សម្តេចធិបតី៖ រាជរដ្ឋាភិបាលខិតខំជំរុញការអភិវឌ្ឍឲ្យបានគ្រប់ទីកន្លែង ដើម្បីឲ្យពលរដ្ឋទទួលបានផលប្រយោជន៍ដូចៗគ្នា
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ថា រាជរដ្ឋាភិបាលខិតខំជំរុញការអភិវឌ្ឍឲ្យបានគ្រប់ទីកន្លែង ដើម្បីឲ្យប្រជាពលរដ្ឋទទួលបានផលប្រយោជន៍ដូចៗគ្នា។
សម្តេចធិបតី ហ៊ុន ម៉ាណែត បានមានប្រសាសន៍បែបនេះ ក្នុងឱកាសដែលសម្តេចអញ្ជើញបើកពិធីបុណ្យទន្លេ លើកទី៨ ក្រោមប្រធានបទ «ទន្លេដើម្បីសន្តិភាព និងការអភិវឌ្ឍ» នៅក្នុងខេត្តសៀមរាប នាយប់ថ្ងៃទី១៦ ខែមីនា ឆ្នាំ២០២៤។
ក្នុងឱកាសនោះ សម្តេចធិបតី ហ៊ុន ម៉ាណែត បានថ្លែងថា គ្រប់គោលនយោបាយរបស់រាជរដ្ឋាភិបាល គឺដើម្បីប្រជាពលរដ្ឋខ្មែរទាំងអស់គ្នា។ សម្ដេចថា ផលលាភនៃសុខសន្តិភាពបានធ្វើឲ្យកម្ពុជាមានអ្វីៗទាំងអស់ ហើយប្រជាពលរដ្ឋរស់នៅប្រកបដោយភាពសម្បូរសប្បាយ។
សម្ដេចធិបតី នាយករដ្ឋមន្ត្រី បានបញ្ជាក់ថា វិស័យទេសចរណ៍នឹងនៅតែមានសារៈសំខាន់សម្រាប់ជាសន្ទល់សេដ្ឋកិច្ចនិងបង្កើតឱកាសការងារប្រាក់ចំណូលជូនប្រជាពលរដ្ឋ។
សម្ដេចធិបតី នាយករដ្ឋមន្ត្រី បានបញ្ជាក់បន្តទៀតថា កម្ពុជាកំពុងក្លាយជាគម្រូដ៏ល្អក្នុងការអភិរក្សប្រាង្គប្រាសាទបុរាណនានានៅតំបន់អង្គរបានយ៉ាងល្អប្រសើរ ៕
