រដ្ឋមន្ត្រីក្រសួងផែនការ ដឹកនាំកិច្ចប្រជុំគណៈកម្មការអន្តរក្រសួងសម្រាប់អនុវត្តគោលដៅអភិវឌ្ឍប្រកបដោយចីរភាពកម្ពុជា ឆ្នាំ២០១៦-២០៣០
ភ្នំពេញ៖ នៅព្រឹកថ្ងៃទី១៥ ខែឧសភា ឆ្នាំ២០២៤ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ និងជាប្រធានគណៈកម្មការអន្តរក្រសួងសម្រាប់អនុវត្តគោលដៅអភិវឌ្ឍប្រកបដោយចីរភាពកម្ពុជា ២០១៦-២០៣០ (គ.អ.គ.អ.ច.ក.) បានអញ្ជើញដឹកនាំកិច្ចប្រជុំរបស់ (គ.អ.គ.អ.ច.ក.) នៅទីស្តីការក្រសួងផែនការ។
(គ.អ.គ.អ.ច.ក.) ត្រូវបានបង្កើតឡើងដើម្បីដឹកនាំនិងសម្របសម្រួលដំណើរការធ្វើមូលដ្ឋានីយកម្ម និងអនុវត្ត (គ.អ.ច.ក.) ក្នុងបរិការណ៍ដែលកម្ពុជាត្រូវឈានទៅសម្រេចគោលដៅអភិវឌ្ឍប្រកបដោយចីរភាពរបស់អង្គការសហប្រជាជាតិ ឆ្នាំ២០៣០។
គួររំលឹកផងដែរថា ក្នុងរយៈពេលជាងមួយទសវត្សរ៍ក្នុងវដ្ដយុទ្ធសាស្ត្រចតុកោណ ដំណាក់កាលទី១ និងទី២ តាមរយៈគោលនយោបាយដ៏ត្រឹមត្រូវរបស់រាជរដ្ឋាភិបាល កម្ពុជាសម្រេចបាននូវគោលដៅធំៗជាច្រើន ដោយធានាបាននូវសុខសន្តិភាពពេញលេញ ស្ថិរភាពនយោបាយ វិបុលភាពសង្គម និងការកាត់បន្ថយភាពក្រីក្រយ៉ាងឆាប់រហ័សដែលមិនធ្លាប់មានពីមុនមក។ ជាមួយគ្នានេះ កម្ពុជាបានធ្វើមូលដ្ឋានីយកម្មគោលដៅអភិវឌ្ឍន៍សហស្សវត្សរ៍សកលលោក មកក្នុងបរិការណ៍កម្ពុជា ដូចមាន គោលដៅអភិវឌ្ឍន៍សហស្សវត្សរ៍កម្ពុជា (គ.អ.ស.ក.) ដែលកម្ពុជាសម្រេចបានគោលដៅជាច្រើន មុនកាលកំណត់នាចុងឆ្នាំ២០១៥ កន្លងទៅ។ ក្រោយមក គោលដៅអភិវឌ្ឍប្រកបដោយចីរភាព (គ.អ.ច.) ក៏ត្រូវបានចូលមកជំនួស និងចាប់អនុវត្តពីឆ្នាំ២០១៦ រហូតមក។
គួររំលឹកថា ប្រទេសកម្ពុជាបានប្រកាន់យករបៀបវារៈឆ្នាំ២០៣០ សម្រាប់ការអភិវឌ្ឍប្រកបដោយចីរភាព នាសម័យប្រជុំប្រចាំឆ្នាំរបស់មហាសន្និបាតអង្គការសហប្រជាជាតិ កាលពីខែកញ្ញា ឆ្នាំ២០១៥ ដែលមានការចូលរួមពីប្រទេសជាសមាជិកប្រមាណ ១៩៣។ គោលដៅអភិវឌ្ឍប្រកបដោយចីរភាព (គ.អ.