ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញជាអធិបតីភាពដ៏ខ្ពង់ខ្ពស់ ប្រារព្ធទិវាវប្បធម៌ជាតិ នៅថ្ងៃទី២ ខែមីនា ឆ្នាំ២០២៣ ខាងមុខនេះ។
ក្នុងសន្និសីទសារព័ត៌មាន ស្តីពីការរៀបចំទិវាវប្បធម៌ជាតិ នៅថ្ងៃទី២៦ ខែកុម្ភៈ ឆ្នាំ២០២៣ ឯកឧត្ដម ឡុង ប៉ុណ្ណស៊ីរីវត្ថ រដ្ឋលេខាធិការ និងជាអ្នកនាំពាក្យ ក្រសួងវប្បធម៌ និងវិចិត្រសិល្បៈ បានមានប្រសាសន៍ថា តាមពិតទៅ ទិវាវប្បធម៌ជាតិ ត្រូវបានកំណត់ធ្វើឡើង នៅថ្ងៃទី៣ ខែមីនា ឆ្នាំ២០២៣ ប៉ុន្តែដោយសារឆ្នាំនេះ កុំឲ្យប៉ះពាល់ដល់ពេលវេលារបស់សិល្បករសិល្បការិនី សម្តេចតេជោ ហ៊ុន សែន ក៏សម្រេចចិត្តធ្វើមុន ១ថ្ងៃ។
ឆ្នាំ២០២៣នេះ ទិវាវប្បធម៌ជាតិ នឹងត្រូវធ្វើឡើង ជាលើកទី២៥ ក្រោមប្រធានបទ «យុវជនដើម្បីវប្បធម៌ជាតិ»។ ឯកឧត្ដម ឡុង ប៉ុណ្ណស៊ីរីវត្ថ បានអះអាងថា តាមការគ្រោងទុក នឹងមានសិល្បករសិល្បការិនី ប្រមាណ ៤ពាន់នាក់ ចូលរួម អបអរសាទរទិវាវប្បធម៌ជាតិ។
ថ្ងៃ៣មីនា ជាទិវារំលឹកដល់គុណូបការៈបុព្វបុរសខ្មែរគ្រប់ជំនាន់ ដែលបានពលីទាំងកំលាំងកាយ កំលាំងចិត្ត ប្រាជ្ញា ស្មារតី និងអាយុជីវិត ក្នុងការបង្កើត ថែរក្សា និងការពារសម្បត្តិវប្បធម៌ដ៏សំបូរបែប និងមានតម្លៃសម្រាប់កូនចៅជំនាន់ក្រោយ ៕
