នាយករដ្ឋមន្ត្រី ហ៊ុន ម៉ាណែត ស្នើដល់សិល្បករគ្រប់ទម្រង់រួមគ្នារក្សាចាស់ បង្កើតថ្មី និងអភិវឌ្ឍន៍ឲ្យបានច្រើនចំពោះស្នាដៃជាពិសេសចងក្រង នូវទម្រង់សិល្បៈនានាដែលមានហានិភ័យបាត់វត្តមាន

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍អំពាវនាវដល់អ្នកជំនាញ និងភាគីពាក់ព័ន្ធសូម ស្រាវជ្រាវចងក្រងនូវទម្រង់សិល្បៈនានា ដែលមានហានិភ័យបាត់វត្តមាន ដោយយកមកចងក្រងជាឯកសារ និងផ្សព្វផ្សាយឱ្យបានច្រើន ដើម្បីចូលរួមថែរក្សា និងអភិរក្ស។

សម្តេចធិបតី ហ៊ុន ម៉ាណែត បានមានប្រសាសន៍បែបនេះ ក្នុងឱកាសដែលសម្តេចអញ្ជើញជាអធិបតីក្នុងពិធី “អ្នកស្នងមរតក” ក្រោមពាក្យស្លោក រក្សាចាស់ បង្កើត និងអភិវឌ្ឍថ្មី នៅមជ្ឈមណ្ឌលសន្និបាត និង ពិព័រណ៍អន្តរជាតិជ្រោយចង្វារ នារសៀលថ្ងៃទី៣១ ខែឧសភា ឆ្នាំ២០២៤នេះ។

សម្តេចធិបតី ហ៊ុន ម៉ាណែត ក៏បានស្នើសិល្បករគ្រប់ទម្រង់រួមគ្នារក្សាចាស់ បង្កើតថ្មី និងអភិវឌ្ឍន៍ឲ្យបានច្រើនចំពោះស្នាដៃតាមខ្មែរ។

សម្ដេចធិបតី នាយករដ្ឋមន្ត្រី បានថ្លែងស្នើដល់អ្នកនិពន្ធទាំងអស់ ដែលចង់បង្កើតស្នា ដៃថ្មី សូមបញ្ចូលសារអប់រំទៅក្នុងស្នាដៃនោះ និងត្រូវចូលរួមលើកគុណតម្លៃសីលធម៌សង្គម ហើយក៏ មិនត្រូវលួចចម្លងស្នាដៃរបស់អ្នកដទៃនោះដែរ។

សម្តេចធិបតី នាយករដ្ឋមន្ត្រី បានគូសបញ្ជាក់ថា សិល្បករគ្រប់រូបត្រូវរួមគ្នាជួយអភិរក្ស ផ្សព្វផ្សាយសិល្បៈវប្បធម៌ខ្មែរឲ្យបានគង់វង្ស។

សម្តេចធិបតី ហ៊ុន ម៉ាណែត មានប្រសាសន៍បន្តថា “បើយើងមិនថែរក្សាសិល្បៈរបស់យើង គ្មានអ្នកណាមកថែរក្សាជំនួសឡើយ យើងត្រូវថែរក្សាអត្ថសញ្ញាណជាតិតាមរយះសិល្បៈវប្បធម៌ ៕