ្គនានា រហូតបញ្ចប់ការសិក្សាដោយជោគជ័យ និងក្លាយជាធនធានមនុស្សដ៏សំខាន់ ក្នុងការចូលរួមចំណែកអភិវឌ្ឍសេដ្ឋកិច្ច និងសង្គមកម្ពុជា។ លទ្ធផលដ៏ល្អប្រសើរនេះ ពិតជាមិនអាចកាត់ផ្តាច់ចេញបានពីការគាំទ្រ ការទំនុកបម្រុង និងការលើកទឹកចិត្តពីក្រុមគ្រួសារ និងមិត្តភក្តិ ព្រមទាំងការលះបង់ និងការខិតខំប្រឹងប្រែងរបស់សាស្ត្រាចារ្យ លោកគ្រូអ្នកគ្រូនោះឡើយ ហើយជាពិសេសគឺការគាំទ្រជាគោលនយោបាយ និងការវិនិយោគរបស់រាជរដ្ឋាភិបាលក្នុងវិស័យអប់រំ ព្រមទាំងការធានាបាននូវបរិស្ថានសុខសន្តិភាព ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី បច្ចុប្បន្ន ជាប្រធានព្រឹទ្ធសភា នៃព្រះរាជាណាចក្រកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ជាមួយគ្នានេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ សាស្ត្រាចារ្យ មន្ត្រីរាជការ និងបុគ្គលិកអប់រំនៃសាកលវិទ្យាល័យស្វាយរៀងដែលបានយកអស់ពេលវេលា កម្លាំងកាយចិត្ត និងប្រាជ្ញាស្មារតីចូលរួមចំណែកក្នុងការអនុវត្តកំណែទម្រង់វិស័យឧត្តមសិក្សា ជាពិសេសការអនុវត្តកំណែទម្រង់ក្នុងសាកលវិទ្យាល័យស្វាយរៀង បានចូលរួមចំណែកក្នុងការកែលម្អកម្មវិធីសិក្សា លើកកម្ពស់គុណភាពអប់រំនៅសាកលវិទ្យាល័យ ឆ្លើយតបនឹងចក្ខុវិស័យរបស់រាជរដ្ឋាភិបាល ក្នុងការអភិវឌ្ឍមូលធនមនុស្ស និងការលើកកម្ពស់ផ្នែកវិទ្យាសាស្ត្រ និងបច្ចេកវិទ្យា។

តាមរបាយការណ៍របស់ ឯកឧត្តមសាកលវិទ្យាធិការ នៅថ្ងៃនេះមាននិស្សិតជ័យលាភីសរុបចំនួន ២៦១៩នាក់ នឹងត្រូវឡើងទទួលសញ្ញាបត្រចំនួន ៣កម្រិតផ្សេងៗគ្នាគឺ៖ ថ្នាក់បរិញ្ញាបត្ររង, ថ្នាក់បរិញ្ញាបត្រ, ថ្នាក់បរិញ្ញាបត្រជាន់ខ្ពស់ ខណៈដែលនិស្សិតចំនួន ៧៦៣១ នាក់ ផ្សេងទៀត ត្រូវបានបណ្តុះបណ្តាល និងបានបញ្ចប់ការសិក្សាដោយជោគជ័យក្នុងរយៈពេល ២០ឆ្នាំកន្លងមកនេះ ហើយសូមថ្លែងអំណរគុណយ៉ាងជ្រាលជ្រៅដល់ សម្តេចកិត្តិសង្គហបណ្ឌិត ម៉ែន សំអន ព្រមទាំង ឯកឧត្តម ឧត្តមសេនីយ៍ឯក ឌី វិជ្ជា ដែលបានបន្តគាំទ្រដល់ការដំណើរការនៃសាកលវិទ្យាល័យនេះ។

ជាថ្មីម្តងទៀត តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានអបអរសាទរដល់និស្សិតជ័យលាភីទាំងអស់ និងព្រមទាំងអបអរសាទរដល់សមិទ្ធផលថ្មីមួយដែលជាអគារសិក្សាទំនើប ដោយជឿជាក់ថាអគារសិក្សាទំនើបនេះនឹងចូលរួមចំណែកយ៉ាងសំខាន់ក្នុងការលើកកម្ពស់គុណភាពអប់រំ និងបង្កើតបរិយាកាសសិក្សាដ៏សម្បូរបែបសម្រាប់និស្សិតជំនាន់ក្រោយ។

