សម្តេចតេជោ ហ៊ុន សែន គាំទ្រសំណើចិនទាំង ១២ចំណុច ក្នុងការបញ្ចប់សង្គ្រាមនៅអ៊ុយក្រែន ដោយសារស្របតាមជំហរកម្ពុជា
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានគាំទ្រសំណើរបស់ចិនទាំង ១២ចំណុច ក្នុងការបញ្ចប់សង្គ្រាមនៅអ៊ុយក្រែន ដោយសារសំណើ ១២ចំណុចនោះ គឺស្របតាមជំហររបស់កម្ពុជា លើបញ្ហាសង្គ្រាមនៅអ៊ុយក្រែននេះ។
ក្នុងឱកាសអញ្ជើញជាអធិបតីបិទសន្និបាតបូកសរុបលទ្ធផលការងារឆ្នាំ២០២២ និងទិសដៅការងារ ឆ្នាំ២០២៣ របស់ក្រសួងការបរទេស នាថ្ងៃទី៣ មីនា សម្តេចតេជោ ហ៊ុន សែន បានបញ្ជាក់យ៉ាងដូច្នេះថា «នៅក្នុងឱកាសខួប ១ឆ្នាំ នៃសង្គ្រាមនៅអ៊ុយក្រែន ប្រទេសចិនដើរតួនាទីឈានមុខមួយ ក្នុងការស្វែងរកសន្តិភាព បញ្ចប់សង្គ្រាមនៅអ៊ុយក្រែន ដោយលើកឡើងសំណើ ដែលមាន ១២ចំណុច។ កម្ពុជា គាំទ្រសំណើ ១២ចំណុចរបស់ចិន ដោយសារសំណើរបស់ចិនចែងអំពីការគោរពច្បាប់អន្តរជាតិ គោលការណ៍ធម្មនុញ្ញអង្គការសហប្រជាជាតិ ដែលជាវិធានសម្រាប់ទំនាក់ទំនង រវាងរដ្ឋអធិបតេយ្យ ដូចជាអធិបតេយ្យភាព បូរណភាពដែនដី និងឯករាជភាពនយោបាយ»។
បើតាមការបញ្ជាក់របស់សម្តេចតេជោ ហ៊ុន សែន សំណើទាំង ១២ចំណុចរបស់ចិន ក៏អំពាវនាវឱ្យបញ្ឈប់ភាពប្រទូស្តរាយផ្នែកយោធា។ តាមបទពិសោធន៍ សង្គ្រាម គឺជាមធ្យោបាយអាក្រក់បំផុតសម្រាប់ការបញ្ចប់សង្គ្រាម ហើយបទឈប់បាញ់ជាមធ្យោបាយល្អបំផុត ដើម្បីឈានទៅបញ្ចប់សង្គ្រាម។ សំណើនេះ ក៏បានអំពាវនាវឱ្យមានកិច្ចសន្ទនាសន្តិភាព និងបញ្ឈប់ទណ្ឌកម្មជាឯកតោភាគីផងដែរ។ គោលការណ៍ខាងលើ ស្របគ្នាជាមួយនឹងជំហររបស់កម្ពុជា។ បន្ថែមលើនេះ សំណើរបស់ចិនក៏បានផ្តោតលើមនុស្សធម៌ សន្តិសុខស្បៀង ការស្ថាបនាឡើងវិញក្រោយជម្លោះ។
ប្រមុខដឹកនាំរាជរដ្ឋាភិបាលកម្ពុជា ក៏បានអំពាវនាវឱ្យភាគីពាក់ព័ន្ធទាំងអស់ ពិចារណាដោយយកចិត្តទុកដាក់ចំពោះសំណើរបស់ចិន ដើម្បីបញ្ឈប់ការប្រយុទ្ធគ្នា បញ្ចប់ការឈឺចាប់របស់ប្រជាជន និងការបំផ្លិចបំផ្លាញទ្រព្យសម្បត្តិ និងហេដ្ឋរចនាសម្ព័ន្ធ ព្រមទាំងនាំត្រលប់ទៅវិញនូវសន្តិភាព។
សូមបញ្ជាក់ថា ក្រសួងការបរទេសចិន កាលពីថ្ងៃទី២៤ ខែកុម្ភៈ ឆ្នាំ២០២៣ បានប្រកាសពីគោលជំហររបស់ចិន អំពីការដោះស្រាយវិបត្តិអ៊ុយក្រែនតាមនយោបាយ ដែលមាន ១២ចំណុច រួមមាន៖ ទី១៖ គោរពអធិបតេយ្យភាពរបស់ប្រទេសនានា ទី២៖ បោះចោលគំនិតសង្គ្រាមត្រជាក់ ទី៣៖ ឈប់បាញ់គ្នា ទី៤៖ ចាប់ដំណើរការចរចាសន្តិភាព ទី៥៖ ដោះស្រាយវិបត្តិមនុស្សធម៌ ទី៦៖ ការពារជនស៊ីវិលនិងអ្នកទោសសង្រ្គាម ទី៧៖ គាំពារសុវត្ថិភាពនៃរោងចក្រផលិតអគ្គិសនីដោយថាមពលនុយក្លេអ៊ែរ ទី៨៖ កាត់បន្ថយហានិភ័យជាយុទ្ធសាស្ត្រ ទី៩៖ ធានាការនាំចេញស្បៀងអាហារ ទី១០៖ បញ្ឈប់ការដាក់ទណ្ឌកម្មដោយឯកតោភាគី ទី១១៖ ធានាស្ថិរភាពនៃខ្សែសង្វាក់ឧស្សាហកម្ម និងខ្សែសង្វាក់ផ្គត់ផ្គង់ និងទី១២៖ ជំរុញការកសាងឡើងវិញក្រោយពីសង្គ្រាម ៕
