មន្ត្រីជាន់ខ្ពស់អប់រំ៖ ចាប់តាំងពីចាប់បដិសន្ធិឡើងក្នុងឆ្នាំ២០០៦ កាយរឹទ្ធិជាតិកម្ពុជា បានបំពេញបេសកកម្មរបស់ខ្លួន ដែលជាចលនាអប់រំក្រៅប្រព័ន្ធ ដើម្បីគាំទ្រការអប់រំក្នុងប្រព័ន្ធរបស់ក្រសួងអប់រំ យុវជន និងកីឡា

ភ្នំពេញ៖ លោកជំទាវ គឹម សេដ្ឋានី រដ្ឋលេខាធិការប្រចាំការ និងជាអនុប្រធានកាយរឹទ្ធិជាតិកម្ពុជា បានលើកឡើងថា ចាប់តាំងពីចាប់បដិសន្ធិឡើងក្នុងឆ្នាំ២០០៦ មក កាយរឹទ្ធិជាតិកម្ពុជា បានបំពេញបេសកកម្មរបស់ខ្លួន ដែលជាចលនាអប់រំក្រៅប្រព័ន្ធ ដើម្បីគាំទ្រការអប់រំក្នុងប្រព័ន្ធរបស់ក្រសួងអប់រំ យុវជន និងកីឡា។

ព្រឹត្តិការណ៍បិទការបោះជំរំកាយរឹទ្ធិប្អូនថ្នាក់ជាតិលើកទី១ ក្រោមប្រធានបទ “កុមារសតវត្សរ៍ទី២១” បានរៀបចំធ្វើនៅវិទ្យាស្ថានបច្ចេកវិទ្យាកំពង់ឈើទាល ស្រុកប្រាសាទសំបូរ ខេត្តកំពង់ធំ ក្រោមអធិបតីភាព លោកជំទាវ គឹម សេដ្ឋានី រដ្ឋលេខាធិការប្រចាំការ និងជាអនុប្រធានកាយរឹទ្ធិជាតិកម្ពុជា តំណាងដ៏ខ្ពង់ខ្ពស់ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានកាយរឹទ្ធិជាតិកម្ពុជា អមដំណើរដោយថ្នាក់ដឹកក្រសួងអប់រំ យុវជន និងកីឡា និងអាជ្ញាធរពាក់ព័ន្ធជាច្រើនរូប។

លោក ឯម ពិសិដ្ឋ ប្រធានគ្រប់គ្រងជំរំ បានធ្វើសេចក្ដីរាយការណ៍លទ្ធផលសម្រេចបានលើដំណើរការបោះជំរំកាយរឹទ្ធិប្អូនថ្នាក់ជាតិលើកទី១ រយៈពេល ៥ថ្ងៃ ចាប់ពីថ្ងៃទី២៥ ដល់ថ្ងៃទី២៩ ខែតុលា ឆ្នាំ២០២៣។ ការបោះជំរំកាយរឹទ្ធិប្អូនថ្នាក់ជាតិលើកទី១ ដែលមានប្រតិភូកាយរឹទ្ធិមកពី ២៥រាជធានី-ខេត្ត ចូលរួមចំនួនជាង ៤៥០នាក់ បានរៀបចំឡើងស្របតាមក្របខណ្ឌអាយុរបស់កាយរឹទ្ធិប្អូន ដែលមានចន្លោះអាយុ០៩-១១ឆ្នាំ និងមានរបៀបវារៈកម្មវិធី និងសកម្មភាពចំនួន ៣២ម៉ោង ដើម្បីអភិវឌ្ឍកុមារឬកាយរឹទ្ធិប្អូន(Cub Scouts) ឱ្យមានសក្ដានុពលភាពពេញលេញខាងផ្លូវកាយ ផ្លូវបញ្ញា ផ្លូវសង្គម ផ្លូវចិត្ត និងផ្លូវអារម្មណ៍ ដើម្បីឱ្យក្លាយទៅជាកុមារល្អ មានទំនួលខុសត្រូវក្នុងការសិក្សា និងជាសមាជិកសកម្មនៅក្នុងសាលារៀន និងសហគមន៍តាមមូលដ្ឋានរស់នៅរបស់ខ្លួន។

ថ្លែងក្នុងពិធីបិទការបោះជំរំ លោកជំទាវរដ្ឋលេខាធិការប្រចាំការ បានមានប្រសាសន៍ថា ចាប់តាំងពីចាប់បដិសន្ធិឡើងក្នុងឆ្នាំ២០០៦ មក កាយរឹទ្ធិជាតិកម្ពុជា បានបំពេញបេសកកម្មរបស់ខ្លួន ដែលជាចលនាអប់រំក្រៅប្រព័ន្ធ ដើម្បីគាំទ្រការអប់រំក្នុងប្រព័ន្ធរបស់ក្រសួងអប់រំ យុវជន និងកីឡានៃរាជរដ្ឋាភិបាលកម្ពុជា និងបានដើរតួនាទីយ៉ាងសំខាន់ក្នុងការលើកទឹកចិត្តដល់កុមារ-យុវជន ឱ្យចូលរួមចំណែកយ៉ាងសកម្មទៅក្នុងសហគមន៍ជាតិ និងអន្តរជាតិ។

លោកជំទាវបន្តថា កាយរឹទ្ធិជាតិកម្ពុជា បានបំពេញបេសកកម្មរបស់ខ្លួនយ៉ាងសកម្ម និងត្រឹមត្រូវតាមធម្មនុញ្ញ និងបទបញ្ជាផ្ទៃក្នុង ដើម្បីចូលរួមអភិវឌ្ឍកុមារ និងយុវជនខាងផ្លូវកាយ ផ្លូវបញ្ញា ផ្លូវអារម្មណ៍ ផ្លូវសង្គម និងផ្លូវចិត្ត ដើម្បីឱ្យក្លាយជាពលរដ្ឋល្អ ពលរដ្ឋសកម្ម និងមានទំនួលខុសត្រូវខ្ពស់ ព្រមទាំងជាសមាជិកសកម្មក្នុងការរក្សាសន្តិភាព និងអភិវឌ្ឍសហគមន៍ជាតិ និងអន្តរជាតិ ដោយឈរលើមូលដ្ឋាន “រៀនដោយអនុវត្តន៍ជាក់ស្តែង” (Learning by Doing) និងវិធីកាយរឹទ្ធិកម្ម។

លោកជំទាវរដ្ឋលេខាធិការប្រចាំការ បញ្ជាក់ថា តាមរយៈកម្មវិធីនេះ ប្រតិភូកាយរឹទ្ធិ បានអភិវឌ្ឍខ្លួនប្រកបដោយសក្ដានុពលពេញលេញលើបំណិនកាយសម្បទាឱ្យមានសុខភាពល្អ វិជ្ជាសម្បទា ចរិយាសម្បទា ជំនាញទន់ បំណិនជីវិត បំណិនច្នៃប្រឌិត មានសមត្ថភាពរស់នៅ និងធ្វើការជាក្រុម មានបំណិនផ្នែកតន្ត្រី និងសិល្បៈ និងមានឆន្ទៈពិតប្រាកដ ដើម្បីចូលរួមការពារបរិស្ថាន អភិវឌ្ឍសង្គមជាតិ និងសហគមន៍របស់ខ្លួន៕