ប៉េកាំងបានថ្កោលទោសលោក ដូណាល់ ត្រាំ ដែលបានដកហូតសិទ្ធិរបស់សាកលវិទ្យាល័យហាវើដ ក្នុងការចុះឈ្មោះទទួលសិស្សនិស្សិតបរទេសដែលភាគច្រើនមកពីប្រទេសចិន
បរទេស៖ របបប៉េកាំងកាលពីថ្ងៃសុក្រទី២៣ ខែឧសភាបានថ្កោលទោសរដ្ឋបាល ដូណាល់ ត្រាំ ដែលបានដកហូតសិទ្ធិរបស់សាកលវិទ្យាល័យហាវើដ (Harvard) ក្នុងការចុះឈ្មោះទទួលសិស្សនិស្សិតបរទេស ដែលភាគច្រើនមកពីប្រទេសចិន។
អ្នកនាំពាក្យក្រសួងការបរទេសចិន លោកស្រី ម៉ៅ នីង បានអះអាងនៅក្នុងសន្និសីទសារព័ត៌មានថា ៖«ភាគីចិនបានប្រឆាំងជារឿយៗចំពោះការយកការអប់រំធ្វើនយោបាយ។ សកម្មភាពពាក់ព័ន្ធរបស់ភាគីអាម៉េរិកនឹងប៉ះពាល់មុខមាត់ និងជំហរជាអន្តរជាតិរបស់អាម៉េរិក»។ ប្រតិកម្មខ្លាំងៗពីសំណាក់មហាយក្សចិននេះកើតឡើងដោយសារបទបញ្ជារបស់រដ្ឋបាល ត្រាំ នឹងតម្រូវឱ្យនិស្សិតបរទេសនៃសាកលវិទ្យាល័យហាវើដបច្ចុប្បន្នផ្ទេរទៅសិក្សាសាលារៀនផ្សេងទៀត ឬបាត់បង់ឋានៈជានិស្សិតស្របច្បាប់របស់ពួកគេ។
ការណ៍នេះ កើតឡើងស្របពេលដែលរដ្ឋធានីវ៉ាស៊ីនតោន កំពុងផ្តោតលើការបង្ក្រាប និងស៊ើបអង្កេតយ៉ាងតឹងរឹងទៅលើមហាវិទ្យាល័យផ្សេងទៀតផងដែរ។
រដ្ឋមន្ត្រីក្រសួងសន្តិសុខមាតុភូមិអាម៉េរិក លោកស្រី គ្រីស្ទី នឿម បានបញ្ជាឱ្យក្រសួងអប់រំបញ្ចប់ការបញ្ជាក់លទ្ធផលសិក្សារបស់និស្សិត និងកម្មវិធីផ្លាស់ប្ដូរនិស្សិតរបស់សាកលវិទ្យាល័យហាវើដ ដែលត្រូវចូលជាធរមានសម្រាប់ឆ្នាំសិក្សាថ្មី ២០២៥-២០២៦។ លើសពីនេះ លោកស្រី នឿម បានចោទប្រកាន់សាកលវិទ្យាល័យដ៏ល្បីនេះថា កំពុងជំរុញឱ្យមានអំពើហិង្សា បង្កើតឱ្យមានពួកប្រឆាំងនិយម និងការចូលដៃចូលជើងជាមួយបក្សកុម្មុយនីស្ដចិន។
សាកលវិទ្យាល័យដ៏កំពូលហាវើដ បានចាត់ទុកសកម្មភាពរបស់រដ្ឋបាល ត្រាំ ថាជាទង្វើខុសច្បាប់ និងធ្វើឱ្យប៉ះពាល់យ៉ាងធ្ងន់ធ្ងរដល់បេសកកម្មសិក្សា និងកិច្ចការស្រាវជ្រាវរបស់សាកលវិទ្យាល័យ ហើយសាកលវិទ្យាល័យនៅតែប្តេជ្ញាចិត្តទាំងស្រុងក្នុងការអប់រំនិស្សិតបរទេស។ គួរបញ្ជាក់ថា សាកលវិទ្យាល័យហាវើដបានចុះឈ្មោះទទួលនិស្សិតអន្តរជាតិជិត ៦៩០០នាក់ក្នុងឆ្នាំសិក្សា២០២៤-២០២៥ ដែលស្មើនឹង២៧ភាគរយនៃការចុះឈ្មោះចូលរៀនសរុប ហើយក្នុងនោះមាននិស្សិតមកពីប្រទេសចិន ៥ភាគរយ។ នេះបើយោងតាមស្ថិតិរបស់សាកលវិទ្យាល័យ។ ចំនួននិស្សិតអន្តរជាតិចិននៅសហរដ្ឋអាម៉េរិកបានធ្លាក់ចុះពី៣៧០ ០០០នាក់ក្នុងឆ្នាំ ២០១៩ មកនៅត្រឹមប្រហែល២៧៧ ០០០ នាក់ក្នុងឆ្នាំ ២០២៤៕
