ម៉ានីល៖ ហ្វីលីពីន និងសហរដ្ឋអាម៉េរិក បានដឹកដៃគ្នាធ្វើសមយុទ្ធដែនសមុទ្ររួមគ្នាជាលើកទី៥ នៅក្នុងសមុទ្រចិនខាងត្បូង។ នេះបើតាមការឱ្យដឹងរបស់កងកម្លាំងប្រដាប់អាវុធហ្វីលីពីន កាលពីថ្ងៃអាទិត្យទី១៩ ខែមករា។
យោធាហ្វីលីពីន បានរៀបរាប់នៅក្នុងសេចក្តីថ្លែងការណ៍មួយថា ខ្លួនបានរៀបចំសកម្មភាពសហប្រតិបត្តិការដែនសមុទ្ទជាមួយសហរដ្ឋអាម៉េរិក កាលពីថ្ងៃសុក្រទី១៧ និងថ្ងៃសៅរ៍ទី១៨ ខែមករា ជាលើកដំបូងសម្រាប់ឆ្នាំ២០២៥នេះ និងជាលើកទី៥ ចាប់តាំងពីសម្ព័ន្ធមិត្តចាក់ទឹកមិនលេចទាំងពីរ ផ្តើមធ្វើសមយុទ្ធរួមគ្នាក្នុងឆ្នាំ២០២៣។
កិច្ចសហប្រតិបត្តិការផ្នែកសន្តិសុខរវាងសម្ព័ន្ធមិត្តទាំងពីរ បានកើនទ្បើងខ្លាំងក្រោមការដឹកនាំរបស់ប្រធានាធិបតីហ្វីលីពីន ហ្វឺឌីណាន់ ម៉ាកូស (Ferdinand Marcos Jr) ដែលបានអនុញ្ញាតឱ្យកងកម្លាំងអាម៉េរិក ចូលប្រើមូលដ្ឋានយោធារាប់សិបកន្លែង រួមទាំងកន្លែងប្រឈមមុខនឹងកោះតៃវ៉ាន់ផងដែរ។
លំហាត់សឹករួមគ្នាក្នុងដែនសមុទ្ទរួមមាន៖ ក្រុមនាវាវាយប្រហារ Carl Vinson Carrier Strike របស់សហរដ្ឋអាម៉េរិក នាវាពិឃាត ឧទ្ធម្ភាគចក្រពីរគ្រឿង និងយន្តហោះ F-18 Hornet ពីរគ្រឿង។ ចំណែក ភាគីហ្វីលីពីនបានដាក់ពង្រាយនាវាចម្បាំង Antonio Luna នាវាល្បាត Andres Bonifacio យន្តហោះចម្បាំង FA-50 ចំនួនពីរគ្រឿង និងឧបករណ៍ការស្វែងរក និងជួយសង្គ្រោះរបស់កងទ័ពអាកាស។ ចំពោះសមយុទ្ធនេះ កងកម្លាំងប្រដាប់អាវុធហ្វីលីពីនចាត់ទុកថា ជាសកម្មភាពពង្រឹងកិច្ចសហប្រតិបត្តិការដែនសមុទ្ទទ្វេភាគី និងអន្តរប្រតិបត្តិការ៕
