នាយកដ្ឋានបរិវត្តកម្មឌីជីថល នៃក្រសួងអប់រំ រៀបចំវគ្គបំប៉នសមត្ថភាពលើជំនាញ «ការប្រើប្រាស់ថ្នាលអភិវឌ្ឍសមត្ថភាព និងសាលាឌីជីថល»

ភ្នំពេញ៖ នាថ្ងៃទី១០ ខែមករា ឆ្នាំ២០២៥ នាយកដ្ឋានបរិវត្តកម្មឌីជីថល នៃក្រសួងអប់រំ យុវជន និងកីឡា បានរៀបចំវគ្គបំប៉នសមត្ថភាពលើជំនាញ«ការប្រើប្រាស់ថ្នាលអភិវឌ្ឍសមត្ថភាព និងសាលាឌីជីថល» ជូនដល់ គណៈគ្រប់គ្រង និងគ្រូឧទ្ទេស នៃវិទ្យាស្ថានជាតិអប់រំ ប្រមាណ២០០នាក់។

វគ្គបំប៉នសមត្ថភាពនេះរៀបចំឡើង ក្នុងគោលបំណងបំប៉នសមត្ថភាពលើកកម្ពស់សមត្ថភាព និងប្រសិទ្ធភាពបង្រៀនដល់ គ្រូឧទ្ទេស តាមរយៈការប្រើប្រាស់ ថ្នាលអភិវឌ្ឍនសមត្ថភាព (Capacity Development Platform) ដែលមានតំណ៖ cdp.moeys.gov.kh ជំនួយក្នុងការបង្រៀន ការគ្រប់គ្រងសម្ភារៈឧបទេសបង្រៀនក្នុងវគ្គសិក្សាឱ្យកាន់តែមានប្រសិទ្ធភាពខ្ពស់ និងសាលាឌីជីថល សម្រាប់ប្រព័ន្ធគ្រប់គ្រងឯកសារនិងចែករំលែកឯកសាររបស់វិទ្យាស្ថានជាតិអប់រំ ដល់គរុនិស្សិត គរុសិស្ស សិស្ស និងសាធារណៈទូទៅ ដែលមានតំណ៖ sala.moeys.gov.kh ។

ក្រោយការបញ្ចប់វគ្គបំប៉នសមត្ថភាពលើជំនាញ «ការប្រើប្រាស់ថ្នាលអភិវឌ្ឍសមត្ថភាព និងសាលាឌីជីថល» គណៈគ្រប់គ្រង និងគ្រូឧទ្ទេសដែលទទួលបានវគ្គបំប៉នសមត្ថភាពមានលទ្ធភាពស្វ័យយល់ពីការប្រើប្រាស់ថ្នាលអភិវឌ្ឍនសមត្ថភាព(Capacity Development Platform) ជំនួយដល់ការបង្រៀន និងរៀនបានយ៉ាងល្អ ក្រោយពីសិក្សាចប់វគ្គមគ្គុទ្ទេសក៍សម្រាប់អ្នកបង្កើតវគ្គសិក្សាលើថ្នាលអភិវឌ្ឍសមត្ថភាព និងបង្កើតសាលានិម្មិតរបស់វិទ្យាស្ថាន និងសម្តែងនូវការអបអរសាទរ និងពេញចិត្តក្នុងការចូលប្រើប្រាស់ថ្នាលអភិវឌ្ឍនសមត្ថភាព និងសាលាឌីជីថល ព្រមទាំងបានកោតសរសើរអំពីអត្ថប្រយោជន៍របស់ថ្នាលសិក្សានេះសម្រាប់ការសិក្សា និង ស្រាវជ្រាវសម្រាប់គ្រូឧទ្ទេស និងគរុសិស្ស និស្សិត។

គណៈគ្រប់គ្រង និងគ្រូឧទ្ទេសដែលបានចូលរួមវគ្គបំប៉នសមត្ថភាពចិត្តទុកដាក់ និងជំរុញដល់ការសិក្សាតាមថ្នាលអភិវឌ្ឍនសមត្ថភាព cdp.moeys.gov.kh និងសាលាឌីជីថល sala.moeys.gov.kh ដើម្បីឱ្យការសិក្សាតាមបែបឌីជីថលកាន់តែមានភាពទំលំទូលាយ ដល់សិស្សនៅគ្រប់តំបន់ក្នុងប្រទេស និងដើម្បីលើកកម្ពស់ការអប់រំបែបឌីជីថលនៅប្រទេសកម្ពុជា៕