អភិបាលខេត្តស្ទឹងត្រែង ជំរុញឱ្យអាជ្ញាធរពាក់ព័ន្ធទាំងអស់បន្តខិតខំចុះបង្រ្កាបគ្រឿងញៀនគ្រប់រូបភាព និងផ្សព្វផ្សាយឱ្យបានទូលំទូលាយ អំពីផលប៉ះពាល់បណ្តាលមកពីគ្រឿងញៀន
ស្ទឹងត្រែង៖ ឯកឧត្តម ស្វាយ សំអ៊ាង អភិបាលនៃគណៈអភិបាលខេត្តស្ទឹងត្រែង និងជាប្រធានគណៈបញ្ចាការឯកភាពរដ្ឋបាលខេត្តស្ទឹងត្រែង បានដាក់ចេញនូវទិសដៅការងារបន្ត សំដៅអប់រំ ផ្សព្វផ្សាយឲ្យបានទូលំទូលាយ អំពីផលប៉ះពាល់បណ្តាលមកពីគ្រឿងញៀន និងការបន្តសកម្មភាពយុទ្ធនាការបង្ការ ទប់ស្កាត់និងបង្ក្រាបបទល្មើសគ្រឿងញៀនដូចភ្លៀងរលឹម ធ្វើយ៉ាងណាដើម្បីកាត់បន្ថយបទល្មើសគ្រឿងញៀន ការពារសុខុមាលភាព និងសុវត្ថិភាពសង្គម។
ថ្លែងប្រាប់អង្គភាពសារព័ត៌មាន HOT News Asia នាថ្ងៃចន្ទ ទី៥ ខែកុម្ភៈ ឆ្នាំ២០២៤នេះ ឯកឧត្តម ស្វាយ សំអ៊ាង បានជម្រុញដល់អាជ្ញាធរពាក់ពន្ធ័ទាំងអស់ត្រូវបន្តខិតខំអនុវត្ត ចុះបង្រ្កាបគ្រឿងញៀនគ្រប់រូបភាពទាំងអស់ធ្វើយ៉ាងណាដើម្បីឲ្យការងារមួយនេះទទួលបានលទ្ធផលល្អ។
ឯកឧត្តមអភិបាលខេត្ត ក៏បានជម្រុញដល់ អាជ្ញាធរមូលដ្ឋាន ក្រុងស្រុក ទាំងអស់ ត្រូវធ្វើការផ្សព្វផ្សាយអំពីឥទ្ធិពលបញ្ហាគ្រឿងញៀន ក៏ដូចជាគោលនយោបាយ ភូមិ ឃុំ មានសុវត្ថិភាព ដើម្បីឲ្យប្រជាពលរដ្ឋនិងយុវវ័យ យល់ដឹងអំពីផលប៉ះពាលដល់ខ្លួន ក្រុមគ្រួសារ និងសង្គមជាតិទាំងមូល។
ឯកឧត្តមអភិបាលខេត្ត ក៏បានណែនាំដល់អាជ្ញាធរមានសមត្ថកិច្ច អាជ្ញាធរមូលដ្ឋាន ត្រូវចូលរួមសហការគ្នាឲ្យបានជិតស្និទ្ធក្នុងការ ចុះបង្ក្រាបនូវបទល្មើសផ្សេងៗជាពិសេសបញ្ហាគ្រឿងញៀនធ្វើយ៉ាងណាដើម្បីទទួលបានប្រសិទ្ធភាពល្អ ក្នុងការបង្ក្រាប នៅបទល្មើសទាំងអស់នោះ មិនឱ្យជនដៃដល់ ក៏ដូចជាជនបង្កមានការដឹងខ្លួនមុន។
ឯកឧត្តមប្រធានគណៈបញ្ចាការឯកភាពរដ្ឋបាលខេត្តស្ទឹងត្រែង ក៏បានមានប្រសាសន៍ណែនាំឲ្យចាត់វិធានការចំនួន ៣ សំខាន់ៗរួមមាន៖ ទី១.វិធានការផ្សព្វផ្សាយ, ទី២.វិធានការរដ្ឋបាល និងទី៣.វិធានការបង្ក្រាប ៕
