តៃវ៉ាន់ រកឃើញយន្តហោះយោធាចិន ៥៣គ្រឿង និងនាវាកងទ័ពជើងទឹក ១៩គ្រឿង កំពុងប្រតិបត្តិការជុំវិញកោះនេះ
តៃវ៉ាន់ រាយការណ៍ពីការកើនឡើង នៃសកម្មភាពយោធារបស់ចិននៅជុំវិញកោះ រួមទាំងវត្តមានយន្តហោះយោធាចំនួន៥៣ គ្រឿង ខណៈតៃវ៉ាន់បង្កើនការប្រុងប្រយ័ត្នខ្ពស់ចំពោះយុទ្ធនាការដាក់សម្ពាធចុងក្រោយរបស់មហាយក្សចិន។
តៃប៉ិ៖ ក្រសួងការពារជាតិរបស់តៃវ៉ាន់ បានរាយការណ៍ពីការកើនឡើងនៃសកម្មភាពយោធារបស់ចិននៅជុំវិញកោះ រួមទាំងវត្តមានយន្តហោះយោធាចំនួន៥៣ គ្រឿង ខណៈតៃវ៉ាន់បង្កើនការប្រុងប្រយ័ត្នខ្ពស់ចំពោះយុទ្ធនាការដាក់សម្ពាធចុងក្រោយរបស់មហាយក្សចិន។
យោធាចិនមិនទាន់ធ្វើអត្ថាធិប្បាយទេ ហើយក៏មិនបានបញ្ជាក់ថា ខ្លួនកំពុងធ្វើសមយុទ្ធយោធាណាមួយដែរ។ ចិនដែលចាត់ទុកតៃវ៉ាន់ជាទឹកដីរបស់ខ្លួន ត្រូវបានគេរំពឹងថា នឹងចាប់ផ្តើមសមយុទ្ធ ដើម្បីបង្ហាញពីកំហឹងរបស់ខ្លួនចំពោះដំណើរទស្សនកិច្ចរបស់លោកប្រធានាធិបតី ឡៃ ឈឹងតេ ទៅកាន់តំបន់ប៉ាស៊ីហ្វិក ដែលបានបញ្ចប់កាលពីសប្តាហ៍មុន ដោយរួមមានការឈប់សំចតនៅកោះហាវ៉ៃ និងកោះហ្គាំ ជាទឹកដីរបស់សហរដ្ឋអាម៉េរិក។ កាលពីថ្ងៃអង្គារ ក្រសួងការពារជាតិរបស់កោះតៃវ៉ាន់បានបញ្ជាក់ថា ចិនកំពុងដាក់ពង្រាយកងនាវាចរដ៏ធំបំផុតរបស់ខ្លួននៅក្នុងដែនទឹកក្នុងតំបន់ ក្នុងរយៈពេលជិត៣ទសវត្សរ៍ ដែលបង្កការគំរាមកំហែងដល់តៃវ៉ាន់យ៉ាងច្បាស់ជាងល្បែងសង្រ្គាមមុនៗ។ មន្ត្រីយោធាអាម៉េរិកម្នាក់បាននិយាយថា ការដាក់ពង្រាយកងទ័ពជើងទឹករបស់ចិននៅសមុទ្ទចិនខាងកើត និងសមុទ្ទចិនខាងត្បូង បានកើនឡើងយ៉ាងខ្លាំង។
ក្រសួងការពារជាតិរបស់កោះតៃវ៉ាន់រកឃើញយន្តហោះយោធាចំនួន៥៣គ្រឿង កំពុងប្រតិបត្តិការជុំវិញកោះនេះក្នុងរយៈពេល២៤ម៉ោងកន្លងមក ក៏ដូចជានាវាកងទ័ពជើងទឹកចំនួន១១គ្រឿង និងនាវាផ្លូវការចំនួន៨គ្រឿង សំដៅទៅលើនាវាមកពីភ្នាក់ងារស៊ីវិលដូចជាឆ្មាំឆ្នេរសមុទ្ទជាដើម។ យោធារបស់តៃវ៉ាន់បានប្រកាសអាសន្ន កាលពីថ្ងៃចន្ទ បន្ទាប់ពីចិនដាក់ពង្រាយនាវាកងទ័ពជើងទឹក និងឆ្មាំឆ្នេរសមុទ្ទកាន់តែច្រើន៕
