ស្នងការដ្ឋាននគរបាលខេត្តសៀមរាប បំភ្លឺព័ត៌មានករណីគ្រោះថ្នាក់ចរាចរណ៍ ស្ថិតនៅភូមិធ្លកអណ្តូង សង្កាត់ស្លក្រាម ដែលបង្ករឡើងរវាងម៉ូតូសណ្តោងរ៉ឺម៉ក និងម៉ូតូ

ភ្នំពេញ៖ អ្នកនាំពាក្យ និងប្រតិកម្មរហ័ស នៃស្នងការដ្ឋាននគរបាលខេត្តសៀមរាបមានកិត្តិយស សូមជម្រាបជូនសាធារណជន អ្នក សារព័ត៌មាន និងជាពិសេសបណ្តាញទំនាក់ទំនងសង្គមមេត្តាជ្រាបថា៖ ថ្ងៃនេះសង្កេតឃើញតាមបណ្តាញសង្គមមួយចំនួន បានផ្សព្វផ្សាយ ករណីគ្រោះថ្នាក់ចរាចរណ៍នៅថ្ងៃទី១៣ ខែកញ្ញា ឆ្នាំ២០២៤ វេលាម៉ោង១២ និង០០នាទី នៅត្រង់ចំណុច ជាប់របងខាងជើងសាលាបឋមសិក្សាធ្លកអណ្តូង ស្ថិតនៅភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប លើផ្លូវបេតុងខាងជើងសាលាបឋមសិក្សាធ្លកអណ្តូង ដែលបង្ករឡើងរវាងម៉ូតូសណ្តោងរ៉ឺម៉ក និងម៉ូតូ។

តាមហេតុការណ៍ គឺម៉ូតូម៉ាក HONDA DREAM ពណ៌ខ្មៅ ផ្លាកលេខបន្ទាយមានជ័យ 1D.1416 អ្នកបើកបរឈ្មោះ បឹង កាសិត ភេទប្រុស អាយុ ៣៨ឆ្នាំ រស់នៅភូមិអន្លង់កើត ឃុំរលួស ស្រុកប្រាសាទបាគង ខេត្តសៀមរាប បើកបរពីលិចទៅ កើតបុកម៉ូតូសណ្តោងរ៉ឺម៉កមួយគ្រឿងម៉ាក BAJAJ BOXER ពណ៌ក្រហម ផ្លាកលេខ សៀមរាប 1AM. 6690 អ្នកបើកបរ ឈ្មោះ រិន ស្រីយ៉ា ភេទស្រី អាយុ ៣២ឆ្នាំ បច្ចុប្បន្នស្នាក់នៅបន្ទប់ជួលក្នុងភូមិខ្នារ សង្កាត់ជ្រាវ ក្រុងសៀមរាប ខេត្ត សៀមរាប និងមានអ្នករួមដំណើរឈ្មោះ ពេជ្រ សុខវ័ន្ត ភេទប្រុស អាយុ៣៧ឆ្នាំ ត្រូវជាប្តី បើកបរពីលិចទៅកើត។

គ្រោះថ្នាក់នេះ បណ្តាលឱ្យរបួសមនុស្ស ១នាក់ ឈ្មោះ បឹង កាសិត អ្នកបើកបរម៉ូតូកំពុងសម្រាកព្យាបាលនៅមន្ទីរ ពេទ្យបង្អែកខេត្តសៀមរាប ចំណែកឯម៉ូតូ និងម៉ូតូសណ្តោងរ៉ឺម៉ករងការខូចខាត។

ដើម្បីកុំឱ្យមានការភ័ន្តច្រឡំ អ្នកនាំពាក្យ និងប្រតិកម្មរហ័ស នៃស្នងការដ្ឋាននគរបាលខេត្តសៀមរាបសូមបញ្ជាក់ថា៖ ការឃាត់មធ្យោបាយ ក្នុងហេតុការណ៍ដោយយោងលើ ទី១ “ភាគីទាំងពីរ មិនទាន់បានព្រមព្រៀងគ្នានៅឡើយទេ” និងទី២ “ស្ថានភាពរបស់ភាគីម៉ូតូស្ថិតក្នុងមន្ទីរពេទ្យតាមដានពិនិត្យជាចាំបាច់” ។ ដូច្នេះតម្រូវឱ្យសមត្ថកិច្ចជំនាញចាំបាច់ត្រូវអនុវត្តតាមនីតិវិធី ដើម្បីស្វែងរកអ្នកទទួលខុសត្រូវពិតប្រាកដតាមច្បាប់។

អាស្រ័យហេតុនេះ សូមសាធារណជន អ្នកសារព័ត៌មាន និងជាពិសេសបណ្តាញទំនាក់ទំនងសង្គមមេត្តាជ្រាប សូមកុំយល់ច្រឡំចៀសវាងការបកស្រាយផ្សេងដែលធ្វើឱ្យប៉ះពាល់ដល់កិត្តិយសកងកម្លាំងដែលកំពុងអនុវត្តច្បាប់៕