ភ្នំពេញ៖ ឯកឧត្តវេជ្ជបណ្ឌិត សុះ មុះសិន សមាជិកគណៈកម្មការទី៨ នៃរដ្ឋសភា និងជាអនុប្រធានសហភាពសហព័ន្ធយុវជនកម្ពុជា បានលើកឡើងថា ទឹកគឺជាជីវិតហើយការផ្លាស់ប្តូររវាងគ្រោះរាំងស្ងួតនិងគ្រោះទឹកជំនន់នាំមកនូវសេចក្តីប្រឈមសម្រាប់ការគ្រប់គ្រងទឹកនៅកម្ពុជា។
នៅក្នុងពេលអញ្ជើញចុះជួបសំណេះសំណាលប្រជា និងប្រគល់ប្រព័ន្ធទឹកស្អាត ចំនួន ២កន្លែង ស្ថិតនៅភូមិដំណាក់កី ឃុំជើងគ្រៀវ ស្រុករលាប្អៀរ ខេត្តកំពង់ឆ្នាំង ឯកឧត្តមសុះ មុះសិន បានលើកឡើងថា ការអភិវឌ្ឍហេដ្ឋារចនាសម្ព័ន្ធទឹក គោលនយោបាយនិងការគ្រប់គ្រងទឹកមានលក្ខណៈសំខាន់សម្រាប់ប្រទេសកម្ពុជា ជាពិសេសក្នុងការធានាឱ្យបាននូវទឹកស្អាតសម្រាប់ការប្រើប្រាស់ និងកត្តាអនាម័យ ក៏ដូចជាប្រភពទឹកសម្រាប់ការស្រោចស្រព។ រដ្ឋាភិបាលតែងគិតគូរ និងយកចិត្តទុកដាក់ខ្ពស់ និងបានរៀបចំជាគោលនយោបាយស្ដីពីការគ្រប់គ្រងទឹក និងការអភិវឌ្ឍជនបទ ពិសេសទឹកស្អាតសម្រាប់ប្រជាជននៅជនបទ ដើម្បីលើកកម្ពស់ជីវភាពរស់នៅ កាត់បន្ថយជំងឺផ្សេង។ ប្រទេសកម្ពុជា កំពុងសម្រេចបាននូវវឌ្ឍនភាពជាបណ្តើរៗ ដើម្បីបំពេញទៅតាមចំណុចដៅផ្នែកអនាម័យ និងទឹកស្អាត។
ឯកឧត្តមបន្តថា ប្រព័ន្ធទឹកស្អាត និងអនាម័យ និងទម្លាប់ប្រើប្រាស់ទឹកស្អាត និងអនាម័យ ត្រូវបានរាជរដ្ឋាភិបាលយកចិត្តទុកដាក់ និងជំរុញការចូលរួមពីក្រសួង ស្ថាប័ន ភាគីពាក់ព័ន្ធ សង្គមស៊ីវិល និងវិស័យឯកជន ឆ្លើយតបនឹងគោលដៅរអភិវឌ្ឍន៍ប្រកបដោយចីរភាពស្ដីពីទឹកស្អាត ជាមួយនឹងចក្ខុវិស័យជំរុញឱ្យមានការទទួលបានទឹកស្អាត និងសេវាអនាម័យឱ្យបានជាសកលត្រឹមឆ្នាំ២០៣០។
ឯកឧត្តមបានផ្ដាំផ្ញើដល់បងប្អូនប្រជាពលរដ្ឋឱ្យបន្តអនុវត្តអនាម័យ ហូបស្អាត ផឹកស្អាត រស់នៅស្អាត ដើម្បីសុខភាព និងសុភមង្គល ព្រមទាំងជួយថែរក្សាសមិទ្ធផលនេះ ទុកប្រើប្រាស់ឱ្យបានយូរអង្វែងទៅមុខ៕
