ភ្នំពេញ៖ ឯកឧត្តម អ៊ុន ចាន់ដា អភិបាលខេត្តកំពង់ចាម និងជាប្រធានកិត្តិយសគណៈកម្មាធិការសមាគមអតីតយុទ្ធជនកម្ពុជាខេត្ត និង ឯកឧត្តម ខ្លូត ផន ប្រធានក្រុមប្រឹក្សាខេត្ត នាថ្ងៃទី១៣ ខែកក្កដា ឆ្នាំ២០២៤ បានអញ្ជើញជាគណៈអធិបតីក្នុងពិធីអបអរសាទរខួបលើកទី១៧ ទិវាអតីតយុទ្ធជនកម្ពុជា ដែលធ្វើឡើងនៅសាលាខេត្តកំពង់ចាម។
ក្នុងឱកាសនោះ ឯកឧត្តម អ៊ុន ចាន់ដា បានក្រេីនរំលឹកដល់អតីតយុទ្ធជន ត្រូវយកចិត្តទុកដាក់ថែរក្សាសុខភាពឱ្យបានល្អ ដេីម្បីអាយុយឺនយូរ ដោយប្រេីប្រាស់ប័ណ្ណ បសស ទៅពិនិត្យសុខភាព នៅមន្ទីរពេទ្យឱ្យបានទៀងទាត់ និងធ្វើលំហាត់ប្រាណ រួមទាំងលេបថ្នាំត្រូវទៀងទាត់ ពោលគឺធ្វើយ៉ាងណាឱ្យសុខភាពទាំងផ្លូវកាយ និងសុខភាពផ្លូវចិត្ត ឱ្យល្អប្រសើរឡើងទាំងទ្វេផងដែរ ។
ថ្លែងក្នុងឱកាស ឯកឧត្តម អ៊ុន ចាន់ដា ប្រធានកិត្តិយសសមាគមអតីយុទ្ធជនកម្ពុជាខេត្តកំពង់ចាម បានលេីកឡេីងថា អតីតយុទ្ធជនយើងទទួលបានការគោរព ការលេីកកម្ពស់គុណតម្លៃទាំង៣យ៉ាង គឺ១-ទទួលបានកិត្តិយសក្នុងការកសាងប្រវត្តិសាស្ត្រ ដោយបានចូលរួមចំណែកយ៉ាងសំខាន់ក្នុងកិច្ចការពារ បូរណភាពទឹកដី ការកសាងសុខសន្តិភាព និងស្ថិរភាពសង្គមសម្រាប់ ព្រះរាជាណាចក្រកម្ពុជា ។ ២-ទទួលបានជីវភាពសមរម្យ តាមរយៈប័ណ្ណ បសស ក៏ដូចជា ដីធ្លី និងផ្ទះសម្បែង រួមទាំងការថែទាំសុខភាព ធ្វេីយ៉ាងណាឱ្យជីវភាពរស់នៅមានលំនឹង ។ ៣-ទទួលបានឱកាសការងារសម្រាប់កូនចៅរបស់ខ្លួន ផងដែរ ។
ក្នុងឱកាសនោះដែរ ឯកឧត្តម អ៊ុន ចាន់ដា បានពាំនាំប្រសាសន៍ផ្តាំផ្ញើសួរសុខទុក្ខ ពីសំណាក់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជនកម្ពុជា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា និងជាអនុប្រធានទី១ សមាគមអតីតយុទ្ធជនកម្ពុជា ជានិច្ចកាលតែងតែចាត់ទុកស្មារតី នៃការតស៊ូដ៏អង់អាចក្លាហាន និងពលិកម្មដ៏ស្មោះស័គ្រ្ម របស់អតីតយុទ្ធជនកម្ពុជា ដើម្បីបុព្វហេតុជាតិមាតុភូមិ ជាគំរូវីរភាពស្នេហាជាតិដ៏ឧត្តុង្គឧត្តម និងគុណបំណាចដល់ធំធេងដែលត្រូវបានកត់ត្រាទុកក្នុងប្រវត្តិសាស្រ្ដជាតិ ។
ឯកឧត្តម អ៊ុន ចាន់ដា ប្រធានកិត្តិយសសមាគមខេត្ត បានថ្លែងនូវការកោតសរសេីរចំពោះគណៈកម្មាធិការសមាគមអតីតយុទ្ធជនខេត្តកំពង់ចាម ក្នុងរយៈពេលកន្លងមកនេះបានខិតខំយកចិត្តទុក ដាក់ជំរុញដល់ការលើកម្ពស់កម្រិតជីវភាពរស់នៅរបស់បងប្អូនអតីតយុទ្ធជន តាមរយៈការចុះពិនិត្យស្ថានភាពរស់នៅ ជាក់ស្ដែងដល់មូលដ្ឋានផ្ទាល់ ហើយបានរកឃើញអតីតយុទ្ធជន ខ្លះមានដី-គ្មានផ្ទះ ខ្លះមានផ្ទះមិនសមរម្យ ខ្លះគ្មានទាំងដី-គ្មានទាំងផ្ទះ និងខ្លះទៀតរស់នៅលើដីសាធារណៈ ។ តាមរយៈការរកឃើញបែបនេះ សមាគមខេត្តកំពង់ចាមយើង បានស្នើសុំការជួយសាងសង់ផ្ទះ ការផ្ដល់ដីសម្បទានសង្គមកិច្ច និងការជួសជុលកែលម្អផ្ទះឱ្យបានសមរម្យជាបន្ដបន្ទាប់រហូតមកដល់បច្ចុប្បន្ននេះ ។
ជាមួយគ្នានោះ ឯកឧត្តម អ៊ុន ចាន់ដា ក៏បាននាំយកអំណោយដ៏ថ្លៃថ្លារបស់ សម្តេចមហាបរវធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជណាចក្រកម្ពុជា និងជាអនុប្រធានទី១ សមាគមអតីតយុទ្ធជនកម្ពុជា ចែកជូនដល់បងប្អូនអតីត យុទ្ធជនទាំង ៣០២នាក់ ដោយក្នុងម្នាក់ៗ ទទួលបានថវិកា ៥ម៉ឺនរៀល អង្ករ ២៥គីឡូ មី១កេស ទឹកត្រី១យួ និងទឹកស៊ីអ៊ីវ១យួ ផងដែរ ៕
