វ៉ាស៊ីនតោន៖ នាថ្ងៃព្រហស្បតិ៍ទី៦ ខែវិច្ឆិកា សហរដ្ឋអាម៉េរិកបានដកបម្រាមពាណិជ្ជកម្មលើវិស័យការពារជាតិជាមួយកម្ពុជា បន្ទាប់ពីប្រធានាធិបតី ដូណាល់ ត្រាំ បានព្យាយាមលើការសម្របសម្រួល និងការចូលខ្លួនធ្វើជាសាក្សីលើពិធីចុះហត្ថលេខាក្នុងកិច្ចព្រមព្រៀងសន្តិភាពរវាងកម្ពុជា-ថៃ។
ការបើកភ្លើងខៀវពីអាម៉េរិកនេះ គាប់ជួនកម្ពុជាសម្រេចអនុម័តសេចក្តីព្រាងច្បាប់ស្តីពីថវិកាជាតិឆ្នាំ២០២៦ ជាមួយនឹងការចំណាយថវិកា ដល់ទៅប្រមាណ១០ពាន់លានដុល្លារ លើការពង្រឹងកំពែងការពារជាតិ ដើម្បីការពារអធិបតេយ្យភាព និងបូរណភាពទឹកដី។
យ៉ាងណា យោងតាមសេចក្តីជូនដំណឹងមួយ ដោយការមើលឃើញអំពីកិច្ចខិតខំប្រឹងប្រែងស្វែងរកសន្តិភាព និងសន្តិសុខរបស់កម្ពុជា រួមទាំងការចូលរួមជាថ្មីជាមួយសហរដ្ឋអាម៉េរិកលើកិច្ចសហប្រតិបត្តិការការពារជាតិ និងការប្រយុទ្ធប្រឆាំងនឹងឧក្រិដ្ឋកម្មឆ្លងដែន រដ្ឋមន្រ្តីក្រសួងការបរទេសអាម៉េរិក លោក ម៉ាកូ រ៉ូប៊ីអូ បានដកការរឹតបន្តឹង និងបម្រាមចេញពីកម្ពុជា។
របាយការណ៍បន្ថែមថា ការលក់សព្វាវុធឥឡូវនេះ នឹងត្រូវបានអនុញ្ញាតតាមករណីនីមួយៗ។ ទោះយ៉ាងណា មិន ច្បាស់ ទេ ថា តើ កង្វល់ របស់ អាម៉េរិក លើ ឥទ្ធិពល យោធា របស់ ចិន នៅ កម្ពុជា ត្រូវ បាន ដោះ ស្រាយ ឬ អត់.?
គួរជម្រាបថា ការបន្ទន់ឥរិយាបងថរបស់អាម៉េរិកមកកម្ពុជា ធ្វើឡើងបន្ទាប់ពីរដ្ឋមន្ត្រីក្រសួងការពារជាតិអាម៉េរិក លោក ភីត ហេកសិត ជួបជាមួយរដ្ឋមន្ត្រីក្រសួងការពារជាតិកម្ពុជា ឯកឧត្ដម ទៀ សីហា នៅប្រទេសម៉ាឡេស៊ី ខណៈភាគីទាំង២ ថែមទាំងបានយល់ព្រមចាប់ផ្តើមធ្វើសមយុទ្ធឆ្មាំអង្គរ (ANGKOR SENTINEL)»ដូចមុនថែមទៀតផង៕
