វគ្គហ្វឹកហ្វឺនពលទាហាន ជំនាន់ទី១១ បំពេញក្របខ័ណ្ឌយោធភូមិភាគទី១ នៅសាលាពលទាហានទី១ ឆ្លងកាត់ការសិក្សារយៈពេល ៩១ថ្ងៃ បានបិទបញ្ចប់ដោយជោគជ័យ
ភ្នំពេញ៖ នៅសាលាពលទាហានទី១ អង្គភាពយោធភូមិភាគទី១ មានរៀបចំពិធីបិទវគ្គហ្វឹកហ្វឺនពលទាហាន ជំនាន់ទី១១ បំពេញក្របខ័ណ្ឌយោធភូមិភាគទី១ ដែលពិធីនេះប្រព្រឹត្តទៅក្រោមអធិបតីភាព លោកឧត្តមសេនីយ៍ទោ ឯក ចេត្តនា មេបញ្ជាការរងយោធភូមិភាគទី១ តំណាងឲ្យឯកឧត្តម ឧត្តមសេនីយ៍ទោលី សូរ៉ារិទ្ធ មេបញ្ជាការយោធភូមិភាគទី១ ។
វរសេនីយ៍ត្រី ថាត់ សួន នាយរងការិយាល័យហ្វឹកហ្វឺនសាលាពលទាហានទី ១ បានធ្វើសេចក្តីរាយការណ៍ថា៖ ពិធីបិទវគ្គហ្វឹកហ្វឺនពលទាហាន ជំនាន់ទី១១ បំពេញក្របខ័ណ្ឌយោធភូមិភាគទី១ ដោយឆ្លងកាត់ការអប់រំរៀនសូត្ររបស់យោធាចារ្យ គ្រប់មុខវិជ្ជាគួបផ្សំ និងការខិតខំហាត់ពត់លត់ដំគោរពអង្គការវិន័យសាលា និងការយកចិត្តដាក់ក្រេបជញ្ជក់នូវខ្លឹមសារមេរៀនរបស់យោធាចារ្យ ទាំងនៅក្នុងថ្នាក់រៀន ក៏ដូចជានៅលើទៅលានហាត់ធ្វើឲ្យមានការលើកកំពស់សមត្ថភាពរបស់សិក្ខាកាមម្នាក់ៗ ព្រមទាំងទទួលបានលទ្ធផលល្អប្រសើរសំរាប់វគ្គសិក្សា។
ជាលទ្ធផលបញ្ជប់វគ្កសិក្សាយើងទទួលបាន និទេ្ទសល្អចំនួន ៣នាក់ស្មើនិង ៦,៥២% , និទ្ទេសល្អបង្គួរចំនួន ៤៣នាក់ ស្មើនិង ៩៣,៤៨% វាយតម្លៃអង្គភាពទទួលបាននិទេ្ទសល្អ។
មានមតិផ្តាំផ្ញើចំពោះសិក្ខាកាមក្នុងឱកាសនោះ ឧត្តមសេនីយ៍ទោ ឯក ចេត្តនា មានប្រសាសន៍ថា៖ ដើម្បីសំរេចនូវ គោលដៅក្នុងការ ការពារជាតិ ការពារបូរណភាពទឹកដីឲ្យបានស្ថិតស្ថេរគង់វង្ស ក្នងនាមជាកងយោធពលខេមរភូមិន្ទ ត្រូវតែខិតខំរៀនសូត្រ ដុះខាត់នូវគ្រប់មុខជំនាញឯកទេសនានា ដើម្បីបង្កើនសមត្ថភាពរបស់់បុគ្គលម្នាក់ៗ សំដៅធានាបាននូវជ័យជំនះលើសមរភូមិប្រយុទ្ធ ។
ឯកឧត្តមបានសង្កត់ធ្ងន់ថា៖ កងទ័ពគឺជាសរសរទ្រូងរបស់ប្រទសជាតិត្រូវតាំងចិត្តប្តេជ្ញាស្មោះត្រង់ដាច់ខាតចំពោះជាតិមាតុភូមិ ប្តេជ្ញាការពាររដ្ឋធម្មនុញ ការពារព្រះមហាក្សត្រ. ការពាររាជរដ្ឋាភិបាលស្របច្បាប់ ប្រឆាំងដាច់ខាតរាល់សង្គ្រាមចិត្តសាស្ត្ររបស់ខ្មាំង ដែលបំរើនយោបាយដ៏ខ្មៅកខ្វក់របស់ជនក្បត់ជាតិមួយក្តាប់តូច ដែលចង់បង្កអស្ថិរភាពដល់សង្គមជាតិ ។
ឯកឧត្តមបានផ្តាំផ្ញើសិក្ខាកាមទាំងអស់ពេលត្រឡប់ទៅកាន់អង្គភាពដើមវិញ ត្រូវប្រែក្លាយចំណេះដឹងដែលទទួលបានពីសាលាប្រែក្លាយទៅជាសកម្មភាពជាក់ស្តែង ក្នុងការបំពេញភារកិច្ច ដោយខិតខំគោរពច្បាប់របស់រដ្ឋ គោរពវិន័យ និងបទបញ្ជារបស់កងទ័ព បង្កើននូវមនសិការស្នេហាជាតិហ៊ានធ្វើពលិកម្មគ្រប់បែបយ៉ាងដើម្បីបុព្វហេតុ ជាតិ និងសេចក្តីសុខក្សេមក្សាន្តរបស់បងប្អូនប្រជាពលរដ្ឋ រួមចំណែក កសាងនិងអភិវឌ្ឍន៍ប្រទេសជាតិឲ្យបានរីកចំរើន រឹងមាំ ជានិច្ចនិរន្តន៍ ៕