ហ៊្សេរុយសាឡិម៖ បើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃព្រហស្បតិ៍ ទី៤ ខែកញ្ញា ឆ្នាំ២០២៥ នាយករដ្ឋមន្រ្តីអ៉ីស្រាអែល លោក Benjamin Netanyahu បានហៅនាយករដ្ឋមន្រ្តីបែលហ្ស៉ិក លោក Bart De Wever ថាជាមេដឹកនាំទន់ខ្សោយ និងថ្កោលទោសការសម្រេចចិត្តរបស់លោក ក្នុងការទទួលស្គាល់ប៉ាឡេស្ទីនថាជារដ្ឋមួយ។
ការិល័យលោក Netanyahu បានបង្ហោះសារមួយតាមបណ្តាញសង្គម X ដូច្នេះថា «លោកនាយករដ្ឋមន្រ្តីបែលហ្ស៉ិក Bart De Wever គឺជាមេដឹកនាំទន់ខ្សោយម្នាក់ ដែលស្វែងរកការកាត់បន្ថយអំពើភេរវកម្ម ដោយមិនខ្វល់ពីការលះបង់របស់អ៉ីស្រាអែល។ គាត់ (Bart De Wever) ចង់ចិញ្ចឹមក្រពើភេរវករ មុនពេលវាលេបត្របាក់បែលហ្ស៊ិក»។
ថ្មី២នេះ បែលហ្ស៊ិក បានក្លាយជាប្រទេសលោកខាងលិចចុងក្រោយគេ ដែលនិយាយថា ខ្លួននឹងទទួលស្គាល់រដ្ឋប៉ាឡេស្ទីន នៅឯមហាសន្និបាតអង្គការសហប្រជាជាតិក្នុងខែនេះ ស្រដៀងនឹងអូស្ត្រាលី កាណាដា និងបារាំងដែរ៕
