សម្តេចធិបតី៖ ការបញ្ចប់ថ្នាក់ឧត្តមសិក្សាជាសមិទ្ធផលធំ កើតចេញពីការប្រឹងប្រែង និងទិសដៅច្បាស់លាស់របស់និស្សិត
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា ការបញ្ចប់ឧត្តមសិក្សាជាសមិទ្ធផលធំ ដែលកើតចេញពីការប្រឹងប្រែង និងការកំណត់ទិសដៅច្បាស់លាស់របស់និស្សិតម្នាក់ៗ។
ក្នុងឱកាសអញ្ជើញសម្ពោធអគារសាកលវិទ្យាល័យជាតិគ្រប់គ្រង សាខាវាលស្បូវ និងប្រគល់សញ្ញាបត្រជូននិស្សិតជាង ៥ពាន់នាក់ នាព្រឹកថ្ងៃទី១៥ ខែកុម្ភៈ ឆ្នាំ២០២៤ សម្តេចធិបតី ហ៊ុន ម៉ាណែត បញ្ជាក់ថា «សមិទ្ធផលនេះ គឺកើតចេញជាសមិទ្ធផលរួម ដែលទី១ កើតចេញពីនិស្សិតខ្លួនឯង ដែលខ្ញុំសូមចូលរួមអបអរសាទរណាស់ ចំពោះជោគជ័យ។ ការរៀនសូត្រ ក៏ដូចជាការងារផ្សេងៗ មិនមែនប្រើតែ ១ថ្ងៃនោះទេ។ ខ្ញុំមិនជឿថា និស្សិតចុះឈ្មោះម្សិលមិញ ថ្ងៃនេះពាក់អាវទទួលសញ្ញាបត្រទេ គឺប្រើពេលយូរ។ ក្នុងរយៈពេលនេះ គឺប្រឈមនឹងការងារច្រើន ទាំងបញ្ហាជីវភាពរស់នៅ ការងារ ក៏ដូចជាស្ថានភាពផ្សេងៗ រួមទាំងការសិក្សាផង អីចឹងការណ៍ដែលនិស្សិតទាំងអស់ បានអង្គុយនៅទីនេះទទួលសញ្ញាបត្រ បានបញ្ចប់ការសិក្សាដោយជោគជ័យ បានបង្ហាញអំពីការដាក់ទិសដៅច្បាស់លាស់ និងការខិតខំប្រឹងប្រែងទើបបានសមិទ្ធផលនេះ។ អីចឹង នេះជាសមិទ្ធផលធំ ដែលខ្ញុំសូមអបអរសាទរសាជាថ្មី»។
សម្តេចធិបតី បន្ថែមថា «ប្រទេសជាតិយើងក៏មានសំណាង ដែលថ្ងៃនេះ យើងបានធ្វើពិធីអបអរសាទរនិស្សិតជ័យលាភី ដែលនឹងចូលក្នុងយន្តការជួយកសាង និងជំរុញសេដ្ឋកិច្ចជាតិ និងប្រទេសជាតិយើង កាន់តែអភិវឌ្ឍរឹងមាំ»។
សម្តេចធិបតី ហ៊ុន ម៉ាណែត ថ្លែងថា ការបញ្ចប់ឧត្តមសិក្សា បានមកពីការប្រឹងប្រែងរបស់សាស្ត្រាចារ្យក្នុងការផ្ទេរចំណេះដឹង ក៏ដូចជាការចូលរួមចំណែកពីគណៈគ្រប់គ្រង និងបុគ្គលិកសិក្សារបស់សាកលវិទ្យាល័យ។ សម្តេចបានវាយតម្លៃខ្ពស់របស់សាកលវិទ្យាល័យជាតិគ្រប់គ្រង ដែលប្រឹងប្រែងក្នុងការបណ្តុះបណ្តាលនិស្សិត។
សម្តេចធិបតី ហ៊ុន ម៉ាណែតគូសបញ្ជាក់ថា ប្រទេសមួយមានធនធានមនុស្ស មានមូលធនមនុស្ស ដែលមានសុខភាពល្អ មានសមត្ថភាពខ្ពស់ នឹងធ្វើឱ្យការប្រកួតប្រជែងរបស់ប្រទេសនោះកាន់តែខ្លាំង។ សម្តេចបន្តថា គម្លាតខាងចំណេះងាយនឹងកាត់បន្ថយ ជាងគម្លាតខាងទ្រព្យសម្បត្តិ ហើយធនធានមនុស្សមិនអន់នោះឡើយ នៅពេលមានឱកាស ៕
