រដ្ឋមន្ត្រីមហាផ្ទៃ អំពាវនាវឱ្យដាក់បម្រាមមិនឱ្យរថយន្តធុនធំធ្វើដំណើរក្នុងពិធីបុណ្យជាតិដើម្បីកាត់បន្ថយគ្រោះថ្នាក់ចរាចរណ៍

ភ្នំពេញ៖ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ កាលពីថ្ងៃអង្គារ ទី១៣ ខែសីហា ឆ្នាំ២០២៤ បានអំពាវនាវឱ្យគណៈកម្មការជាតិសុវត្ថិភាពចរាចរណ៍ផ្លូវគោកកម្ពុជា គួរតែដាក់បម្រាមចំពោះរថយន្តធុនធំៗឱ្យផ្អាកធ្វើដំណើរជាបណ្តោះអាសន្នក្នុងពេលពិធីបុណ្យជាតិខ្មែរ ដើម្បីកាត់បន្ថយគ្រោះថ្នាក់ចរាចរណ៍នៅពេលប្រជាពលរដ្ឋធ្វើដំណើរទៅស្រុកកំណើត។

បើយោងតាមវីដេអូឃ្លីបខ្លីមួយនៅលើគណនីហ្វេសប៊ុកផ្ទាល់ខ្លួនរបស់ឯកឧត្តមអភិសន្តិបណ្ឌិត ស សុខា បានឱ្យដឹងថា ការអំពាវនាវនេះធ្វើឡើងក្រោយក្រសួងមហាផ្ទៃបានកត់សម្គាល់ និងទទួលបានរបាយការណ៍ពីករណីគ្រោះថ្នាក់ចរាចរណ៍ជារៀងរាល់ឆ្នាំដែលបានកើតឡើងក្នុងអំឡុងពេលប្រជាពលរដ្ឋធ្វើដំណើរទៅលេងស្រុកកំណើតពេលមានពិធីបុណ្យទានម្តងៗ។

ក្នុងនោះ ឯកឧត្តមឧបនាយករដ្ឋមន្ត្រី បានគូសបញ្ជាក់ថា គណៈកម្មការជាតិសុវត្ថិភាពចរាចរណ៍ផ្លូវគោកគួរតែគិតគូរ និងរៀបចំប្រតិទិនដើម្បីឱ្យពលរដ្ឋដែលប្រកបរបបរកស៊ីដោយបើកបររថយន្តធំៗបានត្រៀមខ្លួន និងបញ្ជៀសការបើកបរក្នុងពេលពិធីបុណ្យជាតិធំៗ។

ឯកឧត្តមឧបនាយករដ្ឋមន្ត្រី ក៏សូមឱ្យគណៈកម្មការជាតិសុវត្ថិភាពចរាចរណ៍ផ្លូវគោក មេត្តាពិនិត្យ បើអាចជារៀងរាល់ឆ្នាំ កម្មវិធីធំៗបុណ្យជាតិនេះគួរតែរៀបចំជាប្រតិទិនតែម្តង ដូចឡានកុងតាន័រធំៗពីថ្ងៃនេះដល់ថ្ងៃនោះគឺមិនឱ្យអ្នកបើកឡានចេញតែម្តង។

ឯកឧត្តមឧបនាយករដ្ឋមន្ត្រី ក៏បានឱ្យទៀតដឹងថា យោងតាមការពិតជាក់ស្តែងក្នុងពិធីបុណ្យជាតិធំៗម្តងៗ គ្រោះថ្នាក់ចរាចរណ៍គឺតែងតែកើតមានមិនថាតិចឬច្រើនដោយករណីខ្លះអាចឈានដល់ការបាត់បង់អាយុជីវិត និងជាពិសេសបានបង្កគ្រោះថ្នាក់ដល់អ្នកធ្វើដំណើរដទៃទៀតផង ដែលការណ៍នេះជាកត្តារួមមួយធ្វើឱ្យគ្រោះថ្នាក់ចរាចណ៍នៅក្នុងប្រទេសកម្ពុជានៅតែបន្តកើនឡើង។

យ៉ាងណាជុំវិញករណីនេះគណៈកម្មការជាតិសុវត្ថិភាពចរាចរណ៍ផ្លូវគោកក៏ត្រូវតែរៀបចំ ឬជូនដំណឹងជាមុនឱ្យបានយ៉ាងហោចណាស់មួយឆ្នាំដើម្បីងាយស្រួលឱ្យអ្នកបើកបររថយន្តធំៗទាំងអស់បានត្រៀមខ្លួន និងធ្វើដំណើរឱ្យបានមុនថ្ងៃផ្អាកចរាចរណ៍មកដល់ ដោយមិនអាចប្រកាសផ្អាកការធ្វើដំណើរមុនត្រឹមតែ៣ ឬ៤ថ្ងៃនោះទេ។

គួរបញ្ជាក់ថា កាលពីពិធីបុណ្យចូលឆ្នាំប្រពៃណីខ្មែរដែលមានរយៈពេល ៤ថ្ងៃចាប់ពីថ្ងៃទី​១៣ដល់១៦ ខែមេសា ឆ្នាំ២០២៤ កន្លងទៅនេះ ប្រជាពលរដ្ឋដែលបានធ្វើដំណើរទៅលេងស្រុកកំណើតបានជួបប្រទេះគ្រោះថ្នាក់ចរាចរណ៍សរុបចំនួន៦៤ករណី នៅតាមបណ្តាខេត្តនានាទូទាំងប្រទេសដោយក្នុងនោះមនុស្សសរុបចំនួន ៣៧នាក់បានស្លាប់ និង៨៨នាក់បានរងរបួស។ នេះបើតាមក្រសួងសាធារណៈការ និងដឹកជញ្ជូន ៕