ឯកឧត្តម សួស ប្រាថ្នា ដឹកនាំកិច្ចប្រជុំពិគ្រោះយោបល់លើសេចក្តីព្រាងរបាយការណ៍ស្ដីពីលទ្ធផលបឋមលើការសិក្សាវាយតម្លៃលើប្រសិទ្ធភាពនៃដំណើរការរៀបចំ និងការអនុវត្តផែនការអភិវឌ្ឍន៍រយៈពេលប្រាំឆ្នាំ និងកម្មវិធីវិនិយោគបីឆ្នាំរំកិលរបស់ រដ្ឋបាលថ្នាក់ក្រោមជាតិ

ភ្នំពេញ៖ នៅព្រឹកថ្ងៃទី៤ ខែសីហា ឆ្នាំ២០២៥នេះ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ បានអញ្ជើញជាធិបតីដឹកនាំកិច្ចប្រជុំពិគ្រោះយោបល់លើសេចក្តីព្រាងរបាយការណ៍ស្ដីពីលទ្ធផលបឋមលើការសិក្សាវាយតម្លៃលើប្រសិទ្ធភាពនៃដំណើរការរៀបចំ និងការអនុវត្តផែនការអភិវឌ្ឍន៍រយៈពេលប្រាំឆ្នាំ និងកម្មវិធីវិនិយោគបីឆ្នាំរំកិលរបស់រដ្ឋបាលថ្នាក់ក្រោមជាតិ ដោយមានការចូលរួមពីអគ្គនាយករង ប្រធាន អនុប្រធាននាយកដ្ឋានចំណុះអគ្គនាយកដ្ឋានរដ្ឋបាល និងសាលាជាតិរដ្ឋបាលមូលដ្ឋាន ក្រសួងមហាផ្ទៃ និងតំណាងក្រសួងផែនការ ក្រសួងសេដ្ឋកិច្ចនិងហិរញ្ញវត្ថុ លេខាធិការដ្ឋាន គ.ជ.អ.ប. រដ្ឋបាលរាជធានីភ្នំពេញ រដ្ឋបាលខេត្តកំពត និងតំណាងអង្គការសង្គមស៊ីវិលដែលធ្វើការទៅលើ ផែនការអភិវឌ្ឍន៍រយៈពេលប្រាំឆ្នាំ និងកម្មវិធីវិនិយោគបីឆ្នាំរំកិលរបស់រដ្ឋបាលថ្នាក់ក្រោមជាតិ ព្រមទាំងមន្រ្តីពាក់ព័ន្ធប្រមាណ៤៥រូប។

មុននឹងចាប់ផ្ដើមកិច្ចប្រជុំខាងលើ ឯកឧត្តម សួស ប្រាថ្នា បានដឹកនាំអង្គប្រជុំធ្វើកិច្ចគោរពដល់វិញ្ញាណក្ខន្ធរបស់វីរកងទ័ពកម្ពុជា ដែលបានពលីជីវិតក្នុងបុព្វហេតុការពារអធិបតេយ្យនិងបូរណភាពទឹកដីនៃព្រះរាជាណាចក្រកម្ពុជា ដែលបង្កឡើងពីការឈ្លានពានរបស់កងទ័ពថៃ។

