ឯកឧត្តមទេសរដ្ឋមន្ត្រី សក់ សេដ្ឋា អញ្ជើញចូលរួមក្នុងពិធីបិទសន្និបាតត្រួតលទ្ធផលការងារឆ្នាំ២០២៤ និងលើកទិសដៅបន្ត របស់ក្រសួងមហាផ្ទៃ

ភ្នំពេញ៖ នៅទីស្ដីការក្រសួងមហាផ្ទៃ នារសៀលថ្ងៃទី១៣ ខែកុម្ភៈ ឆ្នាំ២០២៥នេះ ឯកឧត្តម សក់ សេដ្ឋា ទេសរដ្ឋមន្ត្រី ទទួលបន្ទុកបេសកកម្មពិសេស និងជាអនុប្រធានអចិន្ត្រៃយ៍ គ.ជ.អ.ប បានអញ្ជើញចូលរួមក្នុងពិធីបិទសន្និបាតត្រួតពិនិត្យលទ្ធផលការងារឆ្នាំ២០២៤ និងលើកទិសដៅ ការងារឆ្នាំ២០២៥ របស់ក្រសួងមហាផ្ទៃ និងបូកសរុបចលនាប្រឡងប្រណាំងអនុវត្តគោលនយោបាយ «ភូមិ-ឃុំ-សង្កាត់ មានសុវត្ថិភាព» ក្រោមអធិបតីភាពឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាតំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ ដោយមានការអញ្ជើញចូលរួមពី ឯកឧត្តម-លោកជំទាវ ទេសរដ្ឋមន្ដ្រី រដ្ឋមន្ដ្រី រដ្ឋលេខាធិកាប្រចាំការ-រដ្ឋលេខាធិកា-អនុរដ្ឋលេខាធិការ ក្រសួងមហាផ្ទៃ, អភិបាលរាជធានី-ខេត្ត, អគ្គស្នងការដ្ឋាននគរបាលជាតិ, អគ្គនាយក នៃអគ្គនាយកដ្ឋាន ចំណុះក្រសួងមហាផ្ទៃ, ស្នងការដ្ឋាននគរបាលរាជធានី-ខេត្ត ព្រមទាំងអ្នកពាក់ព័ន្ធជាច្រើនរូបទៀត។

ជាការកិច្ចចាប់ផ្ដើម ឯកឧត្តមសន្ដិបណ្ឌិត ម៉ៅ ច័ន្ទតារា រដ្ឋលេខាធិការប្រចាំការ ក្រសួងមហាផ្ទៃ បានធ្វើសេចក្ដីរាយការណ៍អំពីលទ្ធផលសន្និបាតជូន ឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងអង្គពិធីទាំងមូលបានជ្រាប។

នាឱកាសនោះដែរ ឯកឧត្តមអភិសន្ដិបណ្ឌិត ស សុខា មានប្រសាសន៍ថា ផ្អែកតាមសេចក្តីរាយការណ៍សង្ខេបរបស់ ឯកឧត្តមសន្តិបណ្ឌិត ម៉ៅ ច័ន្ទតារា អំពីលទ្ធផលនៃសន្និបាតដែលបានប្រព្រឹត្តទៅក្នុងរយៈពេល២ថ្ងៃកន្លងមកនេះ និងផ្អែកតាមរបាយការណ៍ស្តីពីលទ្ធផលការងារឆ្នាំ២០២៤ របស់ក្រសួងមហាផ្ទៃ។

ក្នុងនាមរាជរដ្ឋាភិបាល, ឯកឧត្តមអភិសន្ដិបណ្ឌិត ស សុខា បានសម្តែងនូវអំណរគុណជាមួយនឹងការកោតសរសើរ និងវាយតម្លៃខ្ពស់ ចំពោះថ្នាក់ដឹកនាំក្រសួងមហាផ្ទៃ កងកម្លាំងនគរបាលជាតិ មន្ត្រីរដ្ឋបាលស៊ីវិល មន្ត្រីពន្ធនាគារនៃក្រសួង មហាផ្ទៃ និងរដ្ឋបាលថ្នាក់ក្រោមជាតិគ្រប់ថ្នាក់ដែលបានខិតខំប្រឹងប្រែងរួមគ្នាបំពេញបេសកកម្ម តួនាទី ភារកិច្ចក្នុងការបម្រើជាតិ និងប្រជាពលរដ្ឋនៅគ្រប់កាលៈទេសៈ ប្រកបដោយស្មារតីទទួលខុសត្រូវខ្ពស់ ធានាបាននូវនិរន្តរភាព និងប្រសិទ្ធភាពនៃការដឹកនាំគ្រប់គ្រងរដ្ឋបាលដែនដីគ្រប់ថ្នាក់លើវិស័យ នយោបាយរដ្ឋបាល ការដឹកនាំនគរបាលជាតិលើវិស័យសន្តិសុខជាតិ សណ្តាប់ធ្នាប់សាធារណៈ សុវត្ថិភាពសង្គម និងការគ្រប់គ្រងពន្ធនាគារឱ្យសម្រេចបានសមិទ្ធផលថ្មីៗជាច្រើនបន្ថែមទៀត ក្នុងឆ្នាំ២០២៤ កន្លងមកនេះ។

ជាមួយគ្នានេះដែរ ឯកឧត្តមអភិសន្ដិបណ្ឌិត ស សុខា ក៏បានកោតសរសើរ និងវាយតម្លៃខ្ពស់ចំពោះ ឯកឧត្តម លោកជំទាវ លោក លោកស្រី ដែលជាថ្នាក់ដឹកនាំក្រសួងមហាផ្ទៃ កងកម្លាំងនគរបាលជាតិ មន្ត្រីរដ្ឋបាលស៊ីវិល មន្ត្រី ពន្ធនាគារនៃក្រសួងមហាផ្ទៃ និងរដ្ឋបាលថ្នាក់ក្រោមជាតិ ដែលបានខិតខំពុះពារប្រឹងប្រែងសម្រេច បាននូវសមិទ្ធផលនានាជាច្រើនកាលពីឆ្នាំ២០២៤កន្លងទៅនេះ។

ក្នុងនាមរាជរដ្ឋាភិបាល ឯកឧត្តមអភិសន្ដិបណ្ឌិត មានជំនឿជឿជាក់យ៉ាងមុតមាំថា ឯកឧត្តម លោកជំទាវ លោក លោកស្រី នឹងរួមមានគ្នាបន្តពង្រឹងការប្តេជ្ញាចិត្តអនុវត្តឱ្យបានសម្រេចនូវទិសដៅ ការងារឆ្នាំ២០២៥ ប្រកបដោយស្មារតីទទួលខុសត្រូវខ្ពស់ ៕