រដ្ឋបាលរាជធានីភ្នំពេញ រៀបចំវគ្គបណ្តុះបណ្តាលអំពីការវាយតម្លៃកម្រិតសុវត្ថិភាពចរាចរណ៍ តំបន់សាលារៀន ក្នុងបំណងផ្តល់ចំណេះដឹងដល់មន្ត្រី និងអ្នកអនុវត្តគម្រោងនានា ពាក់ព័ន្ធដល់សុវត្ថិភាពសិស្សនៅតាមសាលារៀន

ភ្នំពេញ៖ នៅថ្ងៃទី៣០ ខែតុលា ឆ្នាំ២០២៥នេះ រដ្ឋបាលរាជធានីភ្នំពេញ ក្រោមជំនួយឧបត្ថម្ភពីអង្គការ Vital Strategies នៃបណ្តាញដៃគូ ដើម្បីសុខុមាលភាពទីក្រុង បានរៀបចំវគ្គបណ្តុះបណ្តាល អំពីការវាយតម្លៃកម្រិតសុវត្ថិភាពចរាចរណ៍ តំបន់សាលារៀន ក្នុងបំណងផ្តល់ចំណេះដឹងដល់មន្ត្រី និងអ្នកអនុវត្តគម្រោងនានា ពាក់ពន្ធដល់សុវត្ថិភាពសិស្សនៅតាមសាលារៀន ប្រើប្រាស់បច្ចេកទេសធ្វើការវាយតម្លៃអំពីកម្រិតសុវត្ថិភាពចរាចរណ៍ តំបន់សាលារៀន និងមានអំណះអំណាងច្បាស់លាស់ តាមបែបវិទ្យាសាស្ត្រ ក្នុងការកែលំអរសំដៅលើកកម្ពស់កម្រិតសុវត្ថិភាពឲ្យកាន់តែល្អប្រសើរថែមទៀត ខណៈរាជធានីភ្នំពេញនៅតែជាចំណុចប្រឈមទៅនឹងហេតុការណ៍គ្រោះថ្នាក់ចរាចរនោះ។

វគ្គបណ្តុះបណ្តាលនេះ ធ្វើឡើងមួយថ្ងៃពេញ ក្រោមវត្តមានលោក ពេញ ធារម្យ អភិបាលរង តំណាងឯកឧត្ដម ឃួង ស្រេង អភិបាលរាជធានីភ្នំពេញ និងលោក ហ្វាហាដ អាលី (Farhad Ali) នាយករងប្រចាំតំបន់អាស៊ីប៉ាស៊ីហ្វិក នៃបណ្តាញដៃគូដើម្បីសុខមាលភាពទីក្រុង (Partnership for Healthy Cities) នៅសាលារាជធានីភ្នំពេញ។

លោក ហ្វាហាដ អាលី បានលើកឡើងថា វគ្គបណ្តុះបណ្តាលនេះធ្វើឡើង ដើម្បីដាក់គោលដៅពង្រឹង សន្តិសុខ សុវត្តិភាព ជូនកុមារ វាយតម្លៃ និងសិក្សាកែលំអរ នៅតំបន់ជុំវិញសាលា ជាមួយនិងការគូសគំនូសចរាចរណ៍ ជៀសវាងកុំឲ្យមានគ្រោះថ្នាក់ចរាចរណ៍ដល់កុមារ។

លោកបានបញ្ជាក់ថា ក្រោយពីគម្រោងសុវត្ថិភាពចរាចរណ៍តំបន់សាលារៀនសាកល្បងនេះ ត្រូវបានបញ្ចប់ វានឹងក្លាយជាគំរូមួយយកទៅអនុវត្តទៅតាមទីតាំងសាលារៀនផ្សេងទៀត ដើម្បីសុវត្ថិភាពកុមារ។

លោកបានរំពឹងទុកថា ក្រោយវគ្គបណ្តុះបណ្តាលនេះ អ្នកចូលរួមទាំងអស់ នឹងបានយល់ដឹងពីវត្ថុបំណងនៃគម្រោង និងឈានទៅដល់ការជួយកុមារកុំឲ្យមានគ្រោះថ្នាក់ចរាចរណ៍។

