ភ្នំពេញ៖ សំរាមគឺជាប្រភពនៃមេរោគ និងអាចកើតជាជំងឺផ្សេងៗ ជាក់ស្ដែងទីលានទុកដាក់សំរាម ក្រុងស្ទឹងត្រែង បានសាងសង់តាមលក្ខណៈបច្ចេកទេស មានរយៈពេល១៨ខែ គឺសាងសង់ពីថ្ងៃទី០៨ ខែមេសា ឆ្នាំ២០២២ បានបញ្ចប់ការសាងសង់នៅខែធ្នូ ឆ្នាំ២០២៣ ជាស្ថាពរ និងសម្ពោធឱ្យប្រើប្រាស់នៅឆ្នាំ២០២៤ នាពេលឆាប់ៗខាងមុខនេះ។
នារសៀលថ្ងៃទី០៧ ខែកុម្ភៈ ឆ្នាំ២០២៤នេះ ទីលានចាក់សំរាម ក្រោមគម្រោងក្រុងរបៀង៤ របស់ធនាគារអភិវឌ្ឍន៍អាស៊ី(ADB) ដែលមានទីតាំងនៅក្នុងស្រុកថាឡាបរិវ៉ាត់ ចំងាយប្រហែល១១គីឡូម៉ែត្រពីទីប្រជុំជនក្រុងស្ទឹងត្រែង ត្រូវបាន ក្រុមហ៊ុន អឹម ធី អេ ខូអិលធីឌី ប្រគល់ជូន ក្រសួង សាធារណៈការ និងដឹកជញ្ជូន ក្រោមអធិបតីភាព ឯកឧត្តម រស់ វណ្ណា ជារដ្ឋលេខាធិការ និងឯកឧត្តម ស្វាយ សំអ៊ាង អភិបាល នៃគណៈអភិបាលខេត្ត ហើយនាពេលឆាប់ៗខាងមុខនេះ ក្រសួងសាធារណៈការ និងដឹកជញ្ជូននឹងប្រគល់ជូនរដ្ឋបាលខេត្តស្ទឹងត្រែងដើម្បីគ្រប់គ្រងហើយដំណើរការប្រើប្រាស់ជាទីលានទុកដាក់សំរាមក្រុងស្ទឹងត្រែង។( នេះបើតាមការបញ្ចាក់ឱ្យដឹងពី លោក សរ គឹមណាត ប្រធានមន្ទីរសាធារណៈការ និងដឹកជញ្ជូនខេត្ត)
ឯកឧត្តម ស្វាយ សំអ៊ាង បានពិនិត្យឃើញថា៖ អនុគម្រោងសាងសង់ទុកដាក់សំរាមក្រុង ស្ទឹងត្រែង ដែលបានចំណាយទឹកប្រាក់ជិត៥លានដុល្លាសហរដ្ឋអាមេរិក ជាកម្ចីឥណទានធនាគារអភិវឌ្ឍន៍អាស៊ី (ADB) ជាទីលានចាក់សំរាមលើក ដំបូងនៅខេត្តស្ទឹងត្រែង ដែលបង្កើតឡើងមាន លក្ខណៈស្តង់ដារ ត្រឹមត្រូវតាមបច្ចេកទេសធំទូលាយ។ គឺក្រុងស្ទឹងត្រែងទទួលបានទីលានទុកដាក់សំរាម សម្រាប់ប្រជាពលរដ្ឋឱ្យប្រើប្រាស់ ដើម្បីលើកកម្ពស់គុណភាពការរស់នៅរបស់ពលរដ្ឋក្នុងតំបន់ និងតំបន់ជុំវិញ ជាពិសេសកាត់បន្ថយបញ្ហាប្រឈមទៅលើកត្តាសុខភាពនិងការបំពុលបរិស្ថាន។
តាមការឱ្យដឹងពីតំណាងក្រុមហ៊ុន អឹម ធី អេ ខូអិលធីឌី បានបញ្ជាក់ថា៖ ទីលាននេះ មានសមត្ថភាពទទួលសំរាមពីសង្កាត់ចំនួន៥ គឺសង្កាត់ស្ទឹងត្រែង ស្រះឫស្សី ព្រះបាទ សាមគ្គី (ភូមិហាខូសួន និងភូមិហាខូបាន ថាឡាបរិវ៉ាត់ (ភូមិថាឡាបរិវ៉ាត់ ភូមិអូរត្រែល និងភូមិកាំងតេជោ) ដែលរណ្តៅដាក់សំរាមអាចផ្ទុកសំរាមបានចំនួន១៣៧,៤១៦ម៉ែត្រគីប។
ដែលទីលានចាក់សំរាមនេះ ក្រោមគម្រោងក្រុងរបៀង៤ របស់ធនាគារអភិវឌ្ឍន៍អាស៊ី(ADB) ដែលមានរណ្តៅទុកដាក់សំរាមទី១ទំហំ១៥ពាន់៩៩៦ម៉ែត្រការ៉េអាចផ្ទុកបរិមាណសំរាមបានចំនួន១៨៥ពាន់១៥១ម៉ែត្រគីប ចាប់ពីឆ្នាំ២០២៤ ដល់ឆ្នាំ២០៣០ និងស្រះប្រតិកម្មទឹកស្អុយចេញពីសំរាមចំនួន៤ ស្រះទំហំសរុបចំនួន១ម៉ឺន២០០០ម៉ែត្រគីប។
ក្នុងនោះមានផ្លូវបេតុងចូលទៅកាន់ទីលានចាក់សំរាមមានទទឹង៦ម៉ែត្រ ប្រវែង១ពាន់៤៥០ ម៉ែត្រ។ និងមានអគាររដ្ឋបាល អគារញែកសំរាម អគារស្តុកសំណល់គ្រោះថ្នាក់ កន្លែងជញ្ជីងថ្លឹងទំងន់៕
