សិក្ខាសាលារយៈពេល២ថ្ងៃក្រោមប្រធានបទស្តីពី “ទិសដៅនៃការពង្រឹងយន្តការ និងគោលការណ៍នយោបាយព័ត៌មាន” ត្រូវបានបិទបញ្ចប់

ភ្នំពេញ៖ សិក្ខាសាលារយៈពេល២ថ្ងៃក្រោមប្រធានបទស្តីពី “ទិសដៅនៃការពង្រឹងយន្តការ និងគោលការណ៍នយោបាយព័ត៌មាន” ត្រូវបានបិទបញ្ចប់នៅវេលាថ្ងៃនេះ។

លោកស្ទេវិន សាន់ បានរៀបរាប់ និងពន្យល់លម្អិតយ៉ាងពិស្តានូវសិទ្ធិ និងកាតព្វកិច្ចរបស់អ្នកសារព័ត៌មាន ដោយបានបញ្ជាក់អំពីអំណាចរដ្ឋទាំង៣ រួមមានអំណាចនីតិបញ្ញត្តិ នីតិប្រតិបត្តិ និងតុលាការ ដែលសារព័ត៌មានពុំមែនជាអំណាចទី៤។ ព្រំដែននៃសិទ្ធិសារព័ត៌មានត្រូវបានកំណត់ដោយបន្ទាត់ក្រហមពាក់ព័ន្ធសិទ្ធិ និងកាតព្វកិច្ចទទួលខុសត្រូវចំពោះមុខច្បាប់។ ដោយហេតុថា អ្នកសារព័ត៌មានពុំមានសិទ្ធិពិសេសសំខាន់ចំនួន៣ គឺអភ័យឯកសិទ្ធិ ឆន្ទានុសិទ្ធិ និងបុព្វសិទ្ធិអ្វីឡើយ។

“អ្នកសារព័ត៌មានកុំបំពានអ្នកដទៃ កុំបំភ្លៃការពិត” ប្រសាសន៍ប្រមុខរាជរដ្ឋាភិបាលកម្ពុជាសម្តេច ហ៊ុន សែន គឺជាពាក្យគន្លឹះនៃការរំលឹកអ្នកសារព័ត៌មានអោយគោរពសិទ្ធិបុគ្គល និងកុំបំពុលបរិយាកាសសង្គមតាមរយៈការប្រឌិតព័ត៌មានក្លែងក្លាយ។

ជាមួយគ្នានោះ លោកស្ទេវិន សាន់បានគូសបញ្ជាក់ និងញែកដាច់ដោយឡែកនូវព័ត៌មាននយោបាយ និងនយោបាយព័ត៌មាន។ នយោបាយព័ត៌មានរបស់ប្រមុខរាជរដ្ឋាភិបាលសម្តេច ហ៊ុន សែន ត្រូវបានរំលេច និងលើកជាឧទាហរណ៍គំរូ។

នយោបាយព័ត៌មានរបស់អង្គភាពអ្នកនាំពាក្យរាជរដ្ឋាភិបាលក៏ត្រូវបានគូសបញ្ជាក់ជូនសិក្ខាកាមនូវយុទ្ធសាស្រ្តពិសបន្សាបពិស និងយុទ្ធសាស្ត្រតក់ៗពេញបំពង់ ដើម្បីបញ្ជ្រាបព័ត៌មានវិជ្ជមានដល់ប្រជាជនគ្រប់ស្រទាប់ពីថ្នាក់ស្រុក ឃុំ រហូតដល់ថ្នាក់ភូមិ។ ខ្ញុំក៏បានរំលេចនូវកិច្ចខិតខំប្រឹងប្រែង និងការលះបង់ពេលវេលា ប្រាជ្ញា ស្មារតីរបស់មន្រ្តីបុគ្គលិកសម្រាប់ការងាររបស់អង្គភាពអ្នកនាំពាក្យរាជរដ្ឋាភិបាលតាមរយៈសន្និសីទសារព័ត៌មានថ្នាក់ជាតិ និងថ្នាក់ក្រោមជាតិ វគ្គបណ្តុះបណ្តាលអ្នកសារព័ត៌មានប្រកបដោយវិជ្ជាជីវៈ សិក្ខាសាលាថ្នាក់ក្រោមជាតិ ដើម្បីចែករំលែក និងពង្រឹងសមត្ថភាពការងារប្រកបដោយប្រសិទ្ធភាព និងសក្តិសិទ្ធភាព។

អង្គភាពអ្នកនាំពាក្យរាជរដ្ឋាភិបាលក្រោមការដឹកនាំរបស់ឯកឧត្តម ផៃ សុីផាន និងលោកស្ទេវិន សាន់ បានថ្លែងអំណរគុណចំពោះឯកឧត្តមអភិបាលរងទទួលបន្ទុកអ្នកនាំពាក្យ អភិបាលក្រុង ប្រធានមន្ទីរជំនាញជុំវិញរដ្ឋបាលខេត្ត អភិបាលស្រុក អភិបាលរងស្រុកទាំងអស់ ព្រមទាំងក្រុមយុវជនបង្គោលចំនួន៤ខេត្ត គឺខេត្តកណ្តាល ខេត្តកំពង់ស្ពឺ ខេត្តកំពង់ឆ្នាំង និងខេត្តពោធិ៍សាត់ ដែលបានចូលរួមក្រេបជញ្ជក់នូវខ្លឹមសារសិក្ខាសាលាដោយការយកចិត្តទុកដាក់ជាទីបំផុត៕