ឧត្តមសេនីយ៍ត្រី អ៊ុំ សុភា នាំយកថវិកាបេឡាមរណសង្គ្រោះ និងអំណោយដ៏ថ្លៃថ្លារបស់សម្តេចធិបតី និងលោកជំទាវ ឧបត្ថម្ភដល់ក្រុមគ្រួសារសពអតីតយុទ្ធជន
ភ្នំពេញ៖ ឯកឧត្តម ឧត្តមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង និងជាប្រធានសមាគមអតីតយុទ្ធជនកម្ពុជាខេត្ត នៅថ្ងៃទី៣ ខែកញ្ញា ឆ្នាំ ២០២៤ បានដឹកនាំ នាយទាហាន និងក្រុមការងារលេខាធិការដ្ឋាន ស.អ.ក ខេត្តកំពង់ឆ្នាំង នាំយកថវិកាបេឡាមរណៈសង្គ្រោះចំនួន ៤លានរៀល លិខិតចូលរួមរំលែកមរណទុក្ខ ព្រមទាំងអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងជាអនុប្រធានទី១ សមាគមអតីតយុទ្ធជនកម្ពុជា និង លោកជំទាវបណ្ឌិត ពេជ ចន្ទមុនី ហ៊ុនម៉ាណែត ក្នុងនោះមាន អង្ករ ៧៥គីឡូក្រាម មី ត្រីខ ទឹកត្រី ទឹកសុីអ៉ីវ ទៅចូលរួមគោរពវិញ្ញាណក្ខន្ធសព លោក ឧត្តមសេនីយ៍ត្រី នន្ទ រាសី សមាជិក សមាគមអតីតយុទ្ធជនកម្ពុជាខេត្ត និងជា អតីត មេបញ្ជាការរង តំបន់ប្រតិបត្តិការសឹករងកំពង់ឆ្នាំង ដែលបានទទួលមរណភាពនៅថ្ងៃទី០២ ខែកញ្ញា ឆ្នាំ២០២៤ ដោយរោគាពាធ នៅគេហដ្ឋានស្ថិតក្នុងភូមិធម្មយុត្តិ សង្កាត់ប្អេរ ក្រុងកំពង់ឆ្នាំង ខេត្តកំពង់ឆ្នាំង ។
ឯកឧត្តម ឧត្តមសេនីយ៍ត្រី អ៊ុំ សុភា ប្រធានសមាគមអតីតយុទ្ធជនកម្ពុជាខេត្ត បានពាំនាំប្រសាសន៍ ផ្តាំផ្ញើ សួរសុខទុក្ខ និងសោកស្ដាយជាទីបំផុត ពីសំណាក់ សម្តេចមហាបវរធិបតី និង លោកជំទាវបណ្ឌិត ជូនដល់គ្រួសារសព លោក ឧត្តមសេនីយ៍ត្រី នន្ទ រាសី ។ ឯកឧត្តម អ៊ុំ សុភា បានបន្តថា ឯកឧត្តម មានការតក់ស្លុតជាខ្លាំងនៅពេលដែលបានទទួលដំណឹងមរណភាពរបស់ លោក នន្ទ រាសី ដែលជាមិត្តរួមអាវុធ តស៊ូជាមួយគ្នាតាំងពីសម័យសង្គ្រាម និងបានបម្រើការងាររួមគ្នាជាច្រើនឆ្នាំ នៅអង្គភាពតំបន់ប្រតិបត្តិការសឹករងកំពង់ឆ្នាំង ដែលបានបន្សល់ទុកនូវអនុស្សាវរីយ៍ដែលមិនអាចកាត់ថ្លៃបាន ។
ឯកឧត្តម បានគូសបញ្ជាក់បន្ថែមទៀតថា មរណភាពរបស់ លោក ឧត្តមសេនីយ៍ត្រី នន្ទ រាសី គឺជាការបាត់បង់ដ៏ធំធេងនូវ ស្វាមី លោកឪពុក លោកតា និងជាការបាត់បង់នូវវីរជនស្នេហាជាតិ ដែលបានតស៊ូពលី ហ៊ានលះបង់សាច់ស្រស់ឈាមស្រស់ នាសម័យសង្គ្រាម ក្នុងបុព្វហេតុនាំយកនូវសុខសន្តិភាព ជូនដល់កូនចៅជំនាន់ក្រោយ ។ ក្នុងនាមមេបញ្ជាការ តំបន់ប្រតិបត្តិការសឹករងកំពង់ឆ្នាំង និងជាប្រធានសមាគមអតីតយុទ្ធជនកម្ពុជាខេត្ត ឯកឧត្តម ឧត្តមសេនីយ៍ត្រី អ៊ុំ សុភា សូមកត់ត្រាទុក និងចងចាំនូវវរភាពដ៏អង់អាចក្លាហានរបស់ លោក ឧត្តមសេនីយ៍ត្រី នន្ទ រាសី ជារៀងរហូតតទៅ ។
មុននឹងបញ្ចប់ ឯកឧត្តម មេបញ្ជាការ បានជូនបានជូនពរដល់គ្រួសារសព លោក នន្ទ រាសី សូមមានសុខភាពល្អ ទទួលបាននូវសេចក្តីសុខ សេចក្តីចម្រើន រកទទួលទានមានបានចាប់ពីពេលនេះតរៀងទៅ ។
តំណាងក្រុមគ្រួសារសព សូមគោរពថ្លែងអអំណរគុណយ៉ាងជ្រាលជ្រៅជាទីបំផុតចំពោះសម្តេចមហាបវរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី និង ឧត្តមសេនីយ៍ត្រី អ៊ុំ សុភា ព្រមទាំងក្រុមការងារ ដែលបានយកចិត្តទុកដាក់ចំពោះបងប្អូនអតីតយុទ្ធជន គ្រប់ពេលវេលា គ្រប់ទីកន្លែង និងសូមគោរពជូនពរសម្តេច និងលោកជំទាវ ព្រមទាំងឯកឧត្តម អស់លោក លោកស្រី ទាំងអស់ សូមទទួលបាននូវពុទ្ធពរទាំងបួនប្រការ កុំបីឃ្លៀងឃ្លាតឡើយ ។
