នាយករដ្ឋមន្ត្រីម៉ាឡេស៊ី គ្រោងជួបពិភាក្សាជាមួយប្រមុខរបបយោធាមីយ៉ាន់ម៉ា នៅរាជធានីបាងកក ដើម្បីជំរុញឱ្យមានការពន្យារពេលបទឈប់បាញ់

បាងកក៖ លោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី គ្រោងជួបពិភាក្សាជាមួយប្រមុខរបបយោធាមីយ៉ាន់ម៉ានៅរាជធានីបាងកក នាថ្ងៃព្រហស្បតិ៍ទី១៧ ខែមេសានេះ ដើម្បីជំរុញឱ្យមានការពន្យារពេលនៃបទឈប់បាញ់ ក្រោយប្រទេសកម្សត់មួយនេះរងគ្រោះដោយមហន្តរាយរញ្ជួយដី ខណៈកិច្ចប្រជុំមួយនេះត្រូវបានរិះគន់ដូចទឹកបាក់ទំនប់ដោយក្រុមប្រដាប់អាវុធជនជាតិភាគតិចមីយ៉ាន់ម៉ា។

នាយករដ្ឋមន្រ្តីម៉ាឡេស៊ី ក្នុងនាមជាប្រធានអាស៊ានឆ្នាំនេះ បានអះអាងថា លោកនឹងជួបជាមួយ មេដឹកនាំរបបសឹក លោក មីន អ៊ុងឡាំង ក្រោមហេតុផលមនុស្សធម៌។

អ្នកវិភាគនយោបាយឯករាជ្យដែលមានមូលដ្ឋាននៅប្រទេសថៃ លោក សៃ យីស៊ីនសូ (Sai Kyi Zin Soe) បានលើកឡើងថា ៖«មានលទ្ធភាពដែលរបបយោធាអាចទាញយកឱកាសទាំងនេះដើម្បីកសាងភាពស្របច្បាប់ក្នុងក្របខណ្ឌអាស៊ាន»។ ជំនួបនេះនឹងត្រូវបានចូលរួមដោយអតីតនាយករដ្ឋមន្ត្រីថៃ លោក ថាក់ស៊ីន ឈិនៈវ័ត ដែលលោក អាន់វ៉ា បានតែងតាំងជាទីប្រឹក្សាផ្ទាល់ក្នុងតួនាទីជាប្រធានអាស៊ាន។

យ៉ាងណា ក្រុមប្រឆាំងរបបយោធាមួយចំនួនរួមទាំងរដ្ឋាភិបាលស្រមោល និងកងប្រដាប់អាវុធជនជាតិភាគតិចមីយ៉ាន់ម៉ាបានជំរុញឱ្យមានការប្រុងប្រយ័ត្នបំផុតទាក់ទងនឹងកិច្ចប្រជុំនេះ ដោយពួកគេអះអាងថា កិច្ចប្រជុំនេះត្រូវបានធ្វើឡើងក្រោមលេសនៃការផ្ដល់ជំនួយមនុស្សធម៌។

គ្រោងការនៃជំនួបជាមួយប្រមុខយោធាមីយាយ៉ាន់ម៉ារបស់ លោក អាន់វ៉ា អ៊ីប្រាហ៊ីម ធ្វើឡើងបន្ទាប់ពីប្រទេសមួយនេះត្រូវបានរងការវាយប្រហារដោយគ្រោះរញ្ជួយដីកម្រិត ៧,៧រ៉ិចទ័រ ដោយបានសម្លាប់មនុស្សជាង ៣៦០០នាក់។

សូមរំឭកថា យោធាមីយ៉ាន់ម៉ាបានទម្លាក់រដ្ឋាភិបាលស៊ីវិលជាប់ឆ្នោតនៅក្នុងរដ្ឋប្រហារឆ្នាំ២០២១ និងបង្កឱ្យមានសង្រ្គាមស៊ីវិលដ៏រ៉ាំរ៉ៃ ទន្ទឹមនឹងអាស៊ានបានរារាំងមេដឹកនាំយោធាដែលកំពុងកាន់អំណាចមិនឱ្យចូលរួមកិច្ចប្រជុំ ក្រោយបរាជ័យក្នុងការអនុវត្តតាមផែនការសន្តិភាពរបស់ប្លុកនេះ៕