ភ្នំពេញ៖ គណៈប្រតិភូរដ្ឋសភាកម្ពុជាដឹកនាំដោយ ឯកឧត្តម នឹម ច័ន្ទតារា អនុប្រធានគណៈកម្មការទី៥ នៃរដ្ឋសភា កាលពីថ្ងៃទី១ ខែកក្កដា ឆ្នាំ២០២២ បានអញ្ជើញចូលរួមក្នុងអង្គសន្និសីទ ស្តីពីបណ្តាញសភា នៃប្រទេសមិនចូលបក្សសម័្ពន្ធ ដែលជាថ្ងៃទី២ ក្នុងអង្គសន្និសីទក៏មានការចូលរួមពីសំណាក់ប្រធានសភា អនុប្រធានសភា សមាជិកសភា អគ្គលេខាធិការ និងអង្គការអន្តរជាតិ សរុបចំនួន ៤០០នាក់ នៃប្រទេសចំនួន៤១ នៅទីក្រុងបាគូ នៃប្រទេសអាស៊ែបៃហ្សង់ ។
ថ្លែងនៅក្នងអង្គសន្និសីទ ឯកឧត្តម នឹម ច័ន្ទតារា បានមានប្រសាសន៍ថា វត្តមានរបស់គណៈប្រតិភូរដ្ឋសភាកម្ពុជានៅថ្ងៃនេះគឺជាការឆ្លុះបញ្ចាំងពីគោលនយោបាយការបរទេស នៃចលនាមិនចូលបក្សសម្ព័ន្ធ ដែលទទួលមរតកពីអតីតព្រះប្រមុខរដ្ឋ សម្តេចឪ នរោត្តម សីហនុ។ ការប្តេជ្ញាចិត្ត និងទស្សនទាន របស់សម្តេចឪ ចំពោះអព្យាក្រឹតភាព គឺជាហេតុផលសម្រាប់ការចូលរួមរបស់ ប្រទេសកម្ពុជា ក្នុងនាមជាសហស្ថាបនិកចលនាមិនចូលបក្សសម្ព័ន្ធ ។ ទីមួយចលនានេះ គឺជាមរតកនយោបាយដែលកម្ពុជាតែងតែប្រកាន់ខ្ជាប់ទិដ្ឋភាព ទីពីរគឺរដ្ឋធម្មនុញ្ញ។ រដ្ឋធម្មនុញ្ញកម្ពុជាកំណត់យ៉ាងច្បាស់នូវគោលជំហរនយោបាយការបរទេសរបស់យើងថា ឯករាជ្យ សន្តិភាព អព្យាក្រឹត្យអចិន្ត្រៃយ៍ និងមិនចូលបក្សសម្ព័ន្ធ។
កម្ពុជាសូមបញ្ជាក់ឡើងវិញនូវការប្តេជ្ញាចិត្តគាំទ្រយ៉ាងមុតមាំចំពោះគោលការណ៍ទីក្រុង Bandung ដែលបានប្រកាសនៅឆ្នាំ១៩៥៥ ដែលជាការរួបរួមក្នុងសកម្មភាពដោយផ្អែកលើពហុភាគីនិយមក្នុងការស្វែងរកសន្តិភាព និងការអភិវឌ្ឍប្រកបដោយចីរភាពសម្រាប់ពិភពលោក។ យើងត្រូវតែពង្រឹងគុណតម្លៃ នៃពហុភាគីនិយម និងកិច្ចសហប្រតិបត្តិការអន្តរជាតិ។ ពហុភាគីនិយមពិតប្រាកដគឺមានន័យថាការទទួលយកភាពខុសគ្នារវាងប្រជាជាតិនានា និងបង្វែរសត្រូវទៅជាដៃគូប្រជែងដោយសន្តិវិធី និងស្មោះត្រង់។ វាជាកត្តាចាំបាច់មួយដែលយើងស្វែងរកមធ្យោបាយមួយចំនួនដើម្បីធានាថារដ្ឋសមាជិក នៃចលនាមិនចូលបក្សសម្ព័ន្ធទាំងអស់ អាចដើរលើផ្លូវមួយដើម្បីស្តារសេដ្ឋកិច្ច។
ឯកឧត្តមបន្តថា កម្ពុជាក៏ដូចសមាជិកចលនាមិនចូលបក្សសម្ព័ន្ធជាច្រើនដ៏ទៃទៀតដែរ ដែលប្រទេសកម្ពុជាបានឆ្លងកាត់ផ្លូវថ្មើរជើងក្នុងការតស៊ូទាមទារឯករាជ្យកសាងសន្តិភាព និងការកសាងប្រទេសជាតិរហូតមកដល់សព្វថ្ងៃនេះ។
ទោះបីជាកម្ពុជាមានសមត្ថភាពនៅមានកម្រិតក៏ដោយក៏ព្រះរាជាណាចក្រកម្ពុជាបានចែករំលែកបទពិសោធន៍មនុស្សធម៌របស់ខ្លួនក្នុងការកសាង និងការពារសន្តិភាពពិភពលោកក្រោមការឧបត្ថម្ភរបស់អង្គការសហប្រជាជាតិ។
ដូចនេះហើយយើងត្រូវរួមគ្នាផ្តោតលើមធ្យោបាយ និងរបៀបធ្វើការឆ្លើយតបទៅនឹងបញ្ហាប្រឈមសកលនានាតាមរយៈកិច្ចខិតខំប្រឹងប្រែងសហប្រតិបត្តិការពហុភាគី។ ពង្រឹងគុណតម្លៃ នៃពហុភាគីនិយម និងកិច្ចសហប្រតិបត្តិការអន្តរជាតិសម្រេចបានការអភិវឌ្ឍប្រកបដោយចីរភាព និងវិបុលភាពសម្រាប់មនុស្សជាតិ៕