លោក ពេញ ធារម្យ បានបញ្ជាក់ថា វគ្គបណ្តុះបណ្តាលនេះ ជាគម្រោងថ្មីមួយទៀត របស់រដ្ឋបាលរាជធានីភ្នំពេញ ក្រោមជំនួយឧបត្ថម្ភពីអង្គការ Vital Strategies នៃបណ្តាញដៃគូដើម្បីសុខុមាលភាពទីក្រុង។

លោកអភិបាលរងរាជធានី បានបន្តថា គ្រោះថ្នាក់ចរាចរណ៍បានក្លាយទៅជាបញ្ហាដ៏គួរបារម្ភដោយបង្កឲ្យមានអ្នកស្លាប់ និងរបួស ព្រមទាំងការបាត់បង់នូវទ្រព្យសម្បត្តិរដ្ឋ និងឯកជនជា រឿងរាល់ថ្ងៃ។ សោកនាដកម្មនេះ មិនត្រឹមតែបានបន្សល់ទុកនូវផលវិបាក ជាច្រើនចំពោះគ្រួសារជនរងគ្រោះប៉ុណ្ណោះទេ ថែមទាំងក្លាយជាបន្ទុកដ៏ធ្ងន់ ចំពោះសង្គមជាតិថែមទៀតផង។

ដើម្បីឆ្លើយតបទៅនឹងបញ្ហាប្រឈមនៃវិបត្តិដែលបានលើកឡើងខាងលើនេះ រដ្ឋបាលរាជធានីភ្នំពេញ តាមរយៈអនុគណៈកម្មាធិការជាតិសុវត្ថិភាពចរាចរណ៍ផ្លូវគោករាជធានី បានដាក់ចេញនូវវិធានការនានាជាច្រើន ក្នុងបំណងបង្ការគ្រោះថ្នាក់ចរាចរណ៍ដែលបង្កររបួសស្នាម និងអាយុជីវិតអ្នកធ្វើដំណើរទូទៅ ជាពិសេសចំពោះកុមារ ដែលជាសរសរទ្រូងរបស់ប្រទេសជាតិរបស់យើង។ កិច្ចខិតខំប្រឹងប្រែងទាំងអស់នោះ គឺស្របតាមផែនការជាតិ ទស្សវត្សរ៍សុវត្ថិភាពចរាចរណ៍ឆ្នាំ២០២១-២០៣០ ដែលកម្ពុជាបានប្តេជ្ញាកាត់បន្ថយចំនួនអ្នកស្លាប់ឲ្យបាន៥០%ត្រឹម ឆ្នាំ២០៣០ខាងមុខ។

លោកបានបញ្ជាក់ថា បើទោះបីជាមានកិច្ចខិតខំដោះស្រាយបញ្ហាចរាចរណ៍យ៉ាងណាក៏ដោយ ក៏រាជធានីភ្នំពេញនៅតែឈរ នៅលំដាប់ទី១ ចរាចរណ៍ប្រចាំឆ្នាំដែរ។

យោងតាមរបាយការណ៍ជនរងគ្រោះ និងគ្រោះថ្នាក់ ដែលមានអ្នកស្លាប់បាត់បង់ជីវិតដោយសារគ្រោះថ្នាក់ ចរាចរណ៍ផ្លូវគោកឆ្នាំ២០២៣ បង្ហាញថា ក្នុងទូទាំងប្រទេសមានគ្រោះថ្នាក់ ចរាចរណ៍កើតឡើង ៣,០៣៩ករណី មានជនរងគ្រោះសរុប១០,៩៤០នាក់ និងមានអ្នកបាត់បង់ជីវិតចំនួន១៦២២នាក់ ក្នុងនោះ នៅរាជធានីភ្នំពេញ មានអ្នកស្លាប់៣០៤នាក់ ពោលគឺប្រមាណជា១ភាគ៥ នៃចំនួនអ្នកស្លាប់សរុបប្រចាំឆ្នាំ ហើយក្នុងចំណោមអ្នករងគ្រោះថ្នាក់ចរាចរណ៍ដល់ជីវិតទូទាំងប្រទេសនេះ មានកុមារអាយុចន្លោះ ពី៥ ដល់១៩ឆ្នាំ សរុបចំនួន៣២៥នាក់ និងសិស្ស ចំនួន២២១នាក់។ ចំនួននេះបង្ហាញពីអត្រាខ្ពស់មួយ ដែលយើងចាំបាច់ត្រូវរកវិធី ដោះស្រាយជាទាំងអស់គ្នា៕