ពលរដ្ឋងាយរងគ្រោះ ១៤០គ្រួសារ មកពីឃុំចំនួន៣ ក្នុងស្រុករុក្ខគីរី ខេត្តបាត់ដំបង ទទួលបានអំណោយមនុស្សធម៌ពីអនុសាខាកាកបាទក្រហមកម្ពុជា
ភ្នំពេញ៖ក្រុមការងារអនុសាខាកាកបាទក្រហមកម្ពុជាស្រុករុក្ខគីរី លោកស្រី ប៊ិន បូឡែន អភិបាលស្រុក និងជាប្រធានគណៈកម្មាធិការអនុសាខាកាកបាទក្រហមកម្ពុជាស្រុករុក្ខគីរី និងសហការី រួមជាមួយអង្គការទស្សនពិភពលោកកម្ពុជា នាថ្ងៃទី៣០ ខែមករា ឆ្នាំ២០២៤ បាននាំយកអំណោយមនុស្សធម៌របស់សប្បុរសជនតាមរយៈអនុសាខាក្រុង ផ្តល់ជូនប្រជាពលរដ្ឋទីទ័លក្រចំនួន ១៤០ គ្រួសារ មកពីឃុំចំនួន៣ រួមានឃុំព្រៃត្រឡាច ឃុំ មុខរាហ៍ និងឃុំស្តុកប្រវឹក ស្រុករុក្ខគីរី ខេត្តបាត់ដំបង ។
ក្នុងឱកាសជួបសំណេះសំណាលជាមួយប្រជាពលរដ្ឋ លោកស្រី ប៊ិន បូឡែន បានពាំនាំនូវការផ្តាំផ្ញើសួរសុខទុក្ខ ក្តីនឹករលឹកពីសំណាក់ ឯកឧត្តម សុខ លូ អភិបាលខេត្ត និងជាប្រធានគណៈកម្មាធិការសាខា ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្តេចតែងតែគិតគូរពីសុខទុក្ខរបស់បងប្អូនប្រជាពលរដ្ឋជួបការលំបាក អ្នកមានជំងឺ ជនងាយរងគ្រោះ និងជនរងគ្រោះ ដោយគ្រោះមហន្តរាយផ្សេងៗ ដោយមិនប្រកាន់រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ ។
លោកស្រីប្រធានអនុសាខាស្រុកបាននាំនូវសារអប់រំថែទាំសុខភាពដល់ប្រជាពលរដ្ឋត្រូវគិតគូរថែទាំទាំងសុខភាពផ្លូវកាយ ផ្លូវចិត្តឱ្យបានល្អ បន្ថែមពីនេះ ត្រូវពិសាទឹកដាំឆ្អិន រស់នៅមានអនាម័យ សម្រាកក្នុងមុងជានិច្ច និងលើកកម្ពស់សុវត្ថិភាពអាហារប្រចាំថ្ងៃ តាមរយៈការដាំបន្លែបង្ការក្នុងគ្រួសារ ដើម្បីបានសុខភាពល្អផង និងកាត់បន្ថយការចំណាយក្នុងគ្រួសារផងដែរ ។
សូមបញ្ជាក់ថា អំណោយចែកជូនប្រជាពលរដ្ឋ ក្នុងមួយគ្រួសារទទួលបាន៖ អង្ករ ៥០គីឡូក្រាម ទឹកត្រី១យួ ទឹកស៊ីអ៊ីវ១យួ ត្រីខ១យួ និងខ្លាញ់១លីត្រផងដែរ។
