ឯកឧត្តម រដ្ឋមន្ត្រី ថោ ជេដ្ឋា អញ្ជើញចូលរួមក្នុងកិច្ចប្រជុំអន្តរក្រសួងដើម្បីពិនិត្យវឌ្ឍនភាពការងារចុះបញ្ជី ដីនៅតំបន់ជុំវិញបឹងទន្លេសាប

ភ្នំពេញ៖ នៅសាលប្រជុំនៃ ទីស្ដីការក្រសួងរៀបចំដែនដី នគរូបនីយកម្ម និង សំណង់ នាព្រឹកថ្ងៃទី៧ ខែសីហា ឆ្នាំ ២០២៤ នេះ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និង ឧតុនិយម អនុប្រធាន គណៈកម្មការចំពោះកិច្ចចុះបញ្ជីដីតំបន់ទន្លេសាប និង ជាប្រធានអាជ្ញាធរទន្លេសាប អមដោយឯកឧត្តមរដ្ឋលេខាធិការប្រចាំការ ឯកឧត្តម ជាថ្នាក់ដឹកនាំ ក្រសួង ឯកឧត្តម អនុប្រធាន និង អគ្គលេខាធិការអាជ្ញាធរទន្លេសាប បានអញ្ជើញចូលរួមកិច្ចប្រជុំ អន្តរក្រសួងដើម្បីពិនិត្យវឌ្ឍនភាពការងារ ចុះបញ្ជី ដីនៅតំបន់ជុំវិញបឹងទន្លេសាប ក្រោមអធិបតីភាពដ៏ខ្ពង់ខ្ពស់របស់ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រី ក្រសួងរៀបចំដែនដី នគរូបនីយកម្ម និង សំណង់។

សូមជម្រាបថា តំបន់ជុំវិញបឹងទន្លេសាបគ្របដណ្តប់ ក្នុងខេត្តចំនួន៦ មានខេត្ត កំពង់ឆ្នាំង ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ ខេត្តសៀមរាប ខេត្តកំពង់ធំ ត្រូវបានបែងចែកជាបីគឺ៖ តំបន់១ តំបន់២ និង តំបន់៣។ ក្នុងនោះតំបន់១ ជាតំបន់លំនៅដ្ឋាន និង ស្រែចំការរបស់ប្រជាពលរដ្ឋ ដែលទទួលបានកម្មសិទ្ធស្របច្បាប់ និងអាចលិចទឹកប ន្តិចបន្តួចនៅរដូវវស្សា។ តំបន់២ ជាតំបន់ប្រើប្រាស់អាស្រ័យផល និងរក្សាទុកជាតំបន់ទ្រនាប់ការពារ ជាតំបន់ប្រជាពលរដ្ឋធ្វើស្រែឡើងទឹក និងប្រដេញទឹក ហើយ តំបន់នេះ អាចលិចទឹកនៅរដូវវស្សាកម្រិតកម្ពស់ពី ៣ ទៅ ៤ ម៉ែត្រ។ ចំណែក តំបន់ ៣ ជាតំបន់ដែនព្រៃលិចទឹក ហាមឃាត់ដាច់ខាត ដែល អាចលិចទឹកនៅរដូវវស្សាកម្រិតកម្ពស់ពី ៦ ទៅ ៧ ម៉ែត្រ៕