អ៊ុយក្រែនប្តេជ្ញាចិត្តយ៉ាងពេញលេញក្នុងការសន្ទនាជាមួយអាមេរិក មុនពេលដំណើរទៅប្រទេសអារ៉ាប៊ីសាអូឌីត
បរទេស៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី បានបញ្ជាក់ថា អ៊ុយក្រែនប្តេជ្ញាចិត្តយ៉ាងពេញលេញដើម្បីឱ្យមានការសន្ទនាក្នុងន័យស្ថាបនាជាមួយតំណាងសហរដ្ឋអាម៉េរិកនៅអារ៉ាប៊ីសាអូឌីតនៅសប្តាហ៍ក្រោយ អំពីវិធីដើម្បីបញ្ចប់សង្រ្គាមជាមួយរុស្ស៊ី។
ចាប់តាំងពីចូលកាន់តំណែងក្នុងខែមករា ប្រធានាធិបតីអាម៉េរិក លោក ដូណាល់ ត្រាំ បានផ្អាកជំនួយយោធារបស់សហរដ្ឋអាម៉េរិកដល់អ៊ុយក្រែន ក៏ដូចជាការចែករំលែកព័ត៌មានសម្ងាត់ជាមួយរដ្ឋធានីកៀវ។ លោកបានចោទប្រកាន់លោក ហ្សេឡេនស្គី ថាមិនមានភាពម៉ឺងម៉ាត់ចំពោះការឈានដល់កិច្ចព្រមព្រៀងសន្តិភាពជាមួយរុស្ស៊ី ដែលបានលុកលុយអ៊ុយក្រែនកាលពីបីឆ្នាំមុន និងបានដណ្តើមកាន់កាប់ប្រហែល២០ ភាគរយនៃទឹកដីរបស់ខ្លួន។
លោក ហ្សេឡេនស្គី បានសរសេរនៅលើបណ្តាញសង្គម X ថាអ៊ុយក្រែនបានស្វែងរកសន្តិភាពតាំងពីវិនាទីដំបូងនៃសង្រ្គាមនេះ។ សំណើជាក់ស្តែងត្រូវបានលើកឡើងក្នុងការចរចា។ គន្លឹះសំខាន់គឺការចាត់វិធានការយ៉ាងលឿន និងមានប្រសិទ្ធភាព។ លោក ហ្សេឡេនស្គី បាននិយាយទៀតថា លោកនឹងទៅបំពេញទស្សនកិច្ចនៅអារ៉ាប៊ីសាអូឌីតនៅសប្តាហ៍ក្រោយ ហើយបន្ទាប់ពីបានជួបជាមួយព្រះអង្គម្ចាស់ Mohammed Bin Salman នៅថ្ងៃចន្ទ តំណាងអ្នកការទូត និងយោធាអ៊ុយក្រែន នឹងចូលរួមកិច្ចប្រជុំនៅថ្ងៃអង្គារជាមួយក្រុមសហរដ្ឋអាម៉េរិក។
លោកអះអាងថា យើងប្តេជ្ញាយ៉ាងពេញលេញក្នុងការសន្ទនាក្នុងន័យស្ថាបនា ហើយយើងសង្ឃឹមថានឹងពិភាក្សា និងយល់ព្រមលើការសម្រេចចិត្ត និងជំហានចាំបាច់។ គណៈប្រតិភូអ៊ុយក្រែននឹងរួមបញ្ចូលរដ្ឋមន្ត្រីការបរទេស ប្រធានបុគ្គលិករបស់លោក ហ្សេឡេនស្គី និងរដ្ឋមន្ត្រីការពារជាតិ។
បេសកជនពិសេសរបស់លោក ត្រាំ គឺលោក Steve Witkoff ក៏បានបញ្ជាក់ថា លោកកំពុងពិភាក្សាជាមួយអ៊ុយក្រែនសម្រាប់កិច្ចព្រមព្រៀងក្របខ័ណ្ឌមួយដើម្បីបញ្ចប់សង្គ្រាមរយៈពេលបីឆ្នាំជាមួយរុស្ស៊ី ហើយកិច្ចប្រជុំមួយត្រូវបានគ្រោងទុកនៅសប្តាហ៍ក្រោយជាមួយអ៊ុយក្រែននៅអារ៉ាប៊ីសាអូឌីត។ កាលពីខែកុម្ភៈ ទីក្រុងរីយ៉ាដបានរៀបចំកិច្ចប្រជុំមួយរវាងមន្ត្រីអាម៉េរិក និងរុស្ស៊ី ដើម្បីពិភាក្សាអំពីវិធីដើម្បីបញ្ឈប់ជម្លោះដ៏សាហាវបំផុតនៅអឺរ៉ុបចាប់តាំងពីសង្គ្រាមលោកលើកទីពីរ។ អ៊ុយក្រែនមិនត្រូវបានរាប់បញ្ចូលក្នុងកិច្ចចរចាទាំងនោះទេ ដែលធ្វើឱ្យមានការព្រួយបារម្ភនៅក្នុងរដ្ឋធានីកៀវ និងក្នុងចំណោមសម្ព័ន្ធមិត្តអឺរ៉ុបរបស់ខ្លួន។
លោក ហ្សេឡេនស្គី បានជួបលោក ត្រាំ នៅសេតវិមានកាលពីថ្ងៃទី២៨ ខែកុម្ភៈ ប៉ុន្តែជំនួបនេះបានធ្លាក់ចូលទៅក្នុងភាពអាម៉ាស់ ដោយមេដឹកនាំទាំងពីរបានប៉ះទង្គិចគ្នានៅមុខប្រព័ន្ធផ្សព្វផ្សាយពិភពលោកជុំវិញចលនាសន្តិភាព។
