ឧត្តមសេនីយ៍ឯក ជីវ ផល្លី អញ្ជើញដឹកនាំកិច្ចប្រជុំត្រួតពិនិត្យការងារប្រយុទ្ធប្រឆាំងអំពើរជួញដូរមនុស្ស និងអំពីធ្វើអាជីវកម្មផ្លូវភេទដែលបានអនុវត្តកន្លងមក(២០២៣)

ភំ្នពេញ៖ នៅព្រឹកថ្ងៃអង្គារ ៦រោច ខែមិគសិរ ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី២ ខែមករា ឆ្នាំ២០២៤ ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ បានអញ្ជើញដឹកនាំកិច្ចប្រជុំត្រួតពិនិត្យការងារប្រយុទ្ធប្រឆាំងអំពើរជួញដូរមនុស្សនិងអំពីធ្វើអាជីវកម្មផ្លូវភេទដែលបានអនុវត្តកន្លងមក(២០២៣)នៅទីស្តីការក្រសួងមហាផ្ទៃ។

ពិធីនេះ មានការអញ្ជើញចូលរួមពីលោកជំទាវឧត្តមសេនីយ៍ទោ ស៊ឹម ផាណុំ ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន, លោក-លោកស្រីឧត្តមសេនីយ៍ទោ អនុប្រធាននាយកដ្ឋាន និងលោក-លោកស្រីឧត្តមសេនីយ៍ វរសេនីយ៍ ស្នងការរង លោកនាយការិយាល័យជំនាញ រាជធានី-ខេត្តទាំង២៥។

ឯកឧត្តម ឧត្តមសេនីយ៍ឯក ជីវ ផល្លី អគ្គស្នងការរងនគរបាលជាតិ បានមានប្រសាសន៍ថា កិច្ចប្រជុំនេះ ផ្តោតសំខាន់ទៅលើការលើកកម្ពស់កិច្ចសហការ និងសហប្រតិបត្តិការរវាង នាយកដ្ឋាន និងរាជធានី-ខេត្ត ក្នុងការប្រយុទ្ធប្រឆាំងអំពើជួញដូរមនុស្សគ្រប់ទម្រង់ ដែលបច្ចុប្បន្ននេះយើងឃើញថា អំពើជួញដូរមនុស្សមានភាពប្រែប្រួល ស្ថានភាពសាមញ្ញធម្មតាទៅជាស្ថានភាពស្មុគស្មាញ ដែលយើងទាំងអស់គ្នាត្រូវយល់ដឹងហើយត្រូវធ្វើការចូលរួមទប់ស្កាត់តាមរយៈការលើកម្ពស់សមត្ថភាពនិងការបង្រ្កាប សង្រ្គោះជនរងគ្រោះ។

ឯកឧត្តម ឧត្តមសេនីយ៍ឯក បានបន្តថា ការជួបប្រជុំនាថ្ងៃនេះ ដើម្បីលើកអំពីបទពិសោធន៍ក្នុងការចែករំលែករវាងថ្នាក់នាយកដ្ឋាន និងស្នងការរង នាយការិយា ល័យរាជធានី-ខេត្ត អំពីចរិតនៃលក្ខណៈបទល្មើសដែលបានកើតឡើងមកដល់បច្ចប្បន្ន គឺមាន៦ចំណុច៖
១-រួមគ្នាក្នុងការលើកកម្ពស់សមត្ថភាពការយល់ដឹងតាមរយៈការបណ្តុះបណ្តាល តាមរយៈកិច្ចប្រជុំ និងតាមរយៈសិក្ខាសាលា។
២-ពង្រឹងកិច្ចសហការ និងកិច្ចសហប្រតិបត្តិការនគរបាលប្រឆាំងការជួញដូរមនុស្ស និងនគរបាលប្រឆាំងការជួញដូរមនុស្សទាំងនាយកដ្ឋាន រាជធានី-ខេត្ត។
៣-ចង់ឲ្យមានការស្គាល់គ្នាឡើងវិញ ដោយសារមានខេត្តខ្លះផ្លាស់ប្តូរតែងតាំងសមាសភាពថ្មី ឬក៏ចូលនិវត្ត ចឹងហើយត្រូវការស្គាល់យល់គ្នា។
៤-ពង្រឹងសាមគី្គភាពផ្ទៃក្នុងរវាងនគរបាលប្រឆាំងការជួញដូរមនុស្ស និងនគរបាលប្រឆាំងការជួញដូរមនុស្ស និយាយដោយឡែក និយាយជារួមត្រូវពង្រឹងកិច្ចសហការសាមគី្គភាពរវាងនគរបាលជាតិទាំងមូល។
៥-ពង្រឹងកិច្ចសហប្រតិបត្តិការជាមួយ អង្គភាព ក្រសួង ស្ថាប័ន ពាក់ព័ន្ធនិងអង្គការដៃគូ ដើម្បីទប់ស្កាត់បទល្មើសឲ្យមានការថតចុះ ពិសេសជាមួយប្រជាពលរដ្ឋឲ្យមានការយល់ដឹង។
៦-ត្រូវពង្រឹងសមត្ថភាពខ្លួនឯង ការយល់ដឹងអំពីច្បាប់ពាក់ព័ន្ធ ក្រមនីតិវិធី ក្រមនីតិវិធីព្រហ្មទណ្ឌ ក្រមព្រហ្មទណ្ឌ ក្រមរដ្ឋប្បវេណីយ៍ និងច្បាប់ពាក់ព័ន្ធផ្សេងៗទៀត រួមទាំងច្បាប់ប្រឆាំងការជួញដូរមនុស្សនិងការពារអនីតិជនផងដែរ ៕