ក្រសួងបរិស្ថាននិងដៃគូចូលរួមបង្កើនចំណេះដឹង ស្តីពីការបែងចែកសំណល់ និងការកែច្នៃឡើងវិញដល់សិស្សនៅតាមសាលរៀន
ភ្នំពេញ៖ ប្រតិភូក្រសួងបរិស្ថាន ដឹកនាំដោយ ឯកឧត្តម សាន វណ្ណទី រដ្ឋលេខាធិការប្រចាំការនៃក្រសួងបរិស្ថាន ឯកឧត្តម ជួប ប៉ារីស៍ រដ្ឋលេខាធិការ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកពញាក្រែក ឯកឧត្តម សឹម យ៉ារ៉ែន , ឯកឧត្តម កែន សេរីរដ្ឋា, ឯកឧត្តម ដាញ់ សេរី អនុប្រធានក្រុមការងាររាជរដ្ឋាភិបាលចុះមូលដ្ឋានស្រុកពញាក្រែក, កញ្ញា Shomi Kim ប្រធានវិទ្យាស្ថានអភិវឌ្ឍន៍បៃតងសកល (GGGI) ប្រចាំកម្ពុជា នៅរសៀលថ្ងៃទី២០ ខែកញ្ញា ឆ្នាំ២០២៤ បានជួបសំណេះសំណាល ជាមួយសិស្សានុសិស្ស លោកគ្រូអ្នគ្រូ និងអាជ្ញាធរមូលដ្ឋាន និងប្រគល់ធុងសំរាម ជូនសាលាបឋមសិក្សា គ្រញូង ចំនួន ១ឈុត។
ក្នុងឱកាសនោះ ឯកឧត្តម សាន វណ្ណទី បានថ្លែងអំណរគុណដល់លោកគ្រូអ្នកគ្រូនិងសិស្សានុសិស្សក្នុងការចូលរួមយុទ្ធនាការរបស់ក្រសួងបរិស្ថាន តាមរយៈយុទ្ធសាស្រ្តចក្រាវិស័យបរិស្ថាន។
ជាមួយគ្នានេះ ឯកឧត្តម បានលើកទឹកចិត្តឱ្យសិស្សានុសិស្សបន្តយកចិតទុកដាក់ សំអាតអនាម័យបរិស្ថាន នៅតាមសាលារៀន កាត់បន្ថយការប្រើប្រាស់ប្លាស្ទិក ដោយអនុវត្តជាប្រចាំយុទ្ធនាការ «ថ្ងៃនេះ ខ្ញុំមិនប្រើថង់ប្លាស្ទិកទេ» ព្រមទាំងយុទ្ធនាការ«កម្ពុជាស្អាត ខ្មែរធ្វើបាន» ដើម្បីឱ្យសាលារៀនស្អាត មូលដ្ឋានស្អាត ស្រុកភូមិមានសោភ័ណភាព និងឆ្ពោះទៅកម្ពុជាស្អាតនៅថ្ងៃខាងមុខ។
នៅក្នុងឱកាសនេះដែរ ក្រុមការងារក្រសួងបរិស្ថាន បានធ្វើការផ្សព្វផ្សាយសល់សិស្សានុសិស្ស ស្តីពីរបៀបញែកសំរាម ការកែច្នៃសំរាម រួមទាំងការផលិតវីដេអូផ្សព្វផ្សាយ យុទ្ធនាការផ្ទៃមេឃពណ៌ខៀវ និងការបញ្ចេញឧស្ម័នផ្ទះកញ្ចក់ ដែលកម្ពុជាបានកំណត់ថានៅឆ្នាំ ២០៥០ ជាប្រទេសអព្យាក្រឹតកាបូន។
សូមបញ្ជាក់ថាព្រឹត្តិការណ៍នាថ្ងៃនេះ រៀបចំឡើងតាមរយៈ“គម្រោងស្តីពីការបែងចែកសំណល់ និងការយល់ដឹងពីការកែច្នៃឡើងវិញ នៅតាមសាលារៀនក្នុងទីក្រុងគោលដៅ’ ដល់សិស្សានុសិស្សរបស់ក្រសួងបរិស្ថាន៕
10
