មេដឹកនាំវៀតណាម និងអេស្ប៉ាញ សន្យាជំរុញទំនាក់ទំនងសេដ្ឋកិច្ច និងកិច្ចសហប្រតិបត្តិការលើវិស័យការពារជាតិ

ហាណូយ៖ មេដឹកនាំនៃប្រទេសវៀតណាម និងអេស្ប៉ាញបានសន្យាជំរុញទំនាក់ទំនងសេដ្ឋកិច្ច និងកិច្ចសហប្រតិបត្តិការលើវិស័យការពារជាតិ ហើយបានសម្ដែងការគាំទ្ររបស់ពួកគេសម្រាប់ការលើកកម្ពស់ពាណិជ្ជកម្មសេរី នៅពេលប្រទេសទាំងពីររងផលប៉ះពាល់ដោយពន្ធបដិការរបស់លោកប្រធានាធិបតី ត្រាំ។

ប្រទេសអេស្ប៉ាញ និងមហាអំណាចផលិតនៅអាស៊ីអាគ្នេយ៍ វៀតណាមកំពុងស្វែងរកការបញ្ចៀសការយកពន្ធ៤៦ភាគរយលើទំនិញវៀតណាម និង២៥ភាគរយលើផលិតផលសហភាពអឺរ៉ុប ដែលនាំចូលទៅកាន់សហរដ្ឋអាម៉េរិក។

នាយករដ្ឋមន្ត្រីវៀតណាម លោក ផាម មិងជីញ (Phạm Minh Chính) បាននិយាយក្នុងអំឡុងដំណើរទស្សនកិច្ចរបស់សមភាគីអេស្ប៉ាញ លោក ប៉េដ្រូ សាន់ឆេស (Pedro Sánchez) ថា វៀតណាមចង់ធ្វើឱ្យប្រសើរឡើងនូវទំនាក់ទំនងជាមួយប្រទេសអេស្ប៉ាញដល់កម្រិតនៃភាពជាដៃគូយុទ្ធសាស្ត្រគ្រប់ជ្រុងជ្រោយនៅឱកាសដំបូងបំផុត។

លោក ផាម មិងជីញ បាននិយាយនៅក្នុងសន្និសីទរួមមួយជាមួយលោក សាន់ឆេស នៅរដ្ឋធានីហាណូយថា៖«ផ្អែកលើស្ថានភាពដ៏លំបាកនាពេលបច្ចុប្បន្ននេះ យើងត្រូវសហការ និងគូសបញ្ជាក់អំពីពហុភាគីនិយម»។

លោក សាន់ឆេស បាននិយាយថា អេស្ប៉ាញជឿជាក់លើការបើកចំហសេដ្ឋកិច្ច និងប្រឆាំងនឹងជម្លោះពាណិជ្ជកម្ម។ លោកបានថ្លែងយ៉ាងដូច្នេះថា៖«អេស្ប៉ាញគាំទ្រដល់សណ្តាប់ធ្នាប់អន្តរជាតិដែលផ្អែកលើច្បាប់ពាណិជ្ជកម្មសេរី និងការបើកចំហសេដ្ឋកិច្ច ហើយជឿថា សង្គ្រាមពាណិជ្ជកម្មមិនផ្តល់ផលប្រយោជន៍ដល់នរណាម្នាក់ឡើយ ក្រៅពីធ្វើឱ្យប៉ះពាល់ដល់មនុស្សគ្រប់គ្នា»។

លោក សាន់ឆេស បន្ថែមថា ប្រទេសអេស្ប៉ាញចង់ពង្រីកវត្តមានរបស់ខ្លួននៅក្នុងប្រទេសវៀតណាម រួមទាំងហេដ្ឋារចនាសម្ព័ន្ធផ្លូវដែក ដែលអេស្ប៉ាញអាចចែករំលែកជំនាញពីការកសាងបណ្តាញផ្លូវដែកល្បឿនលឿនផ្ទាល់ខ្លួន។ ប្រទេសវៀតណាមកំពុងស្វែងរកការបង្កើនការវិនិយោគនៅក្នុងប្រព័ន្ធផ្លូវដែករបស់ខ្លួន រួមទាំងផែនការសាងសង់ផ្លូវរថភ្លើងល្បឿនលឿនប្រវែង១៥៤១គីឡូម៉ែត្រ ដែលនឹងតភ្ជាប់រដ្ឋធានីហាណូយជាមួយមជ្ឈមណ្ឌលពាណិជ្ជកម្មទីក្រុងព្រៃនគរ (កម្ពុជាក្រោម) រួមទាំងការតភ្ជាប់ផ្លូវដែកជាមួយប្រទេសចិនផងដែរ៕