ប៉េកាំង៖ យោធាចិនបានបញ្ជាក់ថា ខ្លួននឹងរឹតបន្តឹងខ្សែរឹតកលើកោះតៃវ៉ាន់ ប្រសិនបើការបំបែកខ្លួននៅលើកោះនេះកើនឡើង ដោយព្រមានក្រុមបំបែកខ្លួនឱ្យដកថយ បើដូច្នោះទេ នឹងជួបផលវិបាក។
រដ្ឋធានីប៉េកាំងបានចាត់ទុកកោះតៃវ៉ាន់ដែលគ្រប់គ្រងតាមបែបប្រជាធិបតេយ្យថាជាផ្នែកមួយនៃទឹកដីរបស់ខ្លួន ហើយមិនបានច្រានចោលការប្រើកម្លាំងយោធាដើម្បីគ្រប់គ្រងកោះនេះទេ។ អ្នកនាំពាក្យយោធា លោក Wu Qian បានឲ្យដឹងថា ការបំបែកខ្លួនសម្រាប់ឯករាជ្យតៃវ៉ាន់កាន់តែខ្លាំងឡើង ខ្សែនៅជុំវិញករបស់ពួកគេកាន់តែតឹង ហើយដាវដែលព្យួរនៅលើក្បាលរបស់ពួកគេកាន់តែស្រួច»។ លោកបន្តថា៖«កងទ័ពរំដោះប្រជាជនចិន គឺជាកម្លាំងនៃសកម្មភាពក្នុងការប្រឆាំងនឹងការបំបែកខ្លួន និងការលើកកម្ពស់ការបង្រួបបង្រួមឡើងវិញ។
លោក Wu បានព្រមានទៀតថា អ្នកកំពុងដើរទៅ កាន់តែជិតដល់មាត់ជ្រោះ។ ប្រសិនបើអ្នកបន្តដើរផ្លូវរខុស នោះអ្នកនឹងស្លាប់។ សារព្រមានរបស់លោក Wu ទៅកាន់កោះតៃវ៉ាន់ កើតឡើងក្នុងអំឡុងពេលជួបជុំខាងនយោបាយប្រចាំឆ្នាំដ៏ធំបំផុតរបស់ប្រទេសចិន ដែលគេស្គាល់ថា Two Sessions។ រដ្ឋធានីប៉េកាំងបានប្រកាសថា ការចំណាយលើវិស័យការពារជាតិរបស់ខ្លួននឹងកើនឡើង៧,២ភាគរយនៅឆ្នាំ២០២៥នេះ ដោយសារកងកម្លាំងប្រដាប់អាវុធរបស់ខ្លួនឆ្លងកាត់ទំនើបកម្មយ៉ាងឆាប់រហ័ស។
