រដ្ឋមន្រ្តី កើត រិទ្ធ៖ ប្រទេសជាតិមួយខ្លាំង ទាល់តែប្រជាជនខ្លាំង
ភ្នំពេញ៖ ឯកឧត្ដម កើត រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ បានលើកឡើងថា ប្រទេសជាតិមួយខ្លាំង ទាល់តែប្រជាជនខ្លាំង ហើយបើប្រទេសជាតិ មានប្រជាជនខ្លាំង រឿងសំខាន់ដែលត្រូវធ្វើមានតែពីរទេ គឺការអប់រំ និងសុខភាព។
ក្នុងឱកាសបើកមហាសន្និបាត បូកសរុបលទ្ធផលការងារវិស័យយុត្តិធម៌ទូទាំងប្រទេស ឆ្នាំ២០២៣ និងលើកទិសដៅអាទិភាព ឆ្នាំ២០២៤ នៅថ្ងៃទី២៧ ខែមីនា ឆ្នាំ២០២៤ ឧបនាយករដ្ឋមន្រ្តី កើត រិទ្ធ បញ្ជាក់ថា «បើតាមន័យនយោបាយ ប្រទេសជាតិមួយខ្លាំង ទាល់តែប្រជាជនខ្លាំង បើប្រជាជនខ្លាំង មានតែពីរទេដែលយើងត្រូវធ្វើ ទីមួយការអប់រំ ទីពីរសុខភាព»។
ឯកឧត្ដមមានប្រសាសន៍ថា អីចឹងហើយ ទើបយុទ្ធសាស្រ្តបញ្ចកោណមិនប្រើពាក្យ ធនធានមនុស្សទេ គឺប្រើពាក្យមូលធនមនុស្ស ក្រៅពីមានចំណេះដឹងហើយ ត្រូវមានសុខភាពល្អមួយទៀត។ អ៊ីចឹង គឺតាមវិធានពីរនេះ គឺកសាងអ្វី គឺកសាងកម្លាំងជាតិ។ ឯកឧត្ដមថា ការកសាងកម្លាំងជាតិនេះ គឺទាមទារពេលវេលាក្នុងការកសាង ប៉ុន្តែពេលវេលានេះក៏ដោយ ឲ្យតែយើងបោះជំហានតទៅមុខ ៕
