ឯកឧត្តមឧបនាយករដ្ឋមន្ត្រី ប្រាក់ សុខុន អញ្ជើញជាអធិបតី សម្ពោធព្រះវិហារនិងសមិទ្ធផលនានា ក្នុងវត្តខ្ពប
ភ្នំពេញ៖ ឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិ និងលោកជំទាវ តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី១៦ ខែមីនា ឆ្នាំ២០២៣ បានអញ្ជើញជាអធិបតី ក្នុងពិធីសម្ពោធព្រះវិហារ និងសមិទ្ធផលនានា ក្នុងវត្តខ្ពប ស្ថិតនៅឃុំខ្ពប ស្រុកស្អាង ខេត្តកណ្តាល។
សម្តេចព្រះធម្មលិខិតបណ្ឌិត សៅរ៍ ចន្ទថុល្ល ព្រះរាជាគណៈថ្នាក់ឯក និងជាឧត្តមប្រឹក្សាគណៈមហានិកាយ នៃព្រះរាជាណាចក្រកម្ពុជា បានសង្ឃដីកាថា សមិទ្ធផលនានា ត្រូវសម្ពោធដាក់ឱ្យប្រើប្រាស់ជាផ្លូវការនៅថ្ងៃនេះ គឺមានការចូលរួមឧបត្ថម្ភកសាងដោយមហាសប្បុរសជននានា ដែលមានព្រះវិហារ ថ្មីទំហំ២៥ គុណនិង៥០ម៉ែត្រ កម្ពស់ពីរជាន់, ខ្លោងទ្វារបីច្រក, ផ្លូវលំជាប់វត្ត, របងព័ទ្ធជុំវិញបរិវេណវត្ត, ស្រះទឹកខាងមុខព្រះវិហារ, បន្ទប់អនាម័យចំនួន១០, ចាក់ផ្លូវបេតុងក្នុងវត្ត ដែលសរុបបច្ច័យសំនួន ១,៣៣០,៧៥០ដុល្លាអាមេរិក។
ឯកឧត្តម ឧបនាយករដ្ឋមន្ត្រី ប្រាក់ សុខុន បានថ្លែងថា សមិទ្ធផលទាំងអស់ដែលកើតឡើងមកនេះ ដោយសារប្រទេសជាតិមានសន្តិភាពពេញលេញ ក្រោមការដឹកនាំប្រទេសដោយសម្តេចតេជោ ហ៊ុន សែន។ ក្រោមការដឹកប្រទេសរបស់សម្តេចតេជោ ធ្វើឱ្យប្រទេសកម្ពុជាមានការរីចំរើនទៅមុខដោយឥតឈប់ឈរ ប្រទេសមានការអភិវឌ្ឍន៍ ជាមួយគ្នាប្រទេសកម្ពុជា មានឈ្មោះល្បីរុន្ទឺ ដែលថ្មីៗកន្លងទៅនេះ សម្តេចតេជោ ជាប្រធានអាស៊ាន បានដឹកនាំប្រជុំទទួលបានជោគជ័យទៀតផង។
ក្នុងពិធីសម្ពោធសមិទ្ធផលនានាក្នុងវត្តខ្ពប ឯកឧត្តម ប្រាក់ សុខុន បានបំពាក់គ្រឿងឥស្សរិយសដល់សប្បុរសជន និងបានឧបត្ថម្ភ ជាថវិកា សារ៉ុង ក្រណាត់ស និងសៀវភៅប៊ិចដលើប្រជាពលរដ្ឋ សិស្សានុសិស្សបានចូលរួមផងដែរ៕
