លោកឧត្តមសេនីយ៍ទោ ម៉ែន លី ដឹកនាំកិច្ចប្រជុំបូកសរុបសភាពការណ៍ប្រចាំឆមាសទី១ និងលើកទិសដៅការងារបន្តឆមាសទី២ ឆ្នាំ២០២៥
តាកែវ៖ នារសៀលថ្ងៃចន្ទ ទី២១ ខែកក្កដា ឆ្នាំ២០២៥ នៅសាលប្រជុំស្នងការដ្ឋាននគរបាលខេត្ត បានរៀបចំកិច្ចប្រជុំបូកសរុបសភាពការណ៍ប្រចាំឆមាសទី១ ក្នុងខែកក្កដា និងលើកទិសដៅការងារបន្តឆមាសទី២ ឆ្នាំ២០២៥។
ក្រោមអធិបតីភាពដ៏ខ្ពង់ខ្ពស់លោកឧត្តមសេនីយ៍ទោ ម៉ែន លី ស្នងការ នៃស្នងការដ្ឋាននគរបាលខេត្តតាកែវ ដោយមានការចូលរួមពីលោក លោកស្រី ឧត្តមសេនីយ៍ វរសេនីយ៍ ស្នងការរង លោកនាយ នាយរងការិយាល័យជំនាញទាំង៣២ លោកមេបញ្ជាការ មេបញ្ជាការរងវរសេនាតូចនគរបាលការពារព្រំដែនគោកលេខ៦០៣ លោកអធិការ អធិការរងទទួលផែនការងារ ព្រហ្មទណ្ឌ សន្តិសុខ សណ្តាប់ធ្នាប់ អត្តសញ្ញាណប័ណ្ណ និងគ្រឿងញៀនក្រុង-ស្រុកទាំង១០ លោកនាយប៉ុស្តិ៍នគរបាលច្រកទ្វារទ្វេភាគីកំពង់ក្រសាំង និងលោកនាយប៉ុស្តិ៍នគរបាលរដ្ឋបាលឃុំ-សង្កាត់ទាំង១០០ប៉ុស្តិ៍ និងមន្ត្រីពាក់ព័ន្ធជាច្រើនរូប។ ជាកិច្ចចាប់ផ្តើមលោកវរសេនីយ៍ឯក សុខ ស៊ុយ នាយការិយាល័យសរុបផែនការ ឡើងអានរបាយការណ៍ស្វាគមន៍សង្ខេបប្រចាំឆមាសទី១ និងលើកទិសដៅបន្តឆមាសទី ឆ្នាំ២០២៥។ បន្តមកលោកឧត្តមសេនីយ៍ត្រី សៅ សារុន ស្នងការរង ផែនការងារសេនាធិការ អានសេចក្តីណែនាំរបស់អគ្គស្នងការដ្ឋាននគរបាលជាតិចំនួន ៣ សេចក្តីណែនាំផ្សេងគ្នាជូនអង្គពិធីជ្រាប។
មានប្រសាសន៍ថ្លែងបូកសរុបណែនាំផ្តាំផ្ញើក្នុងឱកាសនោះលោកឧត្តមសេនីយ៍ទោ ស្នងការចំនួន ១០ចំណុចដូចខាងក្រោម៖
១- ពង្រឹងការងារសន្តិសុខ សណ្តាប់ធ្នាប់សាធារណៈ សុវត្ថិភាពសង្គម ដើម្បីភូមិ ឃុំ សង្កាត់មានសុវត្ថិភាព។
២- រៀបចំផែនការយុទ្ធសាស្រ្តឱ្យមន្រ្តីនគរបាលក្រោមឱវាទយកទៅអនុវត្តឱ្យមានប្រសិទ្ធភាពស្របតាមគោលនយោបាយរបស់រាជរដ្ឋាភិបាលអាណត្តទី៧(ភូមិ-ឃុំ-សង្កាត់មានសុវត្ថិភាព)ព្រមទាំងលុបបំបាត់បញ្ហាក្មេងទំនើង គ្រឿងញៀន ចោរលួចឆក់ប្លន់ ល្បែងស៊ីសងខុសច្បាប់គ្រប់ប្រភេទ។
៣- ពង្រឹងបទវិន័យកងកម្លាំងនគរបាលជាតិ និងប្រមូលផ្តុំកម្លាំងប្រចាំការនៅហ្នឹងកន្លែងរងចាំទទួលបទបញ្ជាថ្នាក់ដឹកនាំ។
៤- បន្តការបើកវគ្គបណ្តុះបណ្តាលខ្លីដល់មន្រ្តីនគរបាលជាតិ នៃស្នងការដ្ឋាននគរបាលខេត្ត។
៥- បន្តចុះត្រួតពិនិត្យឆែកឆេអាវុធគ្រឿងផ្ទុះនៅពេលយប់ក្នុងភូមិសាស្រ្តទទួលខុសត្រូវ និងការចុះផ្តល់សេវាសាធារណៈជូនបងប្អូនប្រជាពលរដ្ឋឱ្យបានទាន់ពេលវេលា។
៦- បង្កើនការចេញល្បាតចល័តពួនស្ទាក់តាមតំបន់ងាយរងគ្រោះ និងត្រៀមកម្លាំងនគរបាលនៅប៉ុស្តិ៍សេវាប្រចាំការ២៤ម៉ោង លើ២៤ម៉ោងសម្រាប់ទទួលព័ត៌មានទាន់ហេតុការណ៍ និងសំណូមពរផ្សេងៗ។
៧-ជំរុញការចុះផ្សព្វផ្សាយតាមវេទិការសាធារណៈ អំពីផលប៉ះពាល់ នៃគ្រឿងញៀន ក្មេងទំនើង ចោរលួច ឆក់ប្លន់ ល្បែងស៊ីសងគ្រប់ប្រភេទ។
៨- ពង្រឹងការគ្រប់គ្រងមុខសញ្ញាចាស់ថ្មីទាំងមានដីការ គ្មានដីការទើបចេញពីពន្ធនាគារទៅរស់នៅមូលដ្ឋានវិញ។
៩- បន្តការចុះអនុវត្តរឺតបន្តឹងច្បាប់ចរាចរណ៍ផ្លូវគោកតាមអនុក្រឹត្យលេខ៣៩.អនក្រ.ចុះថ្ងៃទី១៧ ខែមិថុនា ឆ្នាំ២០២០។
១០- បង្កើតក្រុមការងាររបស់ស្នងការដ្ឋាននគរបាលខេត្តចុះជួយគាំទ្រតាមបណ្តាអធិការដ្ឋាននគរបាលស្រុក ក្រុង ដើម្បីធានាប្រសិទ្ធភាពការងារ៕