ច.) របស់អង្គការសហប្រជាជាតិ គឺជាគោលដៅដែលទាក់ទងនឹងការអភិវឌ្ឍអន្តរជាតិ ហើយត្រូវបានផ្សព្វផ្សាយជាគោលដៅសកល សម្រាប់ការអភិវឌ្ឍប្រកបដោយចីរភាព។ (គ.អ.ច.) មានអាទិភាពសកលសំខាន់ចំនួន២ គឺ (១) ការធានានូវចីរភាពបរិស្ថាន (ជាពិសេស ការគំរាមកំហែងដែលបង្កឡើងដោយការប្រែប្រួសអាកាសធាតុ) និង (២) ការកាត់បន្ថយភាពក្រីក្រ ដោយបានបង្កើនគោលដៅរហូតដល់ចំនួន១៧ និង ១៦៩ចំណុចដៅ។ ក្នុងនិន្នាការនេះ រាជរដ្ឋាភិបាលកម្ពុជាបានបន្តការខិតខំរបស់ខ្លួន ដើម្បីធ្វើមូលដ្ឋានីយកម្មគោលដៅសកលនៃ គ.អ.ច. ឱ្យស្របទៅនឹងបរិការណ៍កម្ពុជា ពោលគឺ គោលដៅអភិវឌ្ឍប្រកបដោយចីរភាពកម្ពុជា (គ.អ.ច.ក.) ហើយ (គ.អ.ច.ក.) នេះ ត្រូវបានធ្វើសមាហរណកម្មទៅក្នុងផែនការយុទ្ធសាស្ត្រអភិវឌ្ឍន៍ជាតិ (ផ.យ.អ.ជ.) និងផែនការយុទ្ធសាស្ត្រអភិវឌ្ឍន៍តាមវិស័យផងដែរ។ ប្រទេសកម្ពុជា បានជ្រើសរើសយកគោលដៅទាំង១៧ នៃ គ.អ.ច. និងបន្ថែមគោលដៅថ្មីមួយគឺ “បញ្ចប់ផលប៉ះពាល់ជាអវិជ្ជមានរបស់គ្រាប់មីននិងសំណល់ពីសង្គ្រាម និងជំរុញការសង្គ្រោះជនរងគ្រោះ” ដែលឆ្លុះបញ្ចាំងពីអាទិភាពជាតិក្នុងការបោសសម្អាតគ្រាប់មីននៅក្នុងប្រទេស។ ប្រការនេះ នាំឲ្យគោលដៅអភិវឌ្ឍប្រកបដោយចីរភាពកម្ពុជា (គ.អ.ច.ក.) មានគោលដៅសរុបចំនួន១៨ និង ៨៨ចំណុចដៅ។
ជាថ្មីម្តងទៀត ដើម្បីបន្តពង្រឹងនិងកសាងមូលដ្ឋានគ្រឹះមួយប្រកបដោយភាពរឹងមាំសម្រាប់គាំទ្រដល់ដំណើរការអភិវឌ្ឍជាតិប្រកបដោយចីរភាព រាជរដ្ឋាភិបាល នីតិកាលទី៧ ក្រោមការដឹកនាំប្រកបដោយគតិបណ្ឌិតដ៏ឈ្លាសវៃរបស់ សម្ដេចមហាបវរធិបតីនាយករដ្ឋមន្ត្រី រាជរដ្ឋាភិបាលដែលមានក្រសួងផែនការជាសេនាធិការ បានបង្កើតគណៈកម្មការអន្តរក្រសួងសម្រាប់អនុវត្តគោលដៅអភិវឌ្ឍប្រកបដោយចីរភាពកម្ពុជា ឆ្នាំ២០១៦-២០៣០។ កិច្ចប្រជុំនាព្រឹកនេះ ត្រូវបានរៀបចំឡើងដើម្បីប្រកាសសមាសភាពរបស់ (គ.អ.គ.អ.ច.ក.) និងលើកទិសដៅការងារដើម្បីតាមដានត្រួតពិនិត្យការអនុវត្តក្របខ័ណ្ឌគោលដៅអភិវឌ្ឍប្រកបដោយចីរភាពកម្ពុជា ២០១៦-២០៣០ ៕
