ឯកឧត្តម គួច ចំរើន ដឹកនាំគណៈប្រតិភូសួរសុខទុក្ខ និងនាំយកអំណោយរបស់សម្ដេចតេជោ និងសម្ដេចកិត្តិព្រឹទ្ធបណ្ឌិត ជូនដល់បងប្អូនកងទ័ពដែលកំពុងឈរជើងនៅលើកោះពូលូវ៉ៃ
ភ្នំពេញ៖ ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ នាព្រឹកថ្ងៃទី១៧ ខែមេសា ឆ្នាំ២០២៣ បានដឹកនាំគណៈប្រតិភូសួរសុខទុក្ខ និងនាំយកអំណោយដ៏ថ្លៃថ្លារបស់សម្ដេចតេជោ ហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនដល់បងប្អូនកងទ័ពដែលជានាយនាវី នាវីរង ពលនាវី និងក្រុមគ្រួសារទ័ព ដែលកំពុងឈរជើងនៅលើកោះពូលូវ៉ៃ នៃខេត្តព្រះសីហនុ។
មានប្រសាសន៍សំណេះសំណាលជាមួយបងប្អូនកងទ័ពដែលឈរជើងការពារនៅតាមបណ្ដាកោះ ឯកឧត្តម គួច ចំរើន បានពាំនាំនូវប្រសាសន៍ផ្ដាំផ្ញើពីសម្ដេចតេជោ ហ៊ុនសែន និងសម្ដេចកិត្តិព្រឹទ្ធបណ្ឌិត ដែលសម្ដេចទាំងពីរតែងតែគិតគូរអំពីសុខទុក្ខ និងជីវភាពរស់នៅរបស់កងទ័ពដែលកំពុងឈរជើងការពារទឹកដី នៅតាមបន្ទាត់ព្រំដែនលើផ្ទៃទឹក ដែលមានការលំបាកនៅឆ្ងាយពីដីគោក ពិបាកក្នុងការធ្វើដំណើរ និងជីវភាពរស់នៅផ្សេងៗ។ ដូច្នេះហើយទើបសម្ដេចចាត់ឱ្យនាំយកនូវគ្រឿងឧបភោគបរិភោគ និងថវិកាជូនបងប្អូននៅក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរ។
ឯកឧត្តមអភិបាលខេត្ត ក៏បានថ្លែងការកោតសរសើរ និងវាយតម្លៃខ្ពស់ចំពោះវីរភាពអង់អាចក្លាហានរបស់បងប្អូនកងទ័ពដែលជានាយនាវី នាយនាវីរង និងពលនាវីទាំងអស់ ដែលបានយកអស់កម្លាំងកាយចិត្តស្មារតីក្នុងការការពារបូរណភាព ទឹកដី មិនខ្លាចនឿយហត់ និងមានការអភិវឌ្ឍបានយ៉ាងល្អប្រសើរ។
អំណោយរបស់សម្ដេចតេជោ និងសម្ដេចកិតិ្តព្រឹទ្ធបណ្ឌិត ដែលឧបត្ថម្ភជូនកងទ័ពឈរជើងនៅកោះពូលូវ៉ៃរួមមាន៖ ម្ហូបអាហារ សម្ភារៈប្រើប្រាស់ ភេសជ្ជៈផ្សេងៗ ឧបត្ថម្ភថវិកាជូន បញ្ជាការដ្ឋានការពារកោះឆ្នេរ ១០លានរៀល, កងការពារកោះពូលូវ៉ៃលេខ៥ ១០លានរៀល និងជូនកងទ័ពឈរជើងទាំងអស់ ក្នុងម្នាក់១០ម៉ឺន
រៀល គ្រួសារកងទ័ព ម្នាក់ៗទទួលបានថវិកា ១០ម៉ឺនរៀល។
ជាមួយគ្នានេះ ឯកឧត្តម ឧត្តមសេនីយ៍ឯក ទូច ពលៈ ប្រធាននាយកដ្ឋាននគរបាលការពារព្រំដែនទឹក ក៏បាននាំយកអំណោយមានម្ហូបអាហារនិងថវិកាមួយចំនួនរបស់ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ទៅឧបត្ថម្ភកងទ័ពឈរជើងនៅកោះពូលូវ៉ៃផងដែរ ៕
