ក្នុងពិធីប្រណាំងទូក-ង នៅស្ទឹងសៀមរាប ឆ្នាំនេះ ភ្ញៀវទេសចរចូលរួមទុកដាក់សំរាម បានល្អប្រសើរជាងមុនៗ
ភ្នំពេញ៖ អាជ្ញាធរខេត្តសៀមរាប បានគូសបញ្ជាក់ថា ពិធីប្រណាំងទូក-ង នៅស្ទឹងសៀមរាប ឆ្នាំ២០២៣នេះ ភ្ញៀវទេសចរមានការចូលរួមទុកដាក់សំរាមបានល្អជាងមុនៗ ខណៈបរិមាណសំរាម ដែលបានប្រមូល និងដឹកចេញមានជាង២០០តោន។
នាព្រឹកថ្ងៃទី២៩ ខែវិច្ឆិកា ឆ្នាំ២០២៣នេះ ឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប បានជួបសំណេះសំណាលជាមួយបងប្អូនក្រុមអ្នកសម្អាតអនាម័យ ក្នុងពិធីប្រណាំងទូក-ង នៅខេត្តសៀមរាប ដើម្បីធ្វើការលើកទឹកចិត្ត និងថ្លែងអំណរគុណចំពោះពួកគាត់ ដែលបានធ្វើការទាំងយប់ទាំងថ្ងៃ ដើម្បីធ្វើឱ្យបរិស្ថានមានអនាម័យស្អាត។
ក្នុងឱកាសនោះ ឯកឧត្តមអភិបាលខេត្ត បានមានប្រសាសន៍ថា ដើម្បីសម្រេចបានជោគជ័យនៅក្នុងព្រឹត្តិការណ៍ធំៗ ជាក់ស្តែងនៅក្នុងពិធីប្រណាំងទូក-ង នៅស្ទឹងសៀមរាបនេះ គឺមិនអាចខ្វះបានទេបងប្អូនក្រុមអ្នកសម្អាតបរិស្ថាននេះ ដោយពួកគាត់បានធ្វើការងារច្រើនទាំងយប់ទាំងថ្ងៃធ្វើយ៉ាងឱ្យបរិស្ថាននៅបរិវេណពិធីរបស់យើងស្អាត និងបានថ្លែងអំណរគុណចំពោះការខិតខំ និងការលះបង់ ចូលរួមរបស់បងប្អូន។ ជាមួយគ្នានេះដែរ ឯកឧត្តមអភិបាលខេត្ត បានផ្តល់ជាភេសជ្ជៈ និងថវិកាមួយចំនួនដល់បងប្អូនក្រុមអ្នកសម្អាតនេះផងដែរ។
ទន្ទឹមនឹងនេះ លោក ស៊ុន គង់ ប្រធានមន្ទីរបរិស្ថាន ខេត្តសៀមរាប បានឱ្យដឹងថា នៅក្នុងពិធីប្រណាំងទូក-ង នៅស្ទឹងសៀមរាបនេះ អាជ្ញាធរបានប្រើប្រាស់កម្លាំងចំនួន២៤៩នាក់ សម្រាប់ផ្គត់ផ្គង់បង្គន់អនាម័យចល័ត ការងារសម្អាត ប្រមូល និងដឹកជញ្ជូនសំរាម សំណល់រាវ និងការងារផ្សព្វផ្សាយអប់រំបរិស្ថាន ដោយមានមធ្យោបាយគាំទ្ររួមមាន បង្គន់ចល័ត៤០បង្គន់ ម៉ូតូរ៉ឺម៉កកង់បី០៤គ្រឿង ទូក០៤គ្រឿង កុងតឺន័រស្តុកសំរាម០៤គ្រឿង ធុងសំរាម២៩០ធុង ក្នុងនោះយើងប្រមូល និងដឹកបរិមាណសំរាម សំណល់រឹងចេញបានចំនួន២២៦ តោន និង បរិមាណសំណល់រាវចំនួន ១១១ ៥០០ ម៉ែត្រគូប។
សម្រាប់ការងារប្រមូល សម្អាត និងដឹកជញ្ជូនសំរាម សំណល់រាវ និងការងារផ្សព្វផ្សាយអប់រំបរិស្ថាន ទទួលបានលទ្ធផលល្អប្រសើរជាងបណ្តាឆ្នាំមុនៗ គឺកម្មវិធីចប់ម៉ោង១២យប់ ហើយព្រឹកឡើង បរិស្ថាន នៅក្នុងបរិវេណពិធី គឺស្អាតរួចរាល់ជាស្រេច៕ ប្រភព៖ ក្រសួងព័ត៌មាន