ដើម្បីចូលរួមចំណែកការពារ និងអភិវឌ្ឍកម្ពុជា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី សូមអំពាវនាវដល់គ្រឹះស្ថានឧត្តមសិក្សាបន្តធ្វើកំណែទម្រង់ឧត្តមសិក្សាដោយ៖
– ត្រូវបន្តពង្រឹងអភិបាលកិច្ចនៅតាមគ្រឹះស្ថានឧត្តមសិក្សាឱ្យមានភាពរឹងមាំ គ្រឹះស្ថាននីមួយៗត្រូវមានក្រុមប្រឹក្សាភិបាលដែលមានសមត្ថភាពដឹកនាំច្បាស់លាស់ ឬការប្រែក្លាយជា គ្រឹះស្ថានសាធារណៈរដ្ឋបាល។ ការរៀបចំនេះ ត្រូវភ្ជាប់មកជាមួយនូវចក្ខុវិស័យ និងបេសកកម្មច្បាស់លាស់។
– សាកលវិទ្យាល័យត្រូវរៀបចំកម្មវិធីសិក្សា និងឯកសារបង្រៀនឡើងវិញឱ្យមានលក្ខណៈទំនើប ដោយផ្លាស់ប្តូរពីការបង្រៀនតាមបែបទ្រឹស្តីសុទ្ធសាធ មកជាការអប់រំផ្ដោតលើលទ្ធផល (Outcome Based Education) ដើម្បីធានាថា និស្សិតទទួលបាននូវសមត្ថភាពពិតប្រាកដ អាចយកទៅអនុវត្តបានក្នុងទីផ្សារការងារ។ ទន្ទឹមនឹងនេះ ត្រូវលើកកម្ពស់ការរៀនភាសាបរទេស និងជំនាញវិទ្យាសាស្ត្រ បច្ចេកវិទ្យា (STEM) ដើម្បីឱ្យនិស្សិតអាចសិក្សាស្រាវជ្រាវក្នុងកម្រិតសកលបាន។
– គុណភាពអប់រំ ចាប់ផ្តើមពីគុណភាពសាស្ត្រាចារ្យ។ ត្រូវបន្តពង្រឹង លើកទឹកចិត្ត និងផ្ដល់ឱកាសដល់សាស្ត្រាចារ្យឱ្យបន្តការសិក្សាថ្នាក់បណ្ឌិតឱ្យបានកាន់តែច្រើន និងជម្រុញឱ្យមានការសិក្សាស្រាវជ្រាវបែបវិទ្យាសាស្ត្រ។
– ក្នុងយុគសម័យឌីជីថល ការប្រើប្រាស់ បញ្ញាសិប្បនិម្មិត (AI) គឺជាឧបករណ៍ដ៏មានសក្ដានុពល ដែលនឹងជួយដល់អ្នកប្រើប្រាស់ ជាពិសេសសាស្រ្តាចារ្យ និងនិស្សិត ឱ្យទទួលបាននូវចំណេះដឹងទូលំទូលាយ និងបង្កើនប្រសិទ្ធភាពនៃការសិក្សា។ ហេតុនេះ គ្រឹះស្ថានសិក្សាត្រូវតែរៀបចំឱ្យមាន បន្ទប់ឌីជីថលដើម្បីផ្ដល់ឱកាសឱ្យនិស្សិតបានអនុវត្តជាក់ស្តែង ឆ្លើយតបទៅនឹងនិន្នាការការងារថ្មីៗ។
– សូមសាកលវិទ្យាល័យស្វាយរៀង ក៏ដូចជាគ្រឹះស្ថានឧត្តមសិក្សាផ្សេងទៀត រៀបចំជាអង្គសិក្ខាសាលារួមគ្នា ដើម្បីផ្លាស់ប្តូរបទពិសោធ និងមតិយោបល់លើសមិទ្ធផលនៃកំណែទម្រង់ដែលបានអនុវត្តកន្លងមក។ បន្ថែមលើកិច្ចសហការក្នុងស្រុក គ្រឹះស្ថានសិក្សាត្រូវពង្រីកវិសាលភាពទៅកាន់កម្រិតតំបន់ និងសកលលោក តាមរយៈការចងសម្ព័ន្ធភាពជាមួយសាកលវិទ្យាល័យអន្តរជាតិ ដើម្បីបង្កើតកម្មវិធីផ្លាស់ប្ដូរនិស្សិត ការធ្វើស្រាវជ្រាវរួមគ្នា និងការតម្រឹមកម្មវិធីសិក្សាឱ្យស្របតាមស្តង់ដាអន្តរជាតិ៕