នាយករដ្ឋមន្ត្រី៖ សមិទ្ធផលវិមានឈ្នះឈ្នះ បង្ហាញពីការរៀបរាប់ រាល់ព្រឹត្តិការណ៍ ការវិវត្តន៍នៃដំណើរការជាតិ និងប្រវត្តិសាស្ត្រខ្មែរ សម្រាប់ប្រជាជន និងយុវជនជំនាន់ក្រោយ
ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា សមិទ្ធផលវិមានឈ្នះឈ្នះ បានបង្ហាញពីការរៀបរាប់ រាល់ព្រឹត្តិការណ៍ និងការវិវត្តន៍នៃដំណើរការជាតិខ្មែរ និងប្រវត្តិសាស្ត្រខ្មែរ សម្រាប់ប្រជាជន និងយុវជនជំនាន់ក្រោយ ។
ក្នុងឱកាសអញ្ជើញអបអរសាទរខួប២៥ឆ្នាំ នៃការបញ្ចប់សង្គ្រាមស៊ីវិលនៅកម្ពុជា ក្រោមនយោបាយឈ្នះ-ឈ្នះ របស់សម្តេចតេជោ ហ៊ុន សែន និងការអនុវត្តប្រកបដោយជោគជ័យនយោបាយឈ្នះ-ឈ្នះ និងខួប៥ឆ្នាំ នៃការកសាងវិមានឈ្នះ-ឈ្នះ នាថ្ងៃទី២៩ ធ្នូនេះ សម្តេចធិបតី ហ៊ុន ម៉ាណែត បញ្ជាក់ថា «សមិទ្ធផលវិមានឈ្នះឈ្នះ បានបង្ហាញពីការរៀបរាប់ រាល់ព្រឹត្តិការណ៍ និងការវិវត្តន៍នៃដំណើរការជាតិខ្មែរ និងប្រវត្តិសាស្ត្រខ្មែរ សម្រាប់ប្រជាជន និងយុវជនជំនាន់ក្រោយ ការកសាង សំណង់ប្រវត្តិសាស្ត្រនេះបង្ហាញយ៉ាងច្បាស់នូវអត្ថន័យខ្លឹមសារ និងទ្រង់ទ្រាយនៃវិមានតំណាងឱ្យអត្ថន័យ នៃនយោបាយឈ្នះឈ្នះ ព្រមទាំងការជីកកាយលាតត្រដាងទិដ្ឋភាព នៃដំណើររឿងប្រវត្តិសាស្ត្រទាំងអស់ឱ្យក្លាយ ទៅជាអត្តសញ្ញាណតាមរយៈការបង្ហាញនូវដួងព្រលឹងជាតិ និងជានិមិត្តរូបនៃការរួបរួមសាមគ្គី ការអភិវឌ្ឍ ព្រមទាំងជាមេរៀនជាក់ស្តែងសម្រាប់ប្រវត្តិសាស្ត្រខ្មែរ»។
សម្តេចធិបតីបន្ថែមថា ទីតាំងសាង់សងវិមានឈ្នះឈ្នះ គឺជាទីតាំងអំណោយផល ប៉ុន្តែទម្រាំបានសាង់សងសមិទ្ធផលដែលយើងបានឃើញនៅថ្ងៃនេះ គឺមិនមែនចេញជារូបរាងដោយធម្មតានោះទេ ទាំងទីតាំង ទាំងដី ទាំងការចរចា ទាំងការកៀរគរថវិកា ការរៀចំប្លង់មេដ៏មានអត្ថន័យ និងការកសាង ត្រូវគិតគូរយ៉ាងម៉ត់ចត់ និងពុះពារខ្លាំង ។
សម្តេចធិបតី ហ៊ុន ម៉ាណែត ក៏បានថ្លែងអំណរគុណសម្តេចពិជ័យសេនា ទៀ បាញ់ ដែលបានខិតខំប្រឹងប្រែងដឹកនាំក្រុមការងារពុះពាររហូតសាងសង់វិមានឈ្នះឈ្នះនេះ ឱ្យទទួលបានជោគជ័យតាមការគ្រោងទុក។ ព្រមទាំងអរគុណ នាយឧត្តមឧត្តមសេនីយ៍ ណឹម សុវត្ថិ និងក្រុមការងារពាក់ព័ន្ធទាំងអស់ ដែលខិតខំយកចិត្តទុកដាក់ទាំងទិដ្ឋភាព ប្រវត្តិសាស្ត្រ ដើម្បីភ្ជាប់នៅតាមទីតាំងនានាក្នុងវិមានឈ្នះឈ្នះ ដើម្បីឱ្យបានពេញនូវអត្ថន័យនៃវិមានប្រសាស្ត្រ ដែលរៀបរាប់អំពីប្រវត្តិរបស់កម្ពុជា ៕
