ឧត្តមសេនីយ៍ឯក ហោ សំអាត អញ្ជើញបើកសិក្ខាសាលា ស្ដីពី «បរិវត្តកម្មប្រព័ន្ធបច្ចេកវិទ្យាឌីជីថលក្រសួងមហាផ្ទៃ»

ភ្នំពេញ៖ នៅទីស្ដីការក្រសួងមហាផ្ទៃ ឯកឧត្តម ឧត្តមសេនីយ៍ឯក ហោ សំអាត អគ្គនាយក នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអំប់រំ ក្រសួងមហាផ្ទៃ បានអញ្ជើញជាអធិបតីបើកសិក្ខាសាលា ស្ដីពី «បរិវត្តកម្មប្រព័ន្ធបច្ចេកវិទ្យាឌីជីថលក្រសួងមហាផ្ទៃ» ដោយមានការអញ្ជើញចូលរួមពី អគ្គនាយករង, ប្រធាននាយកដ្ឋាន-ប្រធានស្ថានីយ៍ ព្រមទាំង ភ្ញៀវកិត្តិយសជាតិ-អន្ដរជាតិ ទីប្រឹក្សាបច្ចេកទេសកូរ៉េ និងលោក-លោកស្រី ជាថ្នាក់ដឹកនាំ និងមន្ដ្រីរាជការចំណុះអគ្គនាយកដ្ឋានជាច្រើនរូបទៀត។

បន្ទាប់ពីទទួលបានគោលការណ៍ណែនាំដ៏ខ្ពង់ខ្ពស់របស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ, អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានសហការ និងជួបពិភាក្សាជាមួយតំណាងក្រុមហ៊ុន N2M ដែលជាក្រុមហ៊ុនចុះបញ្ជីនៅប្រទេសកូរ៉េខាងត្បូង មានបទពិសោធន៍លើការរៀបចំហេដ្ឋារចនាសម្ព័ន្ធ និងប្រព័ន្ធបច្ចេកវិទ្យា រយៈពេល ៥ឆ្នាំ នៅក្នុងប្រទេសកូរ៉េខាងត្បូង ដើម្បីរៀបចំកម្មវិធីសិក្ខាសាលានេះឡើងមក សម្រាប់ចែករំលែកបទពិសោធន៍ ជូនថ្នាក់ដឹកនាំដែលជាតំណាងអគ្គនាយកដ្ឋាន និងអង្គភាពចំណុះក្រសួងមហាផ្ទៃ។

ជាកិច្ចចាប់ផ្ដើម នៃកម្មវិធី លោកឧត្តមសេនីយ៍ទោ ម៉ៅ វិស្សុត អគ្គនាយករង នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានធ្វើសេចក្ដីរាយការណ៍ជូន ឯកឧត្តម អគ្គនាយក និងអង្គពិធីទាំងមូលថា សិក្ខាសាលានៅថ្ងៃនេះ មានអង្គសិក្ខាសាលាសរុបចំនួន ១៥៥រូប ដែលមានសមាសភាពពីគ្រប់អគ្គនាយកដ្ឋាន និងអង្គភាពថ្នាក់ប្រហាក់ប្រហែលចំណុះក្រសួងមហាផ្ទៃ ក្នុងនោះ មានតំណាងអគ្គនាយកដ្ឋានចំនួន៦ រួមមាន៖ ១/អគ្គនាយកដ្ឋានបច្ចេកវិទ្យាឌីជីថលនិង ផ្សព្វផ្សាយអប់រំ, ២/អគ្គស្នងការដ្ឋាននគរបាលជាតិ, ៣/អគ្គនាយកដ្ឋានអត្តសញ្ញាណកម្ម, ៤/អគ្គនាយកដ្ឋានអន្តោប្រវេសន៍, ៥/អគ្គនាយកដ្ឋានរដ្ឋបាល និង ៦/លេខាធិការដ្ឋាន គ.ជ.អ.ប ដែលនឹងធ្វើបទបង្ហាញអំពីប្រព័ន្ធបច្ចេកវិទ្យាឌីជីថល ដែលកំពុងប្រើប្រាស់សម្រាប់បម្រើកិច្ចការងារផ្ទៃក្នុង អង្គភាព និងផ្តល់សេវាសាធារណៈជូនប្រជាពលរដ្ឋ។

អញ្ជើញបើកសិក្ខាសាលា ឯកឧត្តម ឧត្តមសេនីយ៍ឯក ហោ សំអាត មានប្រសាសន៍ថា ថ្ងៃនេះ ឯកឧត្តម ពិតជាមានកិត្តិយស និងសេចក្តីសប្បាយរីករាយ ដោយទទួលបានការចាត់តាំងពី ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីអញ្ជើញចូលរួមជាអធិបតីក្នុងពិធីបើកសិក្ខាសាលាស្តីពី «បរិវត្តកម្មប្រព័ន្ធបច្ចេកវិទ្យាឌីជីថល ក្រសួងមហាផ្ទៃ»។

ឯកឧត្តម អគ្គនាយក ក៏បានសម្តែងនូវការស្វាគមន៍យ៉ាងកក់ក្តៅចំពោះវត្តមាន ឯកឧត្តម លោកជំទាវ ភ្ញៀវកិត្តិយសជាតិ អន្តរជាតិ ទីប្រឹក្សាបច្ចេកទេស អស់លោក លោកស្រី ជាថ្នាក់ដឹកនាំ និងមន្ត្រីរាជការក្រសួងមហាផ្ទៃ ដែលបាន ឆ្លៀតឱកាសដ៏មានតម្លៃ និងមមាញឹក អញ្ជើញចូលរួម ក្នុងកម្មវិធីសិក្ខាសាលាស្តីពី «បរិវត្តកម្ម ប្រព័ន្ធបច្ចេកវិទ្យាឌីជីថល ក្រសួងមហាផ្ទៃ» នៅថ្ងៃនេះ។

លើសពីនេះ ឯកឧត្តម អគ្គនាយក បានឱ្យដឹងថា សិក្ខាសាលានេះ រៀបចំឡើងក្នុងគោលបំណងពិភាក្សា និងចែករំលែកបទពិសោធន៍លើការតភ្ជាប់ទិន្នន័យ និងដំណោះស្រាយលើបញ្ហាប្រឈម នានា ពាក់ព័ន្ធការងារបច្ចេកវិទ្យាឌីជីថល និងដើម្បីស្វែងយល់អំពីបច្ចេកវិទ្យាថ្មីៗបម្រើដល់ការងារ របស់អង្គភាព ដែលអាចផ្តល់ឱកាសឲ្យមន្ត្រីរាជការស្វែងយល់កាន់តែច្បាស់ពីស្ថានភាពបច្ចុប្បន្ន បញ្ហាប្រឈម និងទិសដៅការងារ ព្រមទាំងការអភិវឌ្ឍប្រព័ន្ធបច្ចេកវិទ្យាសម្រាប់បម្រើដល់ការងារ ប្រចាំថ្ងៃ ការពង្រឹងប្រសិទ្ធភាពនៃការផ្តល់សេវាសាធារណៈ និងសន្តិសុខសង្គមឲ្យកាន់តែល្អប្រសើរ និងចំគោលដៅក្នុងបរិបទនៃឌីជីថលនីយកម្ម។

នាឱកាសនោះដែរ ឯកឧត្តម ឧត្តមសេនីយ៍ឯក ហោ សំអាត ក៏បានមានប្រសាសន៍លើកទីកចិត្តដល់គ្រប់តួអង្គពាក់ព័ន្ធក្នុងអង្គសិក្ខាសានេះ ដែលបានចូលរួមស្ដាប់ និងចែករំលែកបទពិសោធន៍ ប្រកបដោយការយកចិត្តទុកដាក់ខ្ពស់ ដើម្បីចូលរួមចំណែកគាំទ្រការងារបរិវត្តកម្មឌីជីថលក្រសួងមហាផ្ទៃ ប្រកបដោយភាពជឿទុកចិត្ត និងសុវត្ថិភាពខ្ពស់។

សូមជម្រាបជូនថា ពិធីបិទបើកសិក្ខាសាលា ស្ដីពី «បរិវត្តកម្មប្រព័ន្ធបច្ចេកវិទ្យាឌីជីថលក្រសួងមហាផ្ទៃ» នឹងរៀបចំធ្វើឡើងនារសៀលថ្ងៃទី៤ ខែមេសា ឆ្នាំ២០២៥នេះ ក្រោមអធិបតីភាព ឯកឧត្តម នាយឧត្តមសេនីយ៍ ប៉ោ ភក្តិ រដ្ឋលេខាធិការក្រសួងមហាផ្ទៃ៕