លោក ដូណាល់ ត្រាំ មិនទាន់ពិចារណាលើកិច្ចព្រមព្រៀង ដែលអនុញ្ញាតឱ្យអ៊ុយក្រែនទទួលបានមីស៊ីលវាយប្រហាររយៈចម្ងាយឆ្ងាយ Tomahawk សម្រាប់ប្រើប្រាស់ប្រឆាំងនឹងរុស្ស៊ីនោះទេ
បរទេស៖ លោក ដូណាល់ ត្រាំ ប្រធានាធិបតីអាម៉េរិក បានអះអាងថ្ងៃអាទិត្យទី២វិច្ឆិកាថា សម្រាប់ពេលនេះ លោកមិនទាន់ពិចារណាលើកិច្ចព្រមព្រៀង ដែលអនុញ្ញាតឱ្យអ៊ុយក្រែនទទួលបានមីស៊ីលវាយប្រហាររយៈចម្ងាយឆ្ងាយ Tomahawk សម្រាប់ប្រើប្រាស់ប្រឆាំងនឹងរុស្ស៊ីនោះទេ។
លោក ត្រាំ មិនពេញចិត្តចំពោះផែនការលក់មីស៊ីល Tomahawks ទៅឱ្យសមាជិកណាតូ ដែលនឹងផ្ទេរមីស៊ីលទាំងនោះទៅកាន់អ៊ុយក្រែន ខណៈមេដឹកនាំអាម៉រិករូបនេះ មិនចង់ធ្វើឱ្យភ្លើងសង្គ្រាមកាន់តែឆាបឆេះសន្ធោសសន្ធៅ។
នៅពេលសួរថា តើលោកកំពុងពិចារណាលើកិច្ចព្រមព្រៀងលក់មីស៊ីលឬក៏អត់? ។ ភ្លាមៗ លោក ត្រាំ បានឆ្លើយប្រាប់អ្នកយកព័ត៌មានថា ៖«ទេ! វាមិនពិតទេ..!»។ យ៉ាង ណា ក៏ ដោយ លោកត្រាំ បន្ថែម ថា លោក អាច ប្តូរ ចិត្ត បានទៅតាមកាលៈទេសៈជាក់ស្តែង។
គេនៅចាំបានថា ជំនួបជួបគ្នានៅសេតវិមានកាលពីថ្ងៃទី២២ ខែតុលា លោក ត្រាំ និងអគ្គលេខាធិការអង្គការណាតូ លោក ម៉ាក រូត (Mark Rutte) ក៏បានពិភាក្សាអំពីផែនការមីស៊ីល Tomahawk ផងដែរ។ ជាមួយគ្នានេះ លោក រូត បានលើកឡើងថា បញ្ហាកំពុងស្ថិតក្រោមការត្រួតពិនិត្យ ហើយវាអាស្រ័យលើសហរដ្ឋអាម៉េរិកក្នុងការសម្រេចចិត្តមួយនេះ៕
