បទពិសោធន៍មេរៀន និងនវានុវតន៍នានា រយៈពេល ១០ឆ្នាំកន្លងមក ក្នុងភាពជាដៃគូលើវិស័យព្រៃឈើ និងជលផលនៅកម្ពុជា
ភ្នំពេញ៖ លោកជំទាវ ម៉ុម ថានី រដ្ឋលេខាធិការក្រសួងបរិស្ថាន និងជាប្រធាសាខាសមាគមនារីកម្ពុជាដើម្បីសន្តិភាព និងអភិឌ្ឍន៍ នៃក្រសួងបរិស្ថាន កាលពីថ្ងៃ២៤ ខែឧសភា ឆ្នាំ២០២៣ បានអញ្ជើញជាអធិបតីក្នុងឱកាសបិទសិក្ខាសាលា ស្តីពី ភាពជាដៃគូលើវិស័យព្រៃឈើ និងជលផលនៅកម្ពុជា «មេរៀន បទពិសោធន៍ និងនវានុវត្តន៍នានារយៈពេល ១០ឆ្នាំកន្លងមក» នៅសណ្ឋាគារភ្នំពេញ និងមានវត្តមានចូលរួមពី ថ្នាក់ដឹកនាំ និងមន្ត្រីរាជការពីបណ្តាក្រសួងស្ថាប័ននានា ដូចជាក្រសួងកសិកម្មរុក្ខាប្រមាញ់និងនេសាទ ក្រសួងបរិស្ថាន ក្រសួងកិច្ចការនារី អង្គការដៃគូ សមាជិកគណៈកម្មការសហគមន៍ចំនួន៤ ខេត្ត (កំពង់ធំ ព្រះវិហារ ក្រចេះ និងស្ទឹងត្រែង ) សរុបប្រមាណជា ២២២នាក់។
លោកជំទាវ ម៉ុម ថានី បានមានប្រសាសន៍នៅក្នុងកម្មវិធីបិទរបស់សិក្ខាសាលាថា «សិក្ខាសាលានេះមានសារៈសំខាន់ក្នុងការចូលរួមចំណែកផ្តល់នូវទុនសំខាន់ៗសម្រាប់គាំទ្រដល់សកម្មភាពការពារធនធានធម្មជាតិនាពេលអនាគត បើទោះបីជាគម្រោង PAFF បានបញ្ចប់ក៏ពិតមែនក្តី ក៏ប៉ុន្តែកិច្ចសហការរវាងម្ចាស់ជំនួយ ដៃគូអភិវឌ្ឍន៍ និងស្ថាប័នពាក់ព័ន្ធនានា និងក្រសួងបរិស្ថាន នៅតែបន្តការការពារ និងអភិរក្សធនធានធម្មជាតិនៅប្រទេសកម្ពុជាដដែលហើយសមិទ្ធិផលការងារដែលបានបង្ហាញនៅក្នុងថ្ងៃនេះ ក៏បានរួមចំណែកក្នុងការអនុវត្តគោលការណ៍អភិវឌ្ឍសហសវត្សឆ្នាំ២០៣០ ដែលបានកំណត់គោលដៅអភិវឌ្ឍប្រកបដោយនិរន្តរភាព វិបុលភាព និងសមធម៌ជាសាកល ពាក់ព័ន្ធលើវិស័យបរិស្ថាន គឺការប្រែប្រួលអាកាសធាតុ និងការប្រើប្រាស់ដី»។
លោកជំទាវបានលើកឡើងជាអនុសាស៍គន្លឺះសំខាន់ៗចំនួន ៥ចំនុច ដើម្បីជាការរួមចំណែក និងជាជំនួយក្នុងការបន្តស្វែងរកការគាំទ្រនានាសម្រាប់កិច្ចការពារ និងអភិរក្សធនធានធម្មជាតិ ក្នុងវិស័យព្រៃឈើ និងជលផលក្នុងវិស័យបរិស្ថាន និងបង្កើនជីវភាពសហគមន៍ឱ្យកាន់តែល្អប្រសើរឡើង រួមមាន៖
១.បន្តគាំទ្រដល់ផែនការនិរន្តរភាព និងលើកកម្ពស់េជីវភាពសហគមន៍
២.ពង្រឹងសមត្ថភាពជំនាញ ដល់សហគមន៍ និងអង្គភពជំនាញ តាមរយៈការបណ្តុះបណ្តាល និងការចុះសិក្សានៅតាមតំបន់
៣.បន្តគាំទ្រដល់បណ្តាញសមាគមន៍ស្ត្រី ដើម្បីបញ្ជ្រាបការងារយេនឌ័រ
៤.បន្តពង្រឹងផ្នែកសេដ្ឋកិច្ចដល់ស្ត្រី ដើម្បីពួកគាត់មានលទ្ធភាពអនុវត្តសិទ្ធបានពេញលេញក្នុងការចូលរួមការពារ និងអភិរក្សធនធានធម្មជាតិ
៥.លើកកម្ពស់ប្រសិទ្ថភាពក្នុងការគ្រប់គ្រង និងអភិរក្សព្រៃឈើ តាមរយៈបទពិសោធន៍ និងការចងក្រងជាឯកសារសម្រាប់អង្គភាពជំនាញបន្តកិច្ចអភិវឌ្ឍន៍
គោលបំណងនៃការរៀបចំសិក្ខាសាលា ដើម្បីចែករំលែកនូវលទ្ធផលគម្រោង PaFF ទទួលបានពីការអនុវត្តការងារគម្រោង ផ្តល់វេទិការឆ្លុះបញ្ចាំងពី ភាពប្រឈម និងនវានុវត្តន៍ ដែលគម្រោងទទួលបាន។
ជាងនេះទៀតសិក្ខាសាលានេះផ្តល់ឱកាសឲ្យការពិភាក្សា និងរៀនសូត្រពីបទពិសោធន៍នៃភាពជាដៃគូសម្រាប់គាំទ្រដល់ សហគមន៍ព្រៃឈើ សហគមន៍នេសាទ និងសហគមន៍តំបន់ការពារធម្មជាតិ នៅក្នុងប្រទេសកម្ពុជា។
គួរបញ្ជាក់ថា សិក្ខាសាលានេះរៀបចំឡើងក្រោមកិច្ចសហការរវាង អង្គការរីខូហ្វ អង្គការកម្មវីធីផ្លាស់ប្ដូរបទពិសោធន៍អនុផលព្រៃឈើកម្ពុជា(NTFP-EP) អង្គការមូលនិធិសកលសម្រាប់អភិរក្សធម្មជាតិ(WWF) សមាគមន៍អភិរក្សវប្បធម៌ និងបរិស្ថាន(CEPA) និងមានវត្តមានពីម្ចាស់ជំនួយនានា រួមមាន ទីភ្នាក់ងារស្វីសសម្រាប់ការអភិវឌ្ឍន៍ និងកិច្ចសហប្រតិបត្តិការ(SDC) ទីភ្នាក់ងារស៊ុយអែតសម្រាប់កិច្ចសហប្រតិបត្តិការអភិវឌ្ឍអន្តរជាតិ(Sida)៕