ជាកិច្ចចាប់ផ្ដើម ឯកឧត្តមអគ្គនាយក បានថ្លែងស្វាគមន៍យ៉ាងកក់ក្ដៅចំពោះវត្តមានលោក លោកស្រី ពីតំណាងក្រសួង ស្ថាប័ន រដ្ឋបាលរាជធានី ខេត្ត អង្គការសង្គមស៊ីវិល ដែលបានឆ្លៀតពេលដ៏មមាញឹកចូលរួមក្នុងកិច្ចប្រជុំដ៏មានសារៈសំខាន់នេះ។ ក្នុងនាមថ្នាក់ដឹកនាំក្រសួងមហាផ្ទៃ និងក្នុងនាមឯកឧត្តមផ្ទាល់ ឯកឧត្តមបានវាយតម្លៃខ្ពស់ចំពោះក្រុមការងារនៃនាយកដ្ឋានកិច្ចការរដ្ឋបាលក្រុង ស្រុក ឃុំ សង្កាត់ ដែលបានសហការយ៉ាងជិតស្និទ្ធជាមួយអង្គការយូនីសេហ្វ ដើម្បីសម្របសម្រួលធ្វើឱ្យសម្រេចបាននូវលទ្ធផលបឋមនេះ ហើយបានសូមថ្លែងអំណរគុណយ៉ាងជ្រាលជ្រៅចំពោះអង្គការយូនីសេហ្វ ដែលតែងតែជួយគាំទ្រដល់រាជរដ្ឋាភិបាល និងក្រសួងមហាផ្ទៃ ក្នុងការលើកកម្ពស់អភិបាលកិច្ចល្អនៅរដ្ឋបាលថ្នាក់ក្រោមជាតិ។

ឆ្លៀតក្នុងឱកាសនេះ ឯកឧត្តមប្រធានអង្គប្រជុំ បានរំលេចនូវគោលបំណងសំខាន់នៃកិច្ចប្រជុំនេះ គឺដើម្បីពិនិត្យ និងពិគ្រោះយោបល់លើសេចក្តីព្រាងរបាយការណ៍ស្ដីពីលទ្ធផលបឋមនៃការសិក្សាវាយតម្លៃលើប្រសិទ្ធភាពនៃដំណើរការៀបចំ និងអនុវត្តផែនការអភិវឌ្ឍន៍រយៈពេលប្រាំឆ្នាំ និងកម្មវិធីវិនិយោគបីឆ្នាំរំកិលរបស់រដ្ឋបាលថ្នាក់ក្រោមជាតិ ដើម្បីឱ្យរបាយការណ៍នេះមានលក្ខណៈគ្រប់ជ្រុងជ្រោយ និងអាចប្រើប្រាស់ ជាមូលដ្ឋានក្នុងការកែសម្រួលការរៀបចំ និងការអនុវត្តផែនការអភិវឌ្ឍន៍រយៈពេលប្រាំឆ្នាំ និង កម្មវិធីវិនិយោគបីឆ្នាំរំកិលរបស់រដ្ឋបាលថ្នាក់ក្រោមជាតិឱ្យកាន់តែមានភាពរលូន មានប្រសិទ្ធភាព និងឆ្លើយតបទៅនឹងតម្រូវការនៃការអភិវឌ្ឍនៅថ្នាក់ក្រោមជាតិនីមួយៗ។

សូមជម្រាបជូនដែរថា កិច្ចប្រជុំខាងលើបានប្រព្រឹត្តទៅតាមរបៀបវារៈ និងកម្មវិធីសំខាន់ៗរួមមាន៖
១. ការធ្វើបទបង្ហាញអំពីរបាយការណ៍ស្ដីពីលទ្ធផលបឋមលើការសិក្សាវាយតម្លៃលើប្រសិទ្ធភាពនៃដំណើរការរៀបចំ និងការអនុវត្តផែនការអភិវឌ្ឍន៍រយៈពេលប្រាំឆ្នាំ និងកម្មវិធីវិនិយោគបីឆ្នាំរំកិលរបស់ រដ្ឋបាលថ្នាក់ក្រោមជាតិ
២. កិច្ចពិភាក្សា និងការផ្ដល់ធាតុចូលនិងអនុសាសន៍ពីអ្នកពាក់ព័ន្ធទៅលើរបាយការណ៍លទ្ធផលបឋមខាងលើ
៣. ការបូកសរុបលទ្ធផលកិច្ចប្រជុំ និងមតិបិទកិច្ចប្រជុំរបស់ឯកឧត្តមអគ្គនាយកនៃអគ្គនាយកដ្ឋានរដ្ឋបាល។