ប្រមុខការពារជាតិអាម៉េរិក ចែករំលែកព័ត៌មានស្ដីពីការវាយប្រហារតាមអាកាសរបស់អាម៉េរិកលើប្រទេសយេម៉ែនពេលខាងមុខ

វ៉ាស៊ីនតោន៖ រដ្ឋមន្ត្រីការពារជាតិសហរដ្ឋអាម៉េរិក លោក ភេត ហេកសិត បានចែករំលែកព័ត៌មានដ៏រសើបស្ដីពីការវាយប្រហារតាមអាកាសរបស់សហរដ្ឋអាម៉េរិកលើប្រទេសយេម៉ែនពេលខាងមុខ នៅក្នុងក្រុមផ្ញើសារលើបណ្តាញសង្គម Signal ដោយក្នុងនោះរួមមានទាំងប្រពន្ធ បងប្រុស និងមេធាវីផ្ទាល់ខ្លួនរបស់លោក។ នេះបើតាមការរាយការណ៍របស់កាសែត New York Times កាលពីថ្ងៃអាទិត្យទី២០ ខែមេសា។

នេះគឺជាលើកទី២ហើយដែលប្រមុខការពារជាតិអាម៉េរិកត្រូវបានចោទប្រកាន់ពីបទចែករំលែកព័ត៌មានយោធាដ៏រសើបនៅលើកម្មវិធីផ្ញើសារជាមួយបុគ្គលិក និងបុគ្គលផ្សេងទៀតផ្តេសផ្តាស ដោយគ្មានការអនុញ្ញាត។ គេនៅចាំបានថា កាលពីខែមុន ទស្សនាវដ្ដី The Atlantic បានលាតត្រដាងថា មន្ត្រីនានារួមទាំងលោក ហេកសិត និងទីប្រឹក្សាសន្តិសុខជាតិលោក ម៉ាយ វ៉ាល់ (Mike Waltz) បានពិភាក្សាអំពីការវាយប្រហារដែលនឹងអាចកើតឡើងនៅថ្ងៃទី១៥ ខែមីនា។ ការលាតត្រដាងបែបនេះបានបង្កឱ្យមានភាពចលាចលជាខ្លាំង ដោយរដ្ឋបាលរបស់ប្រធានាធិបតីអាម៉េរិក លោក ដូណាល់ ត្រាំ ប្រឈមមុខនឹងរឿងអាស្រូវជុំវិញការលេចធ្លាយព័ត៌មានដោយចៃដន្យ។

កាលពីថ្ងៃអាទិត្យទី២០ ខែមេសា កាសែត New York Times បានរាយការណ៍ថា លោក ហេកសិត បានចែករំលែកព័ត៌មានស្ដីពីផែនការវាយប្រហារថ្ងៃទី១៥ ខែមីនាដូចគ្នា នៅក្នុងក្រុមផ្ញើសារលើបណ្តាញសង្គម Signal ជាលើកទី២។ កាសែតបានដដែលនេះរាយការណ៍ថា ព័ត៌មានដែលបានចែករំលែករួមបញ្ចូលទាំងកាលវិភាគហោះហើរសម្រាប់យន្តហោះចម្បាំង F/A-18 Hornets ផ្តោតទៅលើការវាយសង្គ្រុបលើក្រុមឧទ្ទាមហ៊ូធី ក្នុងប្រទេសយេម៉ែន។

កាសែត New York Times បានរាយការណ៍ដោយដកស្រង់ប្រភពមិនបញ្ចេញឈ្មោះថា នៅក្នុងក្រុមផ្ញើសារលើបណ្តាញសង្គម Signal រួមមានទាំងប្រពន្ធ និងបងប្រុសរបស់លោក និងមនុស្សរាប់សិបនាក់ផ្សេងទៀតដែលស្និទ្ធិស្នាលនឹងលោក ហេកសិត។

ភរិយារបស់លោក ហេកសិត មានឈ្មោះថា ជេនីហ្វើរ(Jennifer) គឺជាអ្នកកាសែត និងជាអតីតផលិតករនៅទូរទស្សន៍ Fox News។ គួរជម្រាបថា ការវាយប្រហារស្រោចពីលើអាកាសរបស់សហរដ្ឋអាម៉េរិកលើកំពង់ផែឥន្ធនៈនៃប្រទេសយេម៉ែនបានផ្តាច់ជីវិតមនុស្សយ៉ាងហោចណាស់ ៣៨នាក់។ នេះបើតាមប្រព័ន្ធផ្សព្វផ្សាយរបស់ក្រុមហ៊ូធី។