មេបញ្ជាការទិសទី៣ សំឡូត ចុះត្រួតពិនិត្យការងារកសាងពង្រឹងអង្គភាពលើគ្រប់វិស័យ នៅកងអនុសេនាធំល្បាតទី៦ ចំណុះកងការពារព្រំដែនលេខ៥០២
ភ្នំពេញ៖ ឯកឧត្តម ឧត្តមសេនីយ៍ត្រី ឈៀវ ឃុន មេបញ្ជាការទិសទី៣ សំឡូត ព្រមទាំងលោកវរសេនីយ៍ទោ សៀម ប៊ុនស៊ីម មេបញ្ជាការកងការពារព្រំដែនលេខ៥០២ នាថ្ងៃទី១១ ខែមករា ឆ្នាំ២០២៤ បានដឹកនាំមេបញ្ជាការរង ជំនួយការកង៥០២ មេបញ្ជាការគ្រប់កងអនុសេនាធំល្បាតចំណុះ អញ្ជើញចុះត្រួតពិនិត្យការងារកសាងពង្រឹងអង្គភាពលើគ្រប់វិស័យ នៅកងអនុសេនាធំល្បាតទី៦ ចំណុះកងការពារព្រំដែនលេខ៥០២ ចំណុចព្រែកបី.អន្លង់ក្រពើ ស្ថិតនៅក្នុងភូមិសំឡូត ឃុំសំឡូត ស្រុកសំឡូត ខេត្តបាត់ដំបង។
ក្នុងឱកាសនោះ ឯកឧត្តម មេបញ្ជាការ និងក្រុមការងារបានត្រួតពិនិត្យតាមគោលដៅនីមួយៗ ដែលអង្គភាពសម្រេចបាន ក្នុងរយៈពេលកន្លងមក ដែលកើតចេញពីការខិតខំប្រឹងប្រែង យកអស់កម្លាំងកាយចិត្តពុះពារជំនះរាល់ការលំបាកក្នុងភូមិសាស្រ្តឈរជើងនៅតំបន់នេះ។ ឯកឧត្តម មេបញ្ជាការ ទិសទី៣ សំឡូត បានកោតសរសើរថាក្រោមការយកចិត្តទុកដាក់ពីថ្នាក់ដឹកនាំគ្រប់ជាន់ថ្នាក់ និងមានសាមគ្គីភាពក្នុងការងារ នាពេលនេះអង្គភាពមានភាពប្រសើរឡើងច្រើនដូចជាសំណង់ជំរុំបានថែរក្សា កែច្នៃជួសជុលមិនមានការខូចខាតច្រើន ផ្នែកពង្រឹងប្រៀបការពារជាតិបានរៀបចំទុកដាក់ត្រឹមត្រូវតាមលក្ខណៈបច្ចេកទេស ការងារធានាជីវភាពរស់នៅក៏មានភាពប្រសើរឡើងជាងមុន។
ចំណែកលោកមេបញ្ជាការកងការពារព្រំដែនលេខ៥០២ បានមានប្រសាសន៍បន្ថែម លើការងារដឹកនាំបញ្ជា និងរបៀបរបបធ្វើការ អង្គភាពមានការគោរព និងអនុវត្តបានជាប់ជាប្រចាំ ស្តែងចេញពីលទ្ធផលការងារប្រចាំថ្ងៃ ដូចជាការងារត្រួតពិនិត្យតាមខ្សែបន្ទាត់ព្រំដែន ការត្រៀមកម្លាំងដោះស្រាយយថាហេតុផ្សេងៗ និងការងារបង្កបង្កើនផលផងដែរ។
ក្រាយពីការត្រួតពិនិត្យ និងវាយតម្លៃរាល់ចំនុចខ្លាំង ចំនុចខ្សោយរួច ឯកឧត្តម មេបញ្ជាការ ទិសទី៣ សំឡូត បានផ្តាំផ្ញើរដល់អង្គភាពអោយខិតខំអនុវត្តការងារតាមខ្លឹមសារទាំង៤ របស់ការងារកសាងពង្រឹងអង្គភាពរឹងមាំលើគ្រប់វិស័យអោយបានជាប់ជាប្រចាំ ដើម្បីអង្គភាពមានការអភិវឌ្ឍឈានឡើងជាបន្តបន្ទាប់។
ក្រោយពីបញ្ចប់ការងារនៅកងអនុសេនាធំល្បាតទី៦ ក្រុមការងារប្រវត្តិសាស្រ្តយោធាទិសទី៣ យោធភូមិភាគទី៥ ដែលមានឯកឧត្តម ឧត្តមសេនីយ៍ត្រី ឈៀវ ឃុន មេបញ្ជាការទិសទី៣ សំឡូត ឯកឧត្តម ឧត្តមសេនីយ៍ត្រី គុជ នាង មេបញ្ជាការកងពលតូចថ្មើរជើងលេខ៥២ ព្រមទាំងអង្គភាពកងការពារព្រំដែនលេខ៥០២ និងវរសេនាតូចនគរបាលការពារព្រំដែនលេខ៨២៣ ដែលជាអង្គភាពសហការនៅក្នុងភូមិសាស្រ្តនោះ បានអញ្ជើញទៅត្រួតពិនិត្យតំបន់ប្រវត្តិសាស្រ្តយោធាតេជោសែនចៅ(សំឡូត) និងបានលើកផ្លាកថ្មីនៅទីស្នាក់ការ និងបន្តការងារថែរក្សាជួសជុលអាគារទាំងឡាយដែលនៅសេសសល់ អោយមានសោភ័ណ្ឌភាពស្អាតឡើងវិញ។