អ៊ុយក្រែន៖ ប្រធានាធិបតីអ៊ុយក្រែន លោក Volodymyr Zelensky បានឲ្យដឹងថា លោកបានពិភាក្សាអំពីភាពចលាចលចុងសប្តាហ៍នៅក្នុងប្រទេសរុស្ស៊ី នៅក្នុងការសន្ទនាតាមទូរស័ព្ទជាមួយមេដឹកនាំសហរដ្ឋអាមេរិក កាណាដា និងប៉ូឡូញ កាលពីថ្ងៃអាទិត្យ ហើយថា ភាពទន់ខ្សោយ របស់មេដឹកនាំវិមានក្រឹមឡាំង លោក Vladimir Putin ត្រូវបានលាតត្រដាង។
ការហៅទូរស័ព្ទនេះបានកើតឡើងបន្ទាប់ពីការបះបោរដែលបរាជ័យជាវិសាមញ្ញដោយចៅហ្វាយនាយទាហានស៊ីឈ្នួលរុស្ស៊ីលោក Yevgeny Prigozhin កាលពីថ្ងៃសៅរ៍ដែលបានចោទជាសំណួរអំពីការកាន់អំណាចរបស់លោកពូទីន នៅពេលដែលអ៊ុយក្រែនដាក់សម្ពាធលើការវាយលុកនៅភាគខាងត្បូង និងខាងកើតរបស់ខ្លួន។
យើងបានពិភាក្សាអំពីដំណើរនៃអរិភាព និងដំណើរការដែលកើតឡើងនៅក្នុងប្រទេសរុស្ស៊ី។ ពិភពលោកត្រូវតែដាក់សម្ពាធលើប្រទេសរុស្ស៊ីរហូតដល់សណ្តាប់ធ្នាប់អន្តរជាតិត្រូវបានស្តារឡើងវិញ លោក Zelensky បានឲ្យដឹងបន្ទាប់ពីការហៅទូរស័ព្ទជាមួយលោកប្រធានាធិបតីអាមេរិក Joe Biden។
លោកបានបញ្ជាក់ថា លោក និងលោក Joe Biden ក៏បានពិភាក្សាផងដែរអំពីការពង្រីកកិច្ចសហប្រតិបត្តិការលើវិស័យការពារជាតិ ជាមួយនឹងការសង្កត់ធ្ងន់លើអាវុធរយៈចម្ងាយឆ្ងាយ ការសម្របសម្រួលនៅមុនកិច្ចប្រជុំកំពូលរបស់អង្គការណាតូនៅទីក្រុង Vilnius នៅខែក្រោយ និងការត្រៀមរៀបចំសម្រាប់ កិច្ចប្រជុំកំពូលសន្តិភាពសកល ដែលគាត់បានផ្សព្វផ្សាយ។
សេចក្តីថ្លែងការណ៍បានឲ្យដឹងថា ព្រឹត្តិការណ៍កាលពីម្សិលមិញបានបង្ហាញពីភាពទន់ខ្សោយនៃរបបរបស់លោកពូទីន។
នៅក្នុងសេចក្តីថ្លែងការណ៍ស្រដៀងគ្នាមួយផ្សេងទៀត លោក Zelensky បានឲ្យដឹងថា លោកបានប្រាប់លោកនាយករដ្ឋមន្រ្តីកាណាដា Justin Trudeau នៅក្នុងការសន្ទនាតាមទូរស័ព្ទអំពី ស្ថានភាពគំរាមកំហែង នៅរោងចក្រថាមពលនុយក្លេអ៊ែរ Zaporizhzhia ដ៏ធំរបស់អ៊ុយក្រែន ដែលកាន់កាប់ដោយរុស្ស៊ី។
លោក Zelensky បានព្រមានកាលពីដើមសប្តាហ៍នេះថា ប្រទេសរុស្ស៊ីកំពុងពិចារណាអនុវត្តសកម្មភាពនៃ អំពើភេរវកម្ម ពាក់ព័ន្ធនឹងការបញ្ចេញវិទ្យុសកម្មនៅឯរោងចក្រ ដែលជាការចោទប្រកាន់មួយដែលត្រូវបានបដិសេធដោយរុស្ស៊ី។
លោកបានឲ្យដឹងថា ដៃគូរបស់អ៊ុយក្រែនត្រូវតែបង្ហាញពីការឆ្លើយតបជាគោលការណ៍ ជាពិសេសនៅក្នុងកិច្ចប្រជុំកំពូលរបស់អង្គការណាតូនៅទីក្រុង Vilnius។
មេដឹកនាំអ៊ុយក្រែនបានធ្វើការអត្ថាធិប្បាយស្រដៀងគ្នានេះក្នុងសេចក្តីថ្លែងការណ៍មួយដែលបានសន្ទនាតាមទូរស័ព្ទជាមួយលោកប្រធានាធិបតីប៉ូឡូញ Andrzej Duda។
ប្រភព៖ Arab News
ប្រែសម្រួលដោយ៖ [ឡាយ លីហួ]
